ރައްޔިތުން މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައިގެން ނެރެމުން އަންނަ މަޖައްލާއެއް ކަމަށްވާ އޯޝަން ވީކްލީ އިން, އެ ނަމުގައި ޓީވީ ޗެނަލެއް ހަދައިފިއެވެ.
މިއަދު ޕްރޮގްރާމްތައް ދައްކަންފެށި އޯޝަން ވީކްލީ ޗެނަލް މިހާރު ފެންނަނީ ހަމައެކަނި ޔޫޓިއުބް އާއި ފޭބުކް އިންނެވެ. މިއީ ކޮންކަހަލަ ޕްރޮގްރާމްތަކެއް ގެނެސްދޭ ޗެނަލެއްކަން އެ ޗެނަލުން އަދި ހާމަ ކޮށްފައި ނުވި ނަމަވެސް މަޖިލީހުގެ ޖަލްސާ އެ ޗެނަލުން ލައިވް ކުރެއެވެ. އަދި ބެލެވޭ ގޮތުގައި މިއީ ބޮޑަށް ރާއްޖޭގެ ސިޔާސީ މަޝްރަހާއި ގުޅޭ ޚަބަރުތައް ގެނެސްދޭނެ ޗެނަލެކެވެ.
އޯޝަން ވީކްލީ ޗެނަލް ގެ ޕްރޮގްރާމެއް
އެހެނީ ނަޝީދުގެ އޯޝަން ވީކްލީ މަޖައްލާ އިން ވެސް އާއްމު ގޮތެއްގައި ހުންނަނީ އެފަދަ ޚަބަރު ތަކެވެ. އެގޮތުން ސަރުކާރަށް ފާޑުކިޔައި ލިޔެފައިވާ ލިޔުންތައް އެ މަޖައްލާގައި ގިނަ ކަން ފާހަގަކޮށްލެވެއެވެ.
ރިޔާސީ އިންތިހާބު ކުޑަތަންވެފައި ވަނިކޮށް އެމްޑީޕީގެ ނަޝީދުގެ ފެކްޝަނުން އައު ޕާޓީއެއް އުފައްދައި ރިޔާސީ އިންތިހާބުގައި އެޕާޓީގެ ކެންޑިޑޭޓެއް ވާދަކުރާނެކަންވެސް އިއުލާން ކޮށްފައިވާއިރު، ޕްޓީގެ ގިނަ މެންބަރުންގެ ޝަކުވާ އަކީ ރާއްޖޭގެ މީޑިއާތައް ސަރުކާރުން "ގަނެލާފައިވާ" ވާހަކައެވެ. އަދި ސަރުކާރު ހިންގާ އެމްޑީޕީ އާއި އެ ޕާޓީއަށް ތާއީދުކުރާ ޕާޓީތަކަށް ފިޔަވައި އެހެން ޕާޓީ ތަކަށް މީޑިއާ ތަކުން ފުރުސަތު ނުލިބޭ ކަމަށްވެސް އެ ފަރާތްތަކުން އަންނަނީ ބުނަމުންނެވެ.
އެހެންކަމުން، އޯޝަން ވީކްލީ ޗެނަލަކީ އެ ޕާޓީ ހިޔާލާއި، ސިޔާސަތުތައް އާއްމުންނަށް އެންގުމަށް ހެދިފައިވާ ޗެނަލެއް ކަމަށްވެސް ބެލުމުގެ ފުރުސަތު އެބައޮތެވެ.
Advertisement
This content is created and paid for by advertisers and does not involve Voice Journalists
