ކެއްސުމާއި ރޯގާއަށް ދޭ ބޭހެެއްގައި މައްސަލައެއް ފާހަގަވެ މޯލްޑިވްސް ފުޑް އެންޑް ޑްރަގް އޮތޯރިޓީން އެކަން ސަމާލުކަމަށް ގެނެސްފިއެވެ.

އެއޮތޯރިޓީއިން ބުނެފައިވަނީ ކެއްސުމާއި ރޯގާއަށް ދޭ ޑައިތީލެން ގްލައިކޯލް އާއި، އެތީލެން ގްލައިކޯލް އަޅާފައި ހުންނަ ޕެރެސެޓަމޯލްއާއި ގުޅޭ މައްސަލައެއް އެ އޮތޯރިޓީ އަށް ލިބިފައިވާ ކަމަށެވެ. އެއީ ކެއްސުމާއި ރޯގާ އަށް ބޭނުންކުރާ ދިޔާ ބޭހެއް ކަމަށާއި، އެބޭހަކީ ދެކުނު އިރުމަތީ އޭޝިޔާ ސަރަހައްދުގައި ބޭނުން ކުރަމުންދާ ކުޑަކުދިންނަށްދޭ ބޭހެއް ކަމަށްވެސް ބުނެފައިވެއެވެ.

އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން 31 ޖޫން 2023ހުން ފެށިގެން ރާއްޖެ އިމްޕޯޓްކުރާ ޕެރެސެޓެމޯލާއި ކެއްސުމަށް ބޭނުން ކުރާ ދިޔާ ބޭހުގެ ކޮންމެ ބެޗެކަށް (ޑަބްލިއު.އެޗް.އޯ) ގެ ޕްރީކޮލިފައިޑް ލެބޯޓްރީ ތަހުލީލު ހުށައަޅަން ޖެހޭ ކަންކަން ހުރިކަން އެ އޮތޯރިޓީން ވަނީ ފާހަގަކޮށްފައެވެ. 

އެމްއެފްޑީއޭގެ އިއުލާނުގައި އިތުރަށް ބުނެފައިވަނީ މި ބޭހާއި ގުޅޭ އެއްވެސް މައުލޫމާތެއް ބޭނުންނަމަ އެ އޮތޯރިޓީ އަށް އެކަން އެނގުމަށާއި، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ހިއްސާކުރާނެ ކަމަށެވެ.