އާޖެންޓީނާގައި މިހާރު ކުރިއަށްދާ 20 އަހަރުންދަށުގެ ވޯލްޑްކަޕް ފުޓްބޯޅަ މުބާރާތުގެ ދެވަނަ ބުރުގައި 4-1 ގެ ނަތީޖާއަކުން ޓިއުނީޝިޔާ ބަލިކޮށް ބްރެޒިލް އިން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

ގުރޫޕް ޑީގެ އެއްވަނަ ޓީމުގެ ގޮތުގައި ބުރެޒިލް މުބާރާތުގެ ދެވަނަ ބުރުން ފުރުސަތު ހޯދި އިރު، ގްރޫޕް ސްޓޭޖުގެ ފުރަތަމަ މެޗުގައި އިޓަލީ އަތުން އެޓީމު ވަނީ 3-2 ގެ ނަތީޖާއަކުން ބަލިވެފައެވެ. ނަމަވެސް މުބާރާތުގެ ދެވަނަ މެޗުގައި ޑޮމެނިކަން ރިޕަބްލިކް އާއި ވާދަކުރި މެޗު ފަސޭހަކަމާއި އެކު 6-0 ގެ ނަތީޖާއަކުން އެޓީމު ކާމިޔާބުކުރި އިރު ގުރޫޕްގެ ފަހު މެޗުގައި ނައިޖީރިއާ އަތުން ބްރެޒިލް މޮޅުވީ 2-0 ގެ ނަތީޖާއަކުން ނެވެ.

މިރޭގެ މެޗުގެ ފުރަތަަމަ ހާފުގައި ބްރެޒިލްގެ ފަރާތުން މޮޅު ކުޅުމެއް ފެނިގެންދިޔަ އިރު، އެޓީމުން ވަނީ ފުރަތަަމަ ހާފުގައި ދެ ލަނޑުގެ ލީޑެއް ނަގާފައެވެ. މި ގޮތުން އެޓީމުގެ ފުރަތަމަ ލަނޑު 11 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ މާކޯސް ލިއޮނާޑޯއެވެ. އަދި އެޓީމުގެ ދެވަނަ ލަނޑު 31 ވަނަ މިނެޓުގައި ކާމިޔާބުކޮށްދިނީ ކެޕްޓަން އަންދްރޭ ސަންޓޯސް އެވެ. 

ފުރަތަަމަ ހާފުގެ އިތުރު ވަގުތުގެ ތެރޭގައި ބްރެޒިލްގެ ޑިފެންޑަރު ރޮބަޓް ރެނާން ކުރި ފައުލަކާއި ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ. މިއާއެކު މެޗުގެ ބާކީބައި ބްރެޒިލް އިން ފުރިހަމަކުރީ އެއްކުޅުތެރިއަކު މަދުކޮށެވެ.

އެއްކުޅުތެރިއަކު މަދުކޮށް ކުޅުނު ނަމަވެސް ދެވަނަ ހާފުގައި ވެސް ބްރެޒިލް އިން އިތުރު ދެ ލަނޑު ކާމިޔާބުކުރިއެވެ. އެގޮތުން ދެވަނަ ހާފުގެ އިތުރު ވަގުތުގެ ފުރަތަަމަ މިނެޓުގައި އެޓީމުގެ ތިންވަނަ ލަނޑު މެތިއުސް މާޓިންސް ކާމިޔާބުކުރިއިރު، އެޓީމުގެ ހަތަރުވަނަ ލަނޑު އިތުރު ވަގުތުގެ 10 ވަނަ މިނެޓުގައި ކާމިޔާބުކޮށްދިނީ ކެޕްޓަން އަންދްރޭ ސަންޓޯސް އެވެ. 

މި މެޗުގައި ޓިއުނީޝިޔާ އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ އިތުރު ވަގުތުގެ 13 ވަނަ މިނެޓުގައި ކާމިޔާބުކޮށްދިނީ ޑިފެންޑަރު މަޙްމޫދު ޣޯރްބެލް އެވެ. 

މުބާރާތުގެ ކުއާޓާ ފައިނަލުގައި ބްރެޒިލް ވާދަކުރަންޖެހެނީ އިޒްރޭލުގެ ގައުމީ ޓީމާއި ދެކޮޅަށެވެ.