ބައިބަލާ އެސޯސިއޭޝަނުން ބާއްވާ އިންޓަރ އޮފީސް ބައިބަލާ މުބާރާތަށް އަރބަންކޯގެ ޓީމުން ތައްޔާރުވާން ފައްޓައިފި ކަމަށް އާބަންކޯއިން ބުނެފިއެވެ.
އެގޮތުން މި ޓީމުން މިހާރު ވަނީ ބައިވެރިންނާއި އެކު ޕްރެކްޓިސްތައް ފަށާފައި ކަމަށް އެކުންފުނިން ބުނެއެވެ. އަރބަންކޯގެ ޓީމް އެކުލަވާލާފަވަނީ މީގެ ކުރިން އެސޯސިއޭޝަނުން ބާއްވާފައިވާ ބައިބަލާ މުބާރާތްތަކުގައި ވާދަކޮށް، އެންމެ މޮޅު ކުޅުންތެރިޔާ ނުވަތަ ބައިބަލާގެ ނަމުން ނަމަ މިސްޓަރ ބައިބަލާގެ ޝަރަފު ހޯދާފައިވާ ގިނަ ކުޅުންތެރިންތަކަކާ އެކުގައި ކަމަށް އަރބަންކޯއިން ބުނެއެެވެ.
އަދި ޓީމުގެ ކޯޗުކަން ކުރަނީ ބައިބަލާގައި ތަޖުރިބާކާރު އަލީ ރިޒްވާން ކަމަށް ވެސް ބުނެފައިވެއެވެ.
އޮފީސްތަކުގެ މެދުގައި ބާއްވާ ބައިބަލާ މުބާރާތް އެސޯސިއޭޝަނުން ޖޫން މަހުގެ 20 ވަނަ ދުވަހު ފެށުމަށް ތައްޔާރުވެފައިވާއިރު މި މުބާރާތް ބާއްވަނީ ހުޅުމާލޭގައެވެ.
މިއީ ރާއްޖޭގައި އޮފީސްތަކުގެ މެދުގައި ބާއްވާ ފުރަތަމަ ބައިބަލާ މުބާރާތެވެ. ބައިބަލާ އެސޯސިއޭޝަނުން ކޮންމެ އަހަރަކު ޢީދު ތެރޭގައި ބާއްވާ ޤައުމީ ބައިބަލާ މުބާރާތް ވެސް މި އަހަރު ބާއްވާފައިވަނީ ހުޅުމާލޭގައެވެ.
މި ފަހަރު ހުޅުމާލޭގައި މުބާރާތް ބޭއްވި އިރު އެއީ ހުޅުމާލޭގައި އެ މުބާރާތް ބޭއްވި ފުރަތަމަ ފަހަރެވެ. އަދި އަރބަންކޯއިން ވަނީ ހުޅުމާލޭގައި ބައިބަލާ ކުޅުމަށް އެކަށީގެންވާ ފަދަ ކޯޓެއް ގާއިމްކޮށްދީފައެވެ.
Advertisement
This content is created and paid for by advertisers and does not involve Voice Journalists
