ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އަށް ތާއީދު ކުރައްވާ މެންބަރުން އުފައްދަވާ "ދަ ޑިމޮކްރެޓްސް" ރަޖިސްޓްރީ ކުރަން 3,500 އަށްވުރެ ގިނަ މީހުންގެ ފޯމް އިލެކްޝަންސް އަށް ހުށަހަޅައިފިއެވެ.

"ދަ ޑިމޮކްރެޓްސް"ގެ ނަމުގައި ޕާޓީއެއް އުފެއްދުމަށް އެމްޑީޕީގެ ކުރީގެ ޗެއާޕާސަން ޙަސަން ލަޠީފަށް ހުއްދަ ދިނީ މިމަހުގެ 24 ވަނަ ދުވަހުއެވެ. އެ ދުވަހުން ފެށިގެން ފިކުރެއްގެ ދިރުން ހަރަކާތުން އަންނަނީ މުޅި ރާއްޖޭގައި އެ ޕާޓީއަށް މެންބަރުން ވެއްދުމުގެ މަސައްކަތް ކުރަމުންނެވެ.

އެގޮތުން ކުރި މަސައްކަތުން ފޯމު ފުރާފައިވާ ޖުމުލަ 3,560 މީހުންގެ ފޯމު މިއަދު ހެނދުނު އިލެކްޝަންސް ކޮމިޝަނާއި ވަނީ ހަވާކޮށްފައެވެ. އެކަމަށްޓަކައި މިއަދު ހެނދުނު ދަރުބާރުގޭގައި ބޭއްވި ރަސްމިއްޔާތެއްގައި އެ ފޯމުތައް އީސީއާ ހަވާލުކޮށްދެއްވީވެސް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފްއެވެ. އީސީގެ ފަރާތުން ފޯމުތަކާއި ހަވާލުވެވަޑައިގެންނެވީ އެ ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާއެވެ.

Advertisement

މިކަމާއި ގުޅިގެން ދަ ޑިމޮކްރެޓްސް އިން ބުނީ، އިލެކްޝަންސް ޕާޓީ ރެޖިސްޓާ ކުރުމުގެ މަރުހަލާގައި ބަލާނީ ހަމައެކަނި ސައްޙަ 3000 ފޯމުކަމަށްް އިލެކްޝަންސް ކޮމިޝަނުން މަޢުލޫމާތު ދީފައިވާ ކަމަށެވެ. އަދި 3000 ހަމަވުމުން ދެންް ހުންނަ ފޯމުތައް އެެ މަރުހަލާގައި  ނުކުރާނެ ކަމަށާއި، އިތުރަށް 560 ފޯމު ލާފައިވަނީ 3000 ފޯމުުގެ ބެކަޕްއަށް ކަމަށެވެ. 3000 ހަމަވެފައި ދެން އިތުރުވާ ފޯމުތައް، ޕާޓީ ރެޖިސްޓްރީ ކުރުމަށްފަހު ދަފްތަރުގައި ހިމަނާނެކަމަށްވެސް އެ ކޮމިޝަނުން ފާހަގަކޮށްފައިވާ ކަމަށް ދަ ޑިމޮކްރެޓްސް އިން ބުނެއެވެ. 

ފޯމުތައް އީސީއާ ހަވާލުކުރެއްވުމަށް ފަހުގައި ނޫސްވެރިންނާއި ބައްދަލުކޮށް ވާހަކަދައްކަވަމުން ހަސަން ލަތީފް ވިދާޅުވީ މިއަދު ހުށަހެޅި ފޯމުތަކުގައި އެއްވެސް މައްސަލައެއް ނުހުންނާނެ ކަމަށެވެ. ފޯމުތައް ހުށަހެޅުމުގެ ކުރިން އެ ޕާޓީގެ ތެރޭގައި ވެރިފިކޭޝަން ޕްރޮސެސްއެއް ހިންގައި ސައްހަކަށް ކަށަވަރުކޮށްފައިވާނެ ކަމަށް ވިދާޅުވިއެވެ

އަދި ފޯމުތައް ވެރިފައިކޮށް އީސީއިން ހުއްދަ ދިނުމާއިއެކު އެ ޕާޓީއަށް މެމްބަރުން އިތުރު ކުރުމަށް އެކި ރަށްރަށަށް ދަތުރު ފަށާނެ ކަމަށާ ރިޔާސީ އިންތިހާބަށް ޑިމޮކްރެޓްސްގެ ފަރާތުން ކެމްޕެއިން ވެސް ފަށާނެ ކަމަށް އޭނާ ވިދާޅުވިއެވެ.