ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓްގެ ދެ އެޕާޓްމެންޓް އަތުލުމަށް އާބަންކޯ އިން ނިންމި ނިންމުން ހުއްޓުވަން އެދެފްލެޓްގެ ވެރިން ސިވިލް ކޯޓަށް ދިއުމުން  އެގޮތަށް އަމުރު ނެރެނުދެވޭނެ ކަމަށް ސިވިލްކޯޓުން ބުނެފިއެވެ.

އެ މައްސަލާގައި އެ ދެފްލެޓްގެ ވެރިން ސިވިލް ކޯޓުގައި އެދިފައިވަނީ  އެއްބަސްވުން ބާތިލްކޮށް، އެޕާޓްމެންޓްތައް އަތުލަން އާބަންކޯއިން ނިންމި ނިންމުން ބާތިލްކުރުމަށް، ކޯޓަށް ހުށަހަޅަން ގަސްދު ކުރާތީ އެ މައްސަލަ ނިމެންދެން، އެތަން އަތުލުން މަޑުޖައްސާލުމުގެ ވަގުތީ އަމުރެއް ނެރެދިނުމަށެވެ.

ނަމަވެސް އިއްޔެ ސިވިލް ކޯޓުން ބުނެފައިވަނީ އެ ތަން އަތުލީ ގޯސްކޮށް ކަމަށް ކޯޓުން ނިންމާ ހާލަތުގައި ވެސް ނަތީޖާއަކަށް ވާނީ އެތަން އަނބުރާ ހަވާލުކުރަން އެންގުން ކަމަށެވެ. އެހެންވެ، އަމުރެއް ނުނެރުނަސް، އިއާދަ ނުކުރެވޭނެ ގެއްލުންތަކެއް ލިބޭނެ ކަމަށް ނުބެލެވޭ ކަމަށް އެ ނިންމުމުގައިވެ އެވެ.

ފާއިތުވު މެއި މަހުގެ 18 ވަނަ ދުވަހު އެ ދެފްލެޓްގެ އެއްބަސްވުން ބާތިލްކޮށް 14 ދުވަހުގެ ތެރޭގައި އެ ދެފްލެޓް ހުސްކުރުމަށް އާބަންކޯއިން ވަނީ އަންގާފައެވެ.

ހިޔާ އިމާރާތެއްގެ ފްލެޓެއްގެ ފާރު ތަޅާލައި ދެ އެޕާޓްމެންޓް އެއްކޮށްލައިގެން ހަތަރު ކޮޓަރީގެ އެޕާޓްމެންޓަކަށް ހަދައިގެން އުޅެމުންދާކަން އެނގިގެން އާބަންކޯއިން ވަނީ، ކޮންމެ އެޕާޓްމެންޓެއް 100،000 ރުފިޔާއިން ޖޫރިމަނާކޮށް 10 ދުވަހުގެ ތެރޭގައި ފާރު އަލުން ރޭނުމަށް އެފަރާތައް އަންގައިފައެވެ.

އާބަންކޯގެ ޑިރެކްޓަރ އޮފް މާކެޓިންގ އެންޑް ޕަބްލިކް ރިލޭޝަންސް ނިއުޝާދު ޝަރީފް "ވޮއިސް" އަށް އެދުވަހު ވިދާޅުވީ އެ ފަރާތުން އެއްވެސް ވަރަކަށް ޖޫރިމަނާގެ ފައިސާ ދައްކާފައި ނުވާ ކަމަށެވެ. އަދި ދިން މުއްދަތުގެ ތެރޭގައި ފާރު ރޭނުމުގެ މަސައްކަތްވެސް ކޮށްފައި ނުވާކަމަށެވެ.

އަދި އެއްވެސް ވަރަކަށް ފައިސާ ދައްކައި ފައި ނުވާތީ ދެފްލެޓްގެ ވެސް އެއްބަސްވުން ބާތިލް ކޮށް 14 ދުވަސް ތެރޭގައި ފްލެޓް އަނބުރާ އާބަންކޯ އާއި ހަވާލު ކުރުމަށް އަންގައިފައިވާ ކަމަށެވެ.

"އެންމެފަހުގެ ނިންމުން ފްލެޓް އަތުލުން އެއީ، މި ކޭސްގަ ވާގޮތަކީ ކުލިވެސް ދައްކާފަ ނެތީ، ވަރަށް ބޮޑު ބަދަލެއް އެ އެޕާޓްމެންޓަށް ގެނެސްފަ މިހުރީ، ފައިސާ ނެތިގެން ނޫންކަން އެނގޭ ކުލި ނުދައްކާ ހުރީ، މިއަކަށް ނެތް އަޅުގަނޑުމެންނަކަށް ލުޔެއް ދެވޭކަށް، އެހެންވެ ކޮންޓްރެކްޓް ބާތިލް ކުރީ" ވޮއިސް އަށް މައުލޫމާތު ދެއްވަމުން ނިއުޝާދު ވިދާޅުވިއެވެ.

ދެފްލެޓް އެއްކޮށްލި މައްސަލައިގައި އާބަންކޯއިން ނިންމައިފައި ވަނީ އެ ކުންފުނިން ދިން މުއްދަތުގައި ފާރު ނުރޭނުމާއި ޖޫރިމަނާގެ ފައިސާ ނުދައްކައި ހުރުމުން އެއްބަސްވުން ބާތިލް ކުރުމަށެވެ. ނަމަވެސް ފްލެޓްގެ ކުރީގެ ވެރިން އަދިވެސް މަސައްކަތް ކުރަމުންދަނީ އެތަން އެގޮތަށް ބާއްވައި، ފްލެޓްތައް އާބަންކޯއަށް ނުނެގޭނެ ގޮތެއް ހެދުމަށެވެ.