އިސްލާމީ މުޖްތަމަޢު ބިނާ ކުރެވެންވާނީ ތެދުގެ މަތީގައި ކަމަށް މިއަދުގެ ހުކުރު ޚުޠުބާގައި ބުނެފިއެވެ.

"އިންސާނުންނަށް އެބައިމީހުންގެ ހަޔާތް ބިނާކުރުމަށް އަންގަވާފައިވަނީ، ޙައްްޤުގެ މަތީގައި، ހައްޤުނޫން ބަހެއް ނުބުނުމަށާއި، ޙައްޤުނޫން ކަމެއް ނުކުރުމަށް މާތް ﷲ އެބައިމީހުންނަށް އަންގަވާ،  މިހެންވެ މުސްލިމުންގެ ޙަޔާތުގައި، ތެދުވެރިވުމަކީ ވަރަށް މުހިންމު ކަމެއް، އިސްލާމީ މުޖްތަމަޢު ބިނާ ކުރެވެން ވާނީ ތެދުގެ މަތީގައި، ދޮގު ވާހަކަތައް ހެދުމާއި އެފަދަ ވާހަކަތައް ފެތުރުމުން އެއްކިބާވެގެން، ތަފާތު ގުޅުންތައް ގާއިމް ކުރެވޭނީ ތެދު ހަޤީޤަތުގެ މަތީގައި" ޚުޠުބާގައި ބުނެފައިވެއެވެ.

ޚުޠުބާގައި ބުނީ އިސްލާމްދީން ހައްޤަށް ކުރާ އިޚްތިރާމެއްގެ ބޮޑުކަމުން، އެދީން ދޮގުވެރިންނާއި ދެކޮޅަށް ހަނގުރާމަ ކުރާ ކަމަށެވެ. ދޮގުވެެރި ކަމަކީ، ދޮގުހަދާމީހާގެ އަޑިނުބައިކަން ހާމަކޮށްދޭ ސިފައެއް ކަމަށާއި، އެއީ ނުބައި ކަންތައްތަކަށް މީހާ ހުށައެޅޭ ކަމެއް ކަމަށް ޚުޠުބާގައި ބުނެފައިވެއެވެ.

ޚުޠުބާގައި ބުނީ ނުބައި ބައެއް ސިފަތަކަކީ ފަރުވާ ދެވިދާނެ ސިފަތައް ކަމަށެވެ. ނަމަވެސް ދޮގުހެދުމާއި، އޮޅުވައިލުމުގެ މަތީގައި ދިރިއުޅޭ މީހުންނަށް އެކަމުގެ ފަރުވާއެއް ނެތްކަމަށް ވެސް ޚުޠުބާގައި ބުންޏެވެ.

 ދޮގުގެ ސަބަބުން ލިބޭ ގެއްލުން ބޮޑު ވާވަރަކަށް އެކަމުގެ ފާފަބޮޑުވާނެ ކަމަށް ޚުޠުބާގައި ބުނެފައިވެއެވެ. އަދި ހަދައިގެން ދޮގު ޚަބަރު ފަތުރާ ނޫސްވެރިޔާއާއި، ދޮގުވާހަކަ ޓްވީޓްކުރާމީހާއާއި، އަމިއްލަ އެދުމެއް ހާސިލް ކުރުމަށްޓަކައި، ވާހަކަތައް ހަދަހަދައިގެން ފަތުރާ މީހާއާއި، އަމިއްލަ މަޤްޞަދަކަށްޓަކައި، މީހުންގެ ވާހަކަތައް ވެރިންގެ ގާތުގައި ދައްކާ މީހާއާއި، ދޭތެރެ ޖައްސާ މީހާ އެއަރައިގަންނަނީ ވަރަށް ބޮޑު ފާފައަކަށް ކަމަށް ޚުޠުބާގައި ބުނެފައިވެއެވެ.

އިސްލާމް ދީނާއިބެހޭގޮތުން ދޮގު ހެދުމަކީ، އެންމެ ބޮޑެތި މުންކަރާތް ތަކުގެ ތެރޭގައި ހިމެނޭކަމެއް ކަމަށް މިއަދުގެ ޚުޠުބާގައި ބުނެފައިވެއެެވެ. ކީރިތި ﷲ އަށް ނުވަތަ ކައު އިތުރު މާތް ރަސޫލާ ޞައްލަﷲ ޢަލައިހި ވަސައްލަމަ އަށް ނިސްބަތްކޮށް ހަޤީޤަތާއި ޚިލާފު ވާހަކަ ދެއްކުމަކީ، ބިރުވެރި ކަމެއް ކަމުގައި ޚުޠުބާގައި ބުންޏެވެ.

އަދި ދީނުގެ ނަމުގައި ވާހަކަ ދައްކާ މީހުން ތެދު ބުނުމަށް ވަރަށް ބޮޑަށް  ސަމާލުކަން ދޭން ޖެހޭނެ ކަމަށް ޚުޠުބާގައި ވަނީ ބުނެފައެވެ. އަދި މާތް ﷲ ބަސްފުޅެއް އެކަނލާންގެއަށް ނިސްބަތް ކުރުމަކީ އެމީހަކަށް ނަރަކަ ޙައްޤުވާނޭ ފަދަ ބޮޑު ފާފައެއް ކަމަށްވެސް މިއަދުގެ ޚުޠުބާގައި ބުނެފައިވެއެވެ.