ސިޔާސީ ޕާޓީގެ އެއްގެ މެމްބަރަކަށް ވުމަށް ފޯމު ހުށަހަޅާ ފަރާތުގެ ނަންބަރަށް އެ ފަރާތް ޕާޓީއަކަށް ވެއްދުމަށް ހުށަހަޅާފައިވާކަން ބަޔާންކޮށްދޭ މެސެޖެއް ފޮނުވާ ގޮތަށް ސިޔާސީ ޕާޓީގެ ގަވައިދު އިސްލާހު ކޮށްފިއެވެ.

އެގޮތުން ބުދަ ދުވަހު ސަރުކާރުގެ ގެޒެޓުގައި ޝާއިއު ކޮސްފައިވާ ސިޔާސީ ޕާޓީގެ ގަވައިދުގެ 6 އިސްލާހުގައި ބުނެފައިވަނީ، އަލަށް އުފެއްދުމަށް އެދި ހުށަހަޅާ ޕާޓީގެ މެންބަރަކަށް ވުމަށް އެދޭ ފޯމުގައި މެމްބަރަކަށް ވުމަށް އެދޭ ފަރާތުގެ ފޯން ނަންބަރަށް އިލެކްޝަންސް ކޮމިޝަން (އީސީ) އިން އެސްއެމްއެސް އެއް ފޮނުވަން ވާނެ ކަމަށެވެ.

މި އެސްއެމްއެސްގައި އެފަރާތް ސިޔާސީ ޕާޓީއަކަށް ވެއްދުމަށް އެދި ހުށަހަޅައިފައިވާކަން އީސީއިން ބަޔާންކޮށްދީފައިވާނެ ކަމަށް އިސްލާހުގައި ވެއެވެ.

މިއާއިއެކު މި މެސެެޖަށް 7 ދުވަހުގެ ތެރޭގައި އެ ފަރާތުން ޖަވާބުދާރީ ވާން ޖެހޭނެ ކަމަށް ވަނީ ބުނެފައެވެ. ނަމަވެސް ޖަވާބުދާރީ ނުވެއްޖެނަމަ ކަން ކުރާނެ ގޮތެއް ބަޔާންކޮށްފައެއް ނުވެއެވެ.

މި އިސްލާހުގެ އިތުރުން ޕާޓީތަކުގެ މެންބަރުންނަށް ހުށަހަޅާ ފޯމްއާއި، މި ފޯމްތަކަށް ޝަކުވާ ހުށަހެޅުމާ ބެހޭ އުސޫލުތަކަށް ވެސް ވަނީ އިސްލާހު ގެނެސްފައެވެ.

އެގޮތުން ހުށަހަޅާފައިވާ ފޯމްގެ ސައްހަކަން ދެނެގަތުމަށްޓަކައި ޝަކުވާ ހުށަހެޅުމުގެ ފުރުސަތު ދިނުމަށް ފޯމް ހުށަހަޅާ ފަރާތްތަކުގެ ލިސްޓު ހަފްތާއެއްގެ މުއްދަތަކަށް އީސީ ގެ ވެބްސައިޓްގައި މި އިސްލާހުގެ ދަށުން އާންމުކުރާނެއެވެ.

އަދި މި ލިސްޓުގައިވާ ނަމަކާއި ގުޅިގެން ހުށަހަޅާ ޝަކުވާއަކީ ސައްހަ ޝަކުވާ އެއް ކަަމަށްވާނަަމަ މި ފޯމް ބާޠިލްކޮށް ސިޔާސީ ޕާޓީއަށް އެކަން އިސީއިން އަންގާނެއެވެ.

މިއާއިއެކު ސިޔާސީ ޕާޓީއަކުން ހުށަހަޅާ ސައްހަ ނޫން ފޯމަކާއި ގުޅިގެން އީސީއިން އެ މައްސަލަ ބެލުމަށްފަހު ސައްހަ ނޫން ފޯމު ހުށަހެޅި ޕާޓީއާއި މެދު ސިޔާސީ ޕާޓީގެ ގަވައިދުގެ އުސޫލުތައް ތަންދޭ މިންގަނޑުގެ ތެރެއިން އީސީ އިން ފިޔަވަޅު އަޅާނެ ކަމަށްވެސް އިސްލާހުގައި ވަނީ ބަޔާންކޮށްފައެވެ.

މީގެ އިތުރުން ރައްޔިތުން މަޖްލިސްގެ މެންބަރަކު ރާއްޖޭގެ ސިޔާސީ ޕާޓީއެއްގައި ދަފުތަރުވުމަށް ނުވަތަ ޕާޓީ ބަދަލު ކުރުމަށް ހުށަހަޅާ ފޯމް އަވަހަށް ޕްރޮސެސްކުރެވޭނެ ގޮތެއް ވެސް އިސްލާހާއިއެކުު ވަނީ ހަދާފައެވެ. މިގޮތަށް އަވަށް ކުރުމަށް މަޖްލިސް މެންބަރަކު ހުށަހަޅައިފިނަމަ 1 ދުވަހުގެ ތެރޭގައި މިކަން ކޮށްދޭން ޖެހެއެވެ.