ގޭބިސީގައި ހިމެނޭ ސާވިސް މީޓަރަށް ކުނި އުކާލުމުގެ ފީ ހިމެނިފައިވާނަމަ، ލަސް ނުކޮށް އެކްސްކްލޫޝަން ފޯމް ހުށައެޅުމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އެދިއްޖެއެވެ.  

ވެމްކޯއިން ބުނެފައިވަނީ މިފެށުނު ޖޫން މަހުގެ ކަރަންޓު ބިލް، މާލޭގެ ގޭބިސީތަކަށް އަންނާނީ ވެމްކޯގެ ބިލާއިވެސް އެކުގައި ކަމަށެވެ.

މާލެ ސަރަހައްދުގެ ގޭބިސީ ތަކަށް ސްޓެލްކޯގެ ބިލާއި ވެމްކޯގެ ބިލް އެކުވެގެން އަންނައިރު ކުނިއުކާލުމުގެ ފީ ބިލް ކުރާނީ އިމާރާތެއްގައި ހިމެނޭ ކަރަންޓު މީޓަރުތަކަށެވެ.

އިމާރާތުގައި ހިމެނޭ މީޓަރުތަކުގެ ތެރެއިން ލިފްޓް އަދި ކޮމަން އޭރިއާ ތަކަށް ޚިދުމަތްދޭ މީޓަރުތަކުން މީޓަރަކަށް ބިލް ކުރެވިފައިވާނަމަ އެކުންފުނީގެ ވެބްސައިޓް މެދުވެރިކޮށް އެކަން އަންގައިދިނުމަށް މެވްކޯއިން ވަނީ އެދިފައެވެ. ލިފްޓް އަދި ކޮމަން އޭރިއާތަކަށް ބޭނުންކުރާ ކަރަންޓު މީޓަރުތަކަކީ ސަރވިސް މީޓަރުތަކެވެ.

ވެމްކޯއިން ދެމުންދާ ކުނި އުކާލުމުގެ ޚިދްމަތުގެ ފީ ސްޓެލްކޯގެ ކަރަންޓު ބިލްގައި ހިމަނަން ނިންމައި ދެ ކުންފުނިން ވަނީ އެއްބަސްވުމެއްގައި ސޮއިކޮށްފައެވެ.

މީގެ ކުރިން ވެމްކޯއިން ބުނެފައިވަނީ ސްޓެލްކޯ ބިލުގެ ތެރޭގައި ކުނި ބިލު ހިމަނާއިރު ސްޓެލްކޯގައި ރަޖިސްޓްރީކޮށްފައިވާ 50،000 އަށް ވުރެ ގިނަ ގޭބިސީއަށް ކުނީގެ ބިލް ފޮނުވާނެކަމަށެވެ. މިހާރު ވެމްކޯގައި ރަޖިސްޓްރީކޮށްފައިވަނީ 24،000 ގޭބީސީއެކެވެ.

ވެމްކޯއިން ދޭ ކުނި އުކާލުމުގެ ޚިދުމަތަށް ނެގުމަށް ހަމަޖެހިފައިވަނީ 150 ރުފިޔާގެ ފީއެކެވެ.

ވެމްކޯއިން ދޭ ކުނި އުކާލުމުގެ ޚިދުމަތުގެ ފީ ސްޓެލްކޯގެ ބިލާއި އެއްކޮށްލުމަށް އެކުންފުނިން ނިންމާފައިވަނީ ފީގެ ގޮތުގައި އެކުންފުންޏަށް ލިބެންޖެހޭ ބޮޑު ޢަދަދެއް ނުލިބިވާތީއެވެ.