އައްޑޫސިޓީ ގެ ބޮޑެތި މަޝްރޫޢުތައް ފައްޓައި ދިނުމާއި، އިފްތިތާޙް ކުރުމަށް އިންޑިޔާގެ ވަފުދެއް އައްޑޫސިޓީއަށް ވަޑައިގަތުމަށް ހަމަޖެހިއްޖެއެވެ.

އައްޑޫއަށް ވަޑައިގަންނަވާ އިންޑިޔާގެ ވަފުދުގެ އެންމެ އިސް ވެރިއެއްގެ ގޮތުގައި ބައިވެރިވެ ވަޑައިގަންނަވާނީ އިންޑިޔާގެ އެކްސްޓާނަލް އެފެއާޒް އެންޑް ޕާލިމެންޓަރީ އެފެއާޒްް ގެ ސްޓޭޓް މިނިސްޓަރ ވީ މުރަލީދަރަންއެވެ. 

އައްޑޫސިޓީ އަށް ވަޑައިގަތުމަށް ހަމަޖެހިފައިވާ އިންޑިޔާގެ ވަފުދުގެ ބޭފުޅުންވަނީ މިއަދު މެންދުރު ރާއްޖެ ވަޑައިގެންފައެެވެ. އިންޑިޔާ ސަރުކާރުގެ ވަފުދަށް މަރުޙަބާ ދަންނަވާފައިވަނީ އިންޑިޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރްއެވެ.

ރާއްޖެ ވަޑައިގެން ސްޓޭޓް މިނިސްޓަރ ވީ މުރަލީދަރަން ކުރެއްވެވި ޓްވީޓުގައި ވިދާޅުވެފައިވަނީ ރާއްޖޭގެ ޢިއްޒަތްތެރިންނާއި އިންޑިޔާގެ ރައްޔިތުންނާއެކު ރޭވިފައިވާ ރަސްމީ ބައްދަލުވުންތަކަށް އިންތިޒާރުކުރައްވާ ކަމަށެވެ. އަދި އިންޑިޔާ ސަރުކާރުގެ އެހީގައި އައްޑޫގައި ކުރިއަށްދާ ގިނަ މަޝްރޫޢުތަކެއްގެ ބިންގާއެޅުމާއި އިފްތިތާޙުކުރުމަށް އިންތިޒާރުކުރައްވާ ކަމަށްވެސް އެމަނިކުފާނު ވިދާޅުވެފައިވެއެވެ.

އިންްޑިޔާގެ ސްޓޭޓް މިނިސްޓަރ އައްޑުއަށް މިކުރައްވާ ޒިޔާރަތުގައި ގަން އިންޓަރނޭޝަލް އެއަރޕޯޓުގެ ބިންގާއަޅުއްވައި ދެއްވާނެއެވެ. އަދި އައްްޑޫ ސިޓީގެ ބިންހިއްްކުމުގެ މަޝްރޫޢު ފައްްޓަވައި ދެއްވާނެއެވެ.

މުރަލީދަރަން އައްޑުއަށް މިކުރައްވާ ޒިޔާރަތުގައި އިންޑިޔާގެ ގްރޭންޓް ގެ ދަށުން ކުރިއަށް ގެންގޮސްފައިވާ ތަރައްޤީގެ ބައެއް މަޝްރޫޢުތައް ފައްޓަވައިދެއްވާނެއެވެ.

އިންޑިޔާގެ ސްޓޭޓް މިނިސްޓަރގެ މި ދަތުރުފުޅުގައި ރައީސް އިބްރާހިމް މުޙައްމަދު ޞާލިޙާއި ބައްދަލުކުރައްވުމަށް ވަނީ ހަމަޖެހިފައެވެ. މިބައްދަލުކުރުމުގައި ދެޤައުމުގެ ދެމެދުގައި އެއްބަސްވުންތަކެއްގައި ސޮއިކުރެވިގެންދާނެއެވެ.

ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙް ވެސް މިއަދު އައްޑު އަށް ވަޑައިގަތުމަށް ވަނީ ހަމަޖެހިފައެވެ.

މިއަހަރުގެ މެއި މަހުގެ 1ވަނަ ދުވަހު އިންޑިޔާގެ ޑިފެންސް މިނިސްޓަރ ރާޖްނާތް ސިންހް ވެސް ވަނީ ރާއްޖެެއަށްް 3 ދުވަހުގެ ޒިޔާރާތެއް ކުރައްވާފައެވެ. ރާޖްނާތް ސިންހް ގެ މިދަތުރުފުޅުގަައި ރާއްޖޭގެ ޑިފެންސްް މިނިސްޓަރ އަލްއުސްތާޒާ މާރިޔާ އަހްމަދްް ދީދީ އާއި ބައްދަލުކުރައްވައި ދެޤައުމުގެ ޑިފެންްސް ސެކޔުރިޓީގެ ކަންކަން ވަރުގަދަ ކުރުމާއި މެދު މަޝްވަރާ ކުރައްވާފައިވެއެެވެ.