ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯން ފައިނަލްގައި މިއަދު ހަވީރު 3-2 ގެ ނަތީޖާއަކުން ބަނޑޮސް ބަލިކޮށް ރީތިރަށުން މުބާރާތުގެ ޗެމްޕިއަންކަން ހަތަރުވަނަ ފަހަރަށް ހޯދައިފިއެވެ.

ދެޓީމުގެ ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅުނު ފޯރިގަދަ ފައިނަލް މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މެޗުގެ ފުރަތަަމަ ހާފު ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ނަމަވެސް ދެވަނަ ހާފު ފެށިގެން ތިންވަނަ މިނެޓުގައި ރީތިރަށުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މިއީ އެޓީމަށް ލިބުނު ކޯނަރަކުން ރީތިރަށުގެ ނާފިއު ގޯލު ކުރިމައްޗަށް ހުރަސްކޮށްދިން ބޯޅައެއް ދިފާއުކުރަން އުޅުމުގެ ތެރޭގައި ބަނޑޮހުގެ ކެޕްޓަން ރީހާން އަތުން ބައިކޮޅަށް ވަން ލަނޑެކެވެ.

ރީތިރަށުގެ ދެވަނަ ލަނޑު މެޗުގެ 25 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ނަބީލް އެވެ. މިއީ ބަނޑޮހުގެ ޕެނަލްޓީ އޭރިއާ ބޭރުން ލިބުނު ބޯޅައެއް މުޅިން ހުސްކޮށް ހުރެ ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ރީތިރަށުން ދެ ލަނޑުގެ ލީޑެއްގައި ވަނިކޮށް ބަނޑޮހުގެ އަހުމަދު ޝަމީމް ވަނީ ދެވަނަ ހާފުގެ 30 ވަނަ މިނެޓުގައި ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްދީފައެވެ. މިއީ ރީތިރަށުގެ ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި ފޮނުވާލި ބޯޅަ ގޯލުގެ އަރިމަތީ ދަނޑީގައިޖެހިފައި ބޭރަށް ނިކުތް ވަގުތު ވަރަށް ހަމަޖެހިލާފައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. 

ރީތިރަށުން މި މެޗުގައި ކާމިޔާބުކުރި ތިންވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ގައިދު ގާސިމް އެވެ. މިއީ އެޓީމުގެ ނާފިއު މުޅިން ހުސްކޮށްލާފައި ޖައްސާލި ބޯޅައެއް ކީއްޕަރަށް އެއްވެސް ފުރުސަތެއް ނުދީ ތިރިތިރިން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ނަމަވެސް މެޗު ނިމުމުގެ ކުރިން ބަނޑޮހުން ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 3-2 އަށް ބަދަލުކޮށްފައެވެ. މި ލަނޑު ދެވަނަ ހާފުގެ އިތުރު ވަގުތުގެ އެންމެ ފަހު މިނެޓްގައި ކާމިޔާބުކޮށްދިނީ މުހައްމަދު އިކްރާމް އެވެ. މިއާއެކު މެޗުގެ ކުޅުން ނިމިގެންދިޔައީ 3-2 ގެ ނަތީޖާއަކުން ރީތިރަށް ކުރީގައި އޮވެގެންނެވެ. 

ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ރީތިރަށުގެ މުހައްމަދު ނާފިއު އެވެ. މުބާރާތުގެ އެންމެ ގިނަ ގޯލްޖެހި ކުޅުންތެރިއަކަށް ހޮވުނީ ކޮއްދިއްޕަރުގެ އަހުމަދު ނައުޝާދު އެވެ. އޭނާ ވަނީ މި މުބާރާތުގައި 09 ލަނޑު ކާމިޔާބުކޮށްފައެވެ.

މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ މުހައްމަދު ނާފިއު (ރީތިރަށް), އަހުމަދު ފިރާޝް (ބަނޑޮސް), އަހުމަދު ނަބީލް (ރީތިރަށް), އަހުމަދު ޝަމީމް (ބަނޑޮސް), އިތުރުން އަހުމަދު ނާޖިހު (ރީތިރަށް) އެވެ. އަދި މުބާރާތުގެ އެންމެ މޮޅު ކޯޗަކަށް ހޮވުނީ ރީތިރަށުގެ ކޯޗު  އަހުމަދު އަހުސަން އެވެ.

މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ރީތިރަށުގެ ސަމްހާން އަބްދުއް ރަހުމާން އެވެ.