އައްޑޫސިޓީގެ މުސްތަގުބަލަށް އުޖާލާކަން ފެންނަން ފެށީ އަދިކިރިޔާ ކަމަށް އައްޑޫ މޭޔަރު އަލީ ނިޒާރު ވިދާޅުވެއްޖެއެވެ.
ނިޒާރު މިހެން ވިދާޅުވީ އައްޑޫ ސިޓީ ބިން އިތުރު ކުރުމުގެ މަޝްރޫއު އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ނިޒާރު ވިދާޅުވީ އައްޑޫސިޓީގެ ބިމަށް 198 ހެކްޓަރުގެ ބިން އިތުރު ކުރެވޭނެ ކަމަށާއި އައްޑޫގެ އިގްތިސާދު ބިނާ ކުރުމަށްޓަކާ މި ބިންތައް ބޭނުން ކުރާނެ ކަމަށެވެ.
"އުމުރުގެ މިހާހިސާބަށް އައިއިރު އަޅުގަނޑަށް އަދިކިރިޔާ އައްޑޫސިޓީގެ މުސްތަގުބަލަށް އުޖާލާކަން ފެންނަން ފެށީ" ނިޒާރު ވިދާޅުވިިއެވެ.
މިއަދުގެ ޖަލްސާ ކުރިއަށް ދަނީވެސް ހިއްކި ބިމުގައިކަން ފާހަގަ ކުރައްވައި ނިޒާރު ވިދާޅުވީ އައްޑޫ ބިން ހިއްކުމަކީ ވެ ނިމިދާ ކަމެއް ކަމަށެވެ.
ހިއްކި ބިން ހެޔޮގޮތުގައި ބޭނުން ކުރުމަށްޓަކައި އަންނަ މަހު މަރަދޫ، މަރަދޫފޭ ގެ ރައްޔިތުންނާ މަޝްވަރާކުރަން ފަށާނެ ކަމަށް ނިޒާރު ވިދާޅުވިއެވެ.
އަދި ބިން ހިއްކާ ނިމޭއިރަށް ބިމުގެ ޕްލޭންގެ މަސައްކަތް ފަށާނެ ކަމަށް ނިޒާރު ވިދާޅުވިއެވެ. އެގޮޮތުން އޮގަސްޓް މަހުގެ ތެރޭގައި ޕްލޭން ކުރަން ފަށާނެ ކަމަށް ނިޒާރު ފާހަގަ ކުރެއްވިއެވެ.
މި އަހަރު ނިމުމުގެ ކުރިން ބިމުގެ ޕްލޭން ނިންމާ، މަރަދުއާއި މަރަދޫގެ ރައްޔިތުންނަށް މި ބިން ބޭނުން ކުރުމަށްޓަކާ ހުށަހަޅަން ޖެހޭ ތަކެތި ހުށަހެޅުމުގެ މަސައްކަތް ފަށާނެ ކަމަށް ނިޒާރު ވިދާޅުވިއެވެ.
މީގެ އިތުރުން ނިޒާރު ވިދާޅުވީ، ކޮވިޑްގެ ސަބަބުން އައި ދަތި ދެ އަހަރާއެކުވެސް، އައްޑޫގެ ތަރައްގީއަށް ހަ ބިލިއަނަށްވުރެ ގިނަ ރުފިޔާ މި ސަރުކާރުން ހޭދަކޮށްފި ކަމަށެވެ.
Advertisement
This content is created and paid for by advertisers and does not involve Voice Journalists
