ފްރާންސް ލީގުގައި ރޭ ޗެންޕިއަން ޕީއެސްޖީ އަމިއްލަ ދަނޑުގައި ކްލަރމޮންޓް އާއި ދެކޮޅަށް ކުޅުނު މެޗު 3-2 ގެ ނަތީޖާއަކުން އެޓީމު ބަލިވެއްޖެ އެވެ.

ރޭގެ މެޗަކީ އެޓީމަށް ކުޅެމުންއަންނަ އާޖެންޓީނާގެ ކެޕްޓަން ލަޔޮނަލް މެސީ ޕީއެސްޖީގެ ޖާޒީގައި ކުޅޭނެ ފަހު މެޗެވެ. މި ސީޒަން ނިމުމުން މެސީ އެކުލަބު ދޫކޮށް ދާނެކަން ޕީއެސްޖީ އިން ވަނީ ޔަގީންކޮށްދީފައެވެ.

ރޭގެ މެޗަށް ނިކުތް އިރުވެސް ޗެންޕިއަންކަން ކަށަވަރުވެފައިވާ ޕީއެސްޖީ އިން ފުރަތަަމަ ހާފުގެ ވަރަށް ކުރީކޮޅު ދެ ލަނޑުގެ ލީޑެއް ހޯދިއެވެ. އެޓީމުގެ ފުރަތަަމަ ލަނޑު ސްޕެއިންގެ ތަޖުރިބާކާރު ޑިފެންޑަރު ސާޖިއޯ ރާމޯސް ފުރަތަަމަ ހާފުގެ 16 ވަނަ މިނެޓުގައި ކާމިޔާބުކޮށްދިން އިރު، މިއީ ޕީއެސްޖީގެ ޖާޒީގައި ރާމޯސް ވެސް ކުޅުނު ފަހު މެޗެވެ.

Advertisement

މި ސީޒަން ނިމުމުން ރާމޯސް ޕީއެސްޖީ އާއެކު ހަދާފައިވާ އެއްބަސްވުން ހަމަވާއިރު، ރާމޯސްގެ އެއްބަސްވުން އައު ނުކުރުމަށް އެކުލަބުން ވަނީ ނިންމާފައެވެ.

ރޭގެ މެޗުގައި ޕީއެސްޖީގެ ދެވަަނަ ލަނޑު ފުރަތަަމަ ހާފުގެ 21 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ކެޕްޓަން ކިލިއަން އެމްބާޕޭ އެވެ. މިއީ މިސީޒަނުގައި ލީގުގައި ކުޅުނު 34 މެޗުގައި އެމްބާޕޭ ކާމިޔާބުކުރި 29 ވަނަ ލަނޑެވެ.

ކްލަރމޮންޓް އިން މި މެޗުގައި ކާމިޔާބުކުރި ފުރަތަމަ ލަނޑު 24 ވަނަ މިނެޓުގައި ކާމިޔާބުކޮށްދިނީ އެޓީމުގެ ފްރާންސް މިޑްފީލްޑަރު ޔޯހާން ގަސްޓިއަން އެވެ އަދި މެޗުގެ ނަތީޖާ އެއްވަރުކުރުމަށް ފުރަތަމަ ހާފުގެ 37 ވަނަ މިނެޓުގައި އެޓީމަށް ވަނީ ރަނުގެ ފުރުސަތެއް ލިބިފައެވެ. އެއީ ޕީއެސްޖީގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ އެޓީމަށް ދިން ޕެނަލްޓީއެކެވެ. ނަމަވެސް އެޓީމުގެ ފުރާންސް ފޯވާޑް ގްރެޖޯން ކާއީ ފޮނުވާލި ޕެނަލްޓީ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ. 

ނަމަވެސް ފުރަތަމަ ހާފު ނިމުމުގެ ކުރިން ކްލަރމޮންޓް އިން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މި ލަނޑު އެޓީމަށް ކާމިޔާބުކޮށްދިނީ އަލްޖީރިއާގެ ޑިފެންޑަރު މެހްދީ ޒެފެއިން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި މެޗުން ކްލަރމޮންޓް މޮޅުވި ލަނޑު ދެވަނަ ހާފުގެ 63 ވަނަ މިނެޓުގައި ކާމިޔާބުކޮށްދިނީ ފުރާންސް ފޯވާޑް ގްރެޖޯން ކާއީ އެވެ.

މި މެޗުން ބަލިވި ޕީއެސްޖީ ލީގުގައި ކުޅުނު 38 މެޗުން އެޓީމަށް 85 ޕޮއިންޓް ލިބިފައިވާއިރު، ލީގުގެ ދެވަނަ ހޯދި ލެންސް އަށް 38 މެޗުން ލިބިފައިވަނީ 84 ޕޮއިންޓެވެ. އަދި މި މެޗުން ލިބުނު ތިން ޕޮއިންޓާއެކު ކްލަރމޮންޓް އިން ސީޒަން ނިންމާލިީ 38 މެޗުން ލިބުނު 59 ޕޮއިންޓާއެކު ލީގު ތާވަލުގެ 08 ވަނައިގައެވެ.