އައްޑޫ ސިޓީގައި މިރޭ ހަވާ އެރުވުމަށް އެ ސިޓީގެ ކައުންސިލުން ނިންމާފައިވާ ކަމަށް ރައީސް އޮފީހުން ބުނެފިއެވެ. 

ރައީސް އޮފީހުން ބުނީ، ސިޓީ ކައުންސިލުން މި ނިންމިން ނިންމާފައިވަނީ އެ ސިޓީއަށް އަންނަމުންދާ ތަރައްޤީ ފާހަގަކުރުމަށް ކަމަށެވެ. އަދި ހަވާ އެރުވުން އޮންނާނީ މިރޭ އައްޑޫ ސިޓީ ސްކެއާގައި ކަމަށެވެ. 

އައްޑޫ ސިޓީގެ ތަރައްޤީއަށް ހިންގޭ ބައެއް މަޝްރޫޢުތައް ފަށްޓަވައި ދެއްވައި، އަދި މިހާރު ކުރިޔަށްދާ ބައެއް މަޝްރޫޢުތަކުގެ މަސައްކަތްތައް ބައްލަވައި ލެއްވުމަށް އިއްޔެގެ ވަގުތެއްގައި ރައީސް ޞާލިހު އެ ސިޓީއަށް ވަނީ ވަޑައިގެންފައެވެ. މިގޮތުން، އައްޑޫ ސިޓީގެ ބިން އިތުރުކުރުމުގެ މަޝްރޫޢު އިއްޔެ ވަނީ ފައްޓަވައި ދެއްވާފައެވެ.

Advertisement

މީގެ އިތުރުން މިދަތުރުގެބތެރެއިން އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓެއްގެ ގޮތުގައި ތަރައްޤީކުރެވުނު ފޭދޫ ދިގިހެރާ ޓޫރިޒަމް ޒޯން ވެސް އިއްޔެ ވަނީ އިފްތިތާހު ކޮށްފައެވެ. އިންޑިއާގެ މިނިސްޓަރ އޮފް ސްޓޭޓް ފޮރ އެކްސްޓަރނަލް އެފެއާޒް ވީ.މުރަލީދަރަން މި ޕްރޮޖެކްޓް އިފްތިތާހު ކުރުމުގައި ބައިވެރިވެވަޑައިގެންނެވިއެވެ. މި ޒޯންތަކާއެކު، އައްޑޫ ސިޓީއަށް އިޤްތިޞާދީ އާރޯކަމާއި ހަލުވި ތަރައްޤީ ގެނެވި، އައްޑޫ ސިޓީގެ ރައްޔިތުން ދެކެމުން އައި ހުވަފެން ހަޤީގަތަކަށްވެގެންދާނެކަމުގެ ޔަޤީންކަން ސަރުކާރުން އަރުވައެވެ.

މި ދަތުރުގެ ތެރެއިން ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު ވެސް ފެއްޓެވުމަށް ހަމަޖެހިފައިވާާއިރު، އައްޑޫ ސިޓީގެ މަގުތައް ހެދުމުގެ މަޝްރޫޢުގެ މަސައްކަތްތައް ކުރިޔަށްދާގޮތް އެމަނިކުފާނު ބައްލަވައި ލައްވާނެއެވެ.