މާޒީގައި އިވި ދިގުލައިގެން ދިޔަ އައްޑީ ސިޓީ ތަރައްޤީ ކުރުމުގެ އަޑު މަޑުކޮށް އެކަމަށް ބޭނުންވާ ކަންކަން މިކުރަނީ މިސަރުކާރުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ އައްޑޫސިޓީގެ ބިންހިއްކުމުގެ މަޝްރޫޢު ފައްޓަވައި ދެއްވުމަށް ބޭއްވުނު ރަސްމިއްޔާތުގައެވެ.

"ދުނިޔެއަށް ހުޅުވާލެވޭ ވަރުގަދަ ސިޓީ އަކަށް އައްޑޫ ސިޓި ހެދުމަކީ ތަކުރާރުކޮށް މާޒީގައި އިވުނު ދިގުލައި ދިޔަ އަޑެއް، އަޑު މަޑުކުރުމަށް ފަހު މިއަދު ސަރުކާރުން މިކުރަނީ އެކަމަށް ބޭނުންވާ ކަންކަން" ރައީސް ވިދާޅުވިއެވެ.

އައްޑޫ ސިޓީއަށް ބަދަލު އަންނާނީ، އައްޑޫގެ ބިމުގެ ބައްޓަން ބަދަލުކޮށްގެންކަން އަބަދުވެސް އެނގޭ ކަމަށް ރައީސް ވިދާޅުވިއެވެ. އަދި މިއަދު މިފެންނަނީ އޭގެ ޢަމަލީ މަންޒަރު ކަމަށާއި، އައްޑޫގެ ތާރީޚުގައި ހިންގޭ ބިމާގުޅޭ އެންމެބޮޑު މަޝްރޫޢު މިހާރު އެވަނީ މެކުހަށް ޖަހާފައި ކަމަށްވެސް އެމަނިކުފާނު ވިދާޅުވިއެވެ.

އައްޑޫސިޓީ ބިންހިއްކުމުގެ މަޝްރޫޢު ފެއްޓުމަށް ބޭއްވުނު ރަސްމިއްޔާތު އޮތީ އައްޑޫ މަރަދޫފޭދޫގައި އަލަށް ހިއްކި ސަރަހައްދުގައެވެ.

މި ރަސްމިއްޔާތުގައި ރައީސް ދެއްކެވި ވާހަކަފުޅުގައި އިތުރަށް ވިދާޅުވީ 1.5 ބިލިއަން ރުފިޔާގެ ހޭދަކޮށްގެން 190 ހެކްޓަރުގެ އިތުރުބިން އައްޑޫ އަށް އިތުރުވެގެންދާނެ ކަމަށެވެ.

އަދި ހަމަ އެއާއި އެކު އިތުރު މަޝްރޫޢެއްގެ ގޮތުގައި ހުޅުމީދޫ އަށް އިތުރުވާ 42 ހެކްޓަރުގެ ބިމަކީ އައްޑޫ ސިޓީ އަށް އިތުރުވާ ބިން ކަމަށާއި، އެއީ 179 މިލިއަން ރުފިޔާގެ މަޝަރޫޢެއް ކަމަށް ރައީސް ވިދާޅުވިއެވެ.

މިއީ ބިން ހިއްކުމުގެ މިހާ ބޮޑު މަޝްރޫޢެއް އައްޑޫގައި ކުރިއަށް ގެންދާ ފުރަތަމަ ފަހަރެވެ. އައްޑޫ އަކީ ރާއްޖޭގެ ދެވަނައަށް އެންމެ އާބާދީ ބޮޑު ސިޓީ އެވެ. އަދި ބިމާއި ތަރައްޤީގެ މަޝްރޫޢުތައް އައްޑޫސިޓީ އަށް ވަނީ އިންތިހާއަށް ބޭނުންވެފައެވެ.