އެކި ރަށްރަށުގެ މީހުން ގެންގޮސް އައްޑޫ ސްކޫލްތަކުގެ ކުދިންނާ ސަރުކާރު މުވައްޒަފުންގެ ހާޒިރީ ނަގައިގެން ހަތަރުފަސް ސަތޭކަ މީހުން ޖަމާކޮށް ދައްކާފައި %75 ވޯޓު ނަގާ ވާހަކަ ދެއްކުމުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެވާހަކަ ގަބޫލުކުރައްވާތީ އަޖައިބުވާ ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހަސަން ޝިޔާން ވިދާޅުވެއްޖެއެވެ. 

ޝިޔާން މިފަދައިން ވިދާޅުވެފައި ވަނީ ކުރިޔަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިޙަށް 75 އިންސައްތަ ވޯޓު ލިބޭނެ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވުމާއި ގުޅިގެން އެކަމަށް ރައްދު ދެއްވައި ކުރެއްވި ޓުވީޓެއްގައެވެ. 

އެގޮތުން ޝިޔާން ވިދާޅުވީ ރައީސް ޞާލިހަށް މަރުހަބާ ދަންނަވަން މާލެއިންނާ ފުވައްމުލަކުން މީހުން ގެންގޮސްފައިވާ ކަމަށެވެ. އަދި އޭގެ އިތުރުން އައްޑޫ ސްކޫލްތަކުގެ ކުދިންނާ ސަރުކާރު މުވައްޒަފުންވެސް ހާޒިރީ ބަލައިގެން ހަމަކޮށް ރައީސް ޞާލިހަށް މަރުހަބާ ދަންނަވަން ގެންގޮސްފައިވާ ކަމަށްވެސް ޝިޔާން ވިދާޅުވި އެވެ. 

Advertisement

އަދި އެފަދަ ގޮތަކަށް ހަތަރު ފަސްސަތޭކަ މީހުން ހަމަ ކޮށްފައި ރައީސް ޞާލިހަށް 75 އިންސައްތަ ވޯޓު ލިބިލައްވާނެއޭ ޝަރީފް ވިދާޅުވުމުން އެމަނިކުފާނު އެވާހަކަ ގަބޫލު ކުރައްވާތީ އަޖައިބުވާ ކަމަށްވެސް ޝިޔާން ވިދާޅުވި އެވެ.  

"އަޅެ މަރަދޫ ގެޔަކަށް ވަދެލާނަމަ އެނގޭނެ!" ޝިޔާން ވިދާޅުވި އެވެ. 

އައްޑޫސިޓީގެ މަރަދޫއާ ހަންކެޑަ ގުޅޭ ސަރަޙައްދުގައި ބޭއްވި ރަސްމިއްޔާތުގައި އައްޑޫސިޓީ ބިން އިތުރުކުރުމުގެ ބިޔަ މަޝްރޫޢު ރައީސް ޞާލިޙް ރަސްމީގޮތުން ފަށްޓަވައިދެއްވުމަށް ބޭއްވެވި ރަސްމިއްޔާރުގައި ވާހަކަދައްކަވަމުން ޝަރީފް މިދާޅުވީ މިއީ ރައީސް ޞާލިޙްގެ ތަސައްވުރުގެ ފެށުން ކަމަށެވެ. އަދި ރާއްޖޭގެ އެކި ރަށްރަށަށް އެމަނިކުފާނު ގެނެސްދެއްވި ތަރައްގީ ރައްޔިތުން ބަލައިގެންފައިވާ ކަމަށާއި ވޭތުވެދިޔަ 50 އަހަރުގައިވެސް ރައީސް ޞާލިޙް ފަދައިން ވެރިކަން ކުރެއްވި ބޭފުޅަކު ފެނިފައިނުވާ ކަމަށްވެސް އޭނާ ވިދާޅުވި އެވެ.

ޝަރީފް ވިދާޅުވީ ރައްޔިތުންގެ ފަރާތުން އެދުނު ކޮންމެ ކަމެއް ރައީސް ޞާލިޙް ފުއްދާފައިވާ ކަމަށާއި ކުރިޔަށް އޮތް ރިޔާސީ އިންތިހާބުގައި އެންމެ މަދުވެގެން 75 ޕަސެންޓު ތާއީދާއި ވޯތު ރައީސް ޞާލިޙަށް ލިބިގެންދާނެ ކަމަށެވެ.

“އަޅުގަނޑުމެން އަޒުމް ކަނޑައަޅައިގެން މިތިބީ ކުރިޔަށް އޮތް ރިޔާސީ އިންތިހާބުގައި އެންމެ މަދުވެގެން 75 ޕަސެންޓު ތާއީދު، އެ ވޯޓު ދޭން. ދޭނަން އިރާދަކުރެއްވިއްޔާ. ޝައްކެއް ކުރައްވާނެ ކަމެއް ނެތް” ޝަރީފް ވިދާޅުވިއެވެ.