ރާއްޖޭގައި ސަރުކާރުން ހިންގާ ހުރިހާ މަޝްރޫޢެއްގައިވެސް ރައްޔިތުން އެދޭ ގޮތަށް އިސްކަން ދޭނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ އައްޑޫސިޓީގެ ބިން ހިއްކުމުގެ މަޝްރޫޢު ފައްޓަވައި ދެއްވުމަށް ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.

"މުޅި ރާއްޖޭގައި ސަރުކާރުން ހިންގާ ހުރިހާ މަޝްރޫޢުއެއްގައި ވެސް މިހާރު ސަރުކާރުން އިސްކަންދޭ އެއްކަމެއްވޭ، އެއީ ރައްޔިތުން ބޭނުންވާ، އަދި ރައްޔިތުން އެދޭ ގޮތައް އެކަން ކުރުން" ރައީސްގެ ވާހަކަފުޅުގައި ވިދާޅުވިއެވެ.

Advertisement

އިއްޔެ އައްޑޫގައި ބޭއްވުނު ރަސްމިއްޔާތުގައި ވާހަކަފުޅުދައްކަވަމުން ރައީސް ވަނީ ސަރުކާރުން ރައްޔިތުން އެދޭ ގޮތައް އިސްކަންދެއްވާ ކަމުގެ މިސާލެއްގެ ގޮތުން އައްޑޫގެ މަގުހެދުމުގެ މަޝްރޫޢުގެ ވާހަކަ ގެންނަވާފައެވެ.

"މިސާލެއް ދަންނަވާނަމަ ސަރުކާރުން އެކަށައަޅާ މިހާރު ހިންގަމުންގެންދާ އައްޑޫ ސިޓީގެ މަގުހެދުމުގެ މަޝްރޫޢު އަޅުގަނޑު ފާހަގަ ކުރަން، ސަރުކާރުން އެކަށަ އެޅީ ޖުމްލަ 119 ކިލޯމީޓަރުގެ މަގު އައްޑޫގައި ޒަމާނީ ފެންވަރަށް ހެދުމަށް، ކުރިން ސިމެންތި އަޅަން ހަމަޖެހިފައިވާ 67 ކިލޯމީޓަރު މަގަށް  ރައްޔިތުން އެދުނު ގޮތައް މިހާރު އެވަނީ ތާރު އަޅަން ނިންމާފައި" ރައީސް ޞާލިޙް ވިދާޅުވިއެެވެ.

ރައީސް މިފަދައިން ވިދާޅުވެ ވާހަކަ ފުޅު ދައްކަވާފައި މިވަނީ އައްޑޫސިޓީގައި ހިންގުމަށް ކަނޑައެޅިފައިވާ ތަރައްޤީގެ ބޮޑެތި މަޝްރޫޢުތަކެއް އިފްތިތާޙު ކުރެއްވުމަށް އައްޑޫސިޓީ އަށް ކުރައްވާ ދަތުރުފުޅެއްގައެވެ.

ރައީސް ޞާލިޙްގެ ދައުރު ހަމަވާން 3 މަސް ދުވަހަށް ވެފައި ވަނިކޮށް އައްޑޫސިޓީގައި ރައީސް މިވަނީ ތަރައްޤީގެ ބިޔަ މަޝްރޫޢުތަކެއް ފައްޓަވައިދެއްވައިފައެވެ.