އައްޑޫގެ ތާރީޚުގައި ހިންގޭ ބިމާގުޅޭ އެންމެބޮޑު މަޝްރޫޢު މިހާރު ވަނީ މެކުހަށް ޖަހާފައި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

އައްޑޫ ސިޓީގެ ބިން ހިއްކުމުގެ މަޝްރޫޢު ރަސްމީކޮށް ފަށްޓަވައިދެއްވުމުގެ ރަސްމިއްޔާތުގައި ވާހަކަދައްކަވަމުން ރައީސް ޞާލިހް ވިދާޅުވީ، ރާއްޖެއަށް އަންނަ ކޮންމެ ހެޔޮ ބަދަލެއްގެ ފުރަތަމަ ފާހަގަޖެހޭ ތަނަކީ އައްޑޫ ސިޓީ ކަމަށެވެ. އަދި އެމަނިކުފާނު މީގެ ކުރިންވެސް އެފަދައިން ވިދާޅުވަމުން ގޮސްފައިވާ ކަމަށާ، އެހެންނަމަވެސް މިހާރު ފެންނަމުންދަނީ އެކަމުގެ ޢަމަލީ މަންޒަރު ކަމަށް އެމަނިކުފާނު ވިދާޅުވި އެވެ.

ރައީސް ޞާލިހް ވިދާޅުވީ، ދުނިޔެއަށް ހުޅުވައިލެވޭ ވަރުގަދަ ސިޓީއަކަށް އައްޑޫސިޓީ ބަދަލުކުރުމަކީ، މާޒީގެ ތެރެއިން ތަކުރާރުކޮށް އިވުނު ދިގުލީ އަޑެއް ކަމަށާ، އެ އަޑު މަޑުކުރުމަށްފަހު، މިއަދު ސަރުކާރުން ކުރަމުންދާ މަސައްކަތަކީ އެކަމަށް ބޭނުންވާ ކަންކަން ކުރުން ކަމަށެވެ. 

މިއާއެކު ރައީސް ޞާލިހް ވިދާޅުވީ އެ އެންމެހާ މަޝްރޫޢުތަކަކީ އައްޑޫ ސިޓީގެ ރައްޔިތުން ބޭނުންވާ މަޝްރޫޢުތައް ކަމަަށާ، އެކަންކަން ކުރިއަށްދާ ކަމަށެވެ. އަދި މިހާރު އައްޑޫގައި ހިނގަމުން ފަނީ މާދަމާ ވަށާޖެހި، ފުރާފުރިހަމަވާނެ އައްޑޫ ސިޓީގެ ޒަމާންވީ ހުވަފެންތަކުގެ ތަޢުބީރު ކަމަށް އެމަނިކުފާނު ވިދާޅުވި އެވެ.

ރައީސް ޞާލިހު އިތުރަށް ވިދާޅުވީ، ތަރައްޤީގެ މަގުގައި ކުރިއަށްދިޔުމަށްޓަކައި ބޭނުންވާ އަސާސީ ހުރިހާ ޚިދުމަތެއް ފުރިހަމަވުމަކީ ލާޒިމް ކަމެއް ކަމަށެވެ. އަދި މުޅި ސަރުކާރުން ހިންގާ ހުރިހާ މަޝްރޫޢެއްގައިވެސް މިހާރު ސަރުކާރުން އިސްކަންދޭ އެއްކަމެއްވާ ކަމަށެވެ. 

މީގެ އިތުރުން ރާއްޖޭގައި މިހާރު ކުރިއަށްމިދާ ގިނަ މިފަދަ ބޮޑެތި ހުރިހާ ޕްރޮޖެކްޓްތަކަކީ، އިންޑިއާގެ ހިލޭ އެހީއާއި، ލޯނު އެހީގެ ދަށުން ހިނގަމުންދާ ޕްރޮޖެކްޓްތައް ކަން ފާހަގަކުރައްވައި ރައީސް ޞާލިހު ވަނީ ދިވެހި ސަރުކާރާއި، ދިވެހި ރައްޔިތުންގެ ނަމުގައި އިންޑިޔާގެ ސަރުކާރަށް ޝުކުރު ދަންނަވާފައެެވެ.