އައްޑޫގެ ތާރީޚުގައި ހިންގޭ ބިމާގުޅޭ އެންމެބޮޑު މަޝްރޫޢު މިހާރު ވަނީ މެކުހަށް ޖަހާފައި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އައްޑޫ ސިޓީގެ ބިން ހިއްކުމުގެ މަޝްރޫޢު ރަސްމީކޮށް ފަށްޓަވައިދެއްވުމުގެ ރަސްމިއްޔާތުގައި ވާހަކަދައްކަވަމުން ރައީސް ޞާލިހް ވިދާޅުވީ، ރާއްޖެއަށް އަންނަ ކޮންމެ ހެޔޮ ބަދަލެއްގެ ފުރަތަމަ ފާހަގަޖެހޭ ތަނަކީ އައްޑޫ ސިޓީ ކަމަށެވެ. އަދި އެމަނިކުފާނު މީގެ ކުރިންވެސް އެފަދައިން ވިދާޅުވަމުން ގޮސްފައިވާ ކަމަށާ، އެހެންނަމަވެސް މިހާރު ފެންނަމުންދަނީ އެކަމުގެ ޢަމަލީ މަންޒަރު ކަމަށް އެމަނިކުފާނު ވިދާޅުވި އެވެ.
"މިއަދަކީ، ތަރައްޤީގެ ހެޔޮ ފާހަގަ ފެށޭ، އައްޑޫ ސިޓީގެ މި ބިމަށް ތަރައްޤީގެ ހެޔޮ ބަދަލު ޢަމަލީގޮތުން އައުމުގެ ދުވަސް."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް ވިދާޅުވީ، ދުނިޔެއަށް ހުޅުވައިލެވޭ ވަރުގަދަ ސިޓީއަކަށް އައްޑޫސިޓީ ބަދަލުކުރުމަކީ، މާޒީގެ ތެރެއިން ތަކުރާރުކޮށް އިވުނު ދިގުލީ އަޑެއް ކަމަށާ، އެ އަޑު މަޑުކުރުމަށްފަހު، މިއަދު ސަރުކާރުން ކުރަމުންދާ މަސައްކަތަކީ އެކަމަށް ބޭނުންވާ ކަންކަން ކުރުން ކަމަށެވެ.
"އައްޑޫ ސިޓީއަށް ބަދަލު އަންނާނީ، އައްޑޫގެ ބިމުގެ ބައްޓަން ބަދަލުކޮށްގެންކަން އަބަދުވެސް އެނގޭ. މިއަދު ތިޔަބޭފުޅުން ތިޔަ ދެކެވަޑައިގަންނަވަނީ އޭގެ ޢަމަލީ މަންޒަރު. އައްޑޫގެ ތާރީޚުގައި ހިންގޭ ބިމާގުޅޭ އެންމެބޮޑު މަޝްރޫޢު މިހާރު އެވަނީ މެކުހަށް ޖަހާފައި. 1.5 ބިލިއަން ރުފިޔާ ހޭދަކޮށްގެން، 190 ހެކްޓަރުގެ އިތުރު ބިން، ތިޔަބޭފުޅުންގެ މި އައްޑުއަށް އެ ދަނީ އިތުރުވަމުން. އަދި ހަމަ އެއާއެކުއެކީ، އިތުރު މަޝްރޫޢެއްގެ ގޮތުގައި، ހުޅުމީދޫއަށް އިތުރުވާ 42 ހެކްޓަރުގެ ބިމަކީ އައްޑޫ ސިޓީއަށް އިތުރުވާ ބިން. އެއީ 179 މިލިއަން ރުފިޔާގެ އަގުހުރި މަޝްރޫޢެއް."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ރައީސް ޞާލިހް ވިދާޅުވީ އެ އެންމެހާ މަޝްރޫޢުތަކަކީ އައްޑޫ ސިޓީގެ ރައްޔިތުން ބޭނުންވާ މަޝްރޫޢުތައް ކަމަަށާ، އެކަންކަން ކުރިއަށްދާ ކަމަށެވެ. އަދި މިހާރު އައްޑޫގައި ހިނގަމުން ފަނީ މާދަމާ ވަށާޖެހި، ފުރާފުރިހަމަވާނެ އައްޑޫ ސިޓީގެ ޒަމާންވީ ހުވަފެންތަކުގެ ތަޢުބީރު ކަމަށް އެމަނިކުފާނު ވިދާޅުވި އެވެ.
ރައީސް ޞާލިހު އިތުރަށް ވިދާޅުވީ، ތަރައްޤީގެ މަގުގައި ކުރިއަށްދިޔުމަށްޓަކައި ބޭނުންވާ އަސާސީ ހުރިހާ ޚިދުމަތެއް ފުރިހަމަވުމަކީ ލާޒިމް ކަމެއް ކަމަށެވެ. އަދި މުޅި ސަރުކާރުން ހިންގާ ހުރިހާ މަޝްރޫޢެއްގައިވެސް މިހާރު ސަރުކާރުން އިސްކަންދޭ އެއްކަމެއްވާ ކަމަށެވެ.
"އެއީ، ރައްޔިތުން ބޭނުންވާ އަދި ރައްޔިތުން އެދޭގޮތަށް އެކަން ކުރުން. މިސާލެއް ދަންނަވާނަމަ، ސަރުކާރުން އެކަށައަޅައި މިހާރު ހިނގަމުންދާ އައްޑޫ ސިޓީގެ މަގުހެދުމުގެ މަޝްރޫޢު އަޅުގަނޑު ފާހަގަކުރަން. ސަރުކާރުން އެކަށައެޅީ ޖުމްލަ 119 ކިލޯ މީޓަރުގެ މަގު އައްޑޫގައި، ޒަމާނީ ފެންވަރަށް ހެދުމަށް. ކުރިން ސިމެންތި އަޅަން ހަމަޖެހިފައިވާ 67 ކިލޯ މީޓަރުގެ މަގަށް، ރައްޔިތުން އެދުނުގޮތަށް މިހާރު އެވަނީ ތާރުއަޅަން ނިންމައި ހަމަޖެހިފައި."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މީގެ އިތުރުން ރާއްޖޭގައި މިހާރު ކުރިއަށްމިދާ ގިނަ މިފަދަ ބޮޑެތި ހުރިހާ ޕްރޮޖެކްޓްތަކަކީ، އިންޑިއާގެ ހިލޭ އެހީއާއި، ލޯނު އެހީގެ ދަށުން ހިނގަމުންދާ ޕްރޮޖެކްޓްތައް ކަން ފާހަގަކުރައްވައި ރައީސް ޞާލިހު ވަނީ ދިވެހި ސަރުކާރާއި، ދިވެހި ރައްޔިތުންގެ ނަމުގައި އިންޑިޔާގެ ސަރުކާރަށް ޝުކުރު ދަންނަވާފައެެވެ.
Advertisement
This content is created and paid for by advertisers and does not involve Voice Journalists
