‏އައްޑޫ ސިޓީ މަރަދޫ ދާއިރާގެ މިނިވަން ކައުންސިލަރ އަޙްމަދު ނާދިރު (ޗިޅާ) ސަރުކާރު ހިންގާ މައި ޕާޓީ, އެމްޑީޕީީއަށް ސޮއިކުރައްވައިފިއެވެ.

އަހުމަދު ނާދިރު އެމްޑީޕީއަށް ސޮއި ކުރައްވައި، އެ ޕާޓީގެ އިސް ލީޑަރ، އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވަނީ ފޯމް ހަވާލުކުރައްވާފައެވެ. މިކަމަށްޓަކައި އައްޑޫގައި ބޭއްވުނު ރަސްމިއްޔާތުގައި، އެމްޑީޕީގެ ޗެއާޕާސަން ފައްޔާޟް އިސްމާއިލް އާއި، އައްޑޫގެ އެކި ދާއިރާ ތަކުގެ އެމްޑީޕީއަށް ނިސްބަތްވާ މަޖިލިސް މެންބަރުންގެ އިތުރުން އައްޑޫސިޓީގެ މޭޔަރ ޢަލީ ނިޒާރު ވެސް ވަނީ ބައިވެރިވެވަޑައިގެންފައެވެ.

ކައުންސިލަރ އަހުމަދު ނާދިރުގެ އިތުރުންވެސް އައްޑޫސިޓީގެ އެކި ދާއިރާތަކުން އެމްޑީޕީއާއި ގުޅުނު ގިނަ މެންބަރުން ތަކެއްގެ ފޯމް ވަނީ ރައީސް ޞާލިހާއި ހަވާލު ކޮށްފައެވެ. އަދި ޕާޓީއާއި އަލަށް ގުޅުނު ހުރިހާ މެންބަރުންނަށް އެ ޕާޓީން ވަނީ މަރުހަބާ ދަންނަވާފައެވެ.

އެމްޑީޕީގެ މެންބަރުންގެ ގޮތުގައި ގިނަ ދުވަސްތަކެއް ވަންދެން މަސައްކަތް ކުރެއްވި މެންބަރުން ތަކެއް ޕާޓީ ދޫކޮށް، ދަ ޑިމޮކްރެޓްސް ގެ ނަމުގައި އަައު ޕާޓީއެއް އުފެއްދުމާއި ގުޅިގެން އެ ޕާޓީގެ މެންބަރުންގެ އަދަދު އަންނަނީ މަދުވަމުންނެވެ. އެހެންނަމަވެސް، އެ މަދުވާ މެންބަރުންނަށްވުރެ ގިނަ މެންބަރުން އެ ޕާޓީއާއި ގުޅޭނެ ކަމުގެ ޔަގީންކަން ޗެއާޕާސަން ފައްޔާޟް ވަނީ އަރުއްވާފައެވެ. 

އެގޮތުން، އެ ޕާޓީގެ ރިޔާސީ ކެމްޕެއިން މިހާރު ފަށާފައިވާއިރު، ކެންޕެއިންގެ ތެރެއިން ގިނަ މެންބަރުންތަކެއް ޕާޓީއަށް ސޮއިކޮށް ޕާޓީގެ މެންބަރުންގެ އަދަދު އިތުރުވެގެންދާނެ ކަމަށްވެސް އެ ޕާޓީން ވަނީ ބުނެފަ އެވެ.