ރެއާލް މެޑްރިޑްގެ ކެޕްޓަން ކަރީމް ބެންޒީމާ މިސީޒަން ނިމުމުން ކުލަބު ބަދަލުކުރަން ނިމައިފައިވާކަމަށް ރެއާލް މެޑްރިޑުން ބުނެފިއެވެ.

2009 ވަނަ އަހަރު ފްރާންސްގެ ލިއޯން ދޫކޮށް ބެންޒީމާ ރެއާލް މެޑްރިޑަށް ބަދަލުވީ އުމުރުން 21 އަހަރުގައެވެ. އަދި ވޭތުވެދިޔަ 14 އަހަރުތެރޭގައި ރެއާލް މެޑްރިޑާއެކު ބެންޒީމާ ވަނީ ގިނަ ކާމިޔާބީތަކެއް ހޯދާފައެވެ.

އޭގެތެރޭގައި ޔޫރަޕުގެ އެންމެ ޝަރަފުވެރި މުބާރާތްކަމުގައިވާ ޔުއެފާ ޗެމްޕިއަންސްލީގު ޗެންޕިއަން ފަސް ފަހަރު،  ކުލަބް ވޯލްޑް ކަޕް ފަސް ފަހަރު، ސްޕެނިޝް ލަލީގާގެ ހަތަރު ފަހަރު، ޔޫއެފާ ސުޕަ ކަޕް ހަތަރު ފަހަރު، ކޮޕާ ޑެލްރޭ ތިން ފަހަރު ހޯދުމުގެ އިތުރުން ސްޕެނިޝް ސުޕަ ކަޕް ހަތަރު ފަހަރު ކާމިޔާބުކޮށްފައިވެއެވެ.

Advertisement

ފާއިތުވެދިޔަ ދެ ސީޒަނުގައި ބެންޒީމާގެ ފަރާތުން އާދަޔާޚިލާފު މޮޅުކުޅުމެއް ފެނިގެން ގޮސްފައިވާއިރު، 2022 ވަނަ އަހަރުގެ ޔޫރަޕުގެ މޮޅު ކުޅުންތެރިއާގެ އިތުރުން މިދިޔަ އަހަރުގެ ބެލެންޑޯ އެވޯޑް ލިބުނީ ވެސް ބެންޒެމާ އަށެވެ. މީ ގެއިތުރުން ވެސް މިދިޔައަހަރުގެ ލަލީގާ ޓޮޕް ސްކޯރާ އެވޯޑާއި ޗެންޕިްއަންސް ލީގުގެ ޓޮޕް ސްކޯރާގެ އެވޯޑް ލިބުނީ ވެސް ބެންޒީމާ އަށެވެ.

މީގެ އިތުރުން ބެންޒީމާ އަކީ ރެއާލް މެޑްރިޑްގެ ތާރީޚްގައި އެކުލަބަށް ދެވަނައަށް އެންމެ ގިނަ ލަނޑުޖަހާދީފައިވާ ކުޅުންތެރިއަކަށެވެ. އަދި ރެއާލްގައި ހޭދަކުރި 14 އަހަރުތެރޭގައި ބެންޒީމާ ވަނީ އެކުލަބަށް 647 މެޗު ކުޅެދީ 353 ލަނޑު ކާމިޔާބުކޮށްދީފައެވެ.

ރެއާލް މެޑްރިޑުން ނެރެފައިވާ ބަޔާނުގައިވާ ގޮތުން ރެއާލްގައި ހޭދަކުރި 14 އަހަރުތެރޭގައި ބެންޒީމާގެ ފަރާތުން ފެނިގެން ގޮސްފައި ވަނީ ކުލަބުގެ އަސާސްތަކަށް އިހްތިރާމްކޮށް ޕްރޮފެޝަނަލް ކަމާއި ރިވެތި އަޚްލާޤުގެ ފުރިހަމަ ނަމޫނާއެކެވެ.

މީޑިއާ ރިޕޯޓްތައް ބުނާގޮތުގައި އަންނަ ސީޒަނުގައި ބެންޒީމާ ފެނުމުގެ ފުރުސަތު އެންމެ ބޮޑީ ސައުދީ ޕްރޮފެޝަނަލް ލީގުންނެވެ.

އަންނަ އަންގާރަދުވަހު ރެއާލް މެޑްރިޑް ސިޓީގައި އެކުލަބުން ބެންޒީމާގެ ޝަރަފުގައި ބޮޑު ރަސްމިއްޔާތެއް ބާއްވަން ނިންމާފައިވާއިރު، މި ރަސްމިއްޔާތުގައި ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ބައިވެރިވުމަށް ވަނީ ހަމަޖެހިފައެވެ.