ރ އަތޮޅުގައި ދެކުނުގައި އަޅާ އެއަރޕޯޓް ރ ބެރިޔަންފަރުގައި އަޅާނެކަން ރައީސް އިބްރާޙިމް މުޙައްމަދު ޞާލިޙް މިއަދު އިޢުލާނު ކުރައްވައިފިއެވެ.

ރައީސް ޞާލިޙް އެކަން އިޢުލާނު ކުރެއްވީ  ގަން އިންޓަރނޭޝަނަލް އެއަރޕޯޓް ތަރައްޤީ ކުރުމުގެ ޢަމަލީ މަސައްކަތް ފައްޓަވައި ދެއްވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

"މި މަސައްކަތުގެ ތެރެއިން ރ. އަތޮޅު ދެކުނު ބިތަށް އިތުރު ކުރެވޭ އެއަރޕޯޓް އަޅާނީ އިރާދަކުރެއްވިއްޔާ އެ އަތޮޅު ބެރިޔަންފަރުގައި،" ރައީސް ޞާލިޙް ވިދާޅުވިއެވެ.

Advertisement

ރައީސްގެ ވާހަކަފުޅުގައި ވިދާޅުވީ މުޅިރާއްޖޭގައި އެކީ އެއްފަހަރާ ހިންގަންޖެހޭ މަޝްރޫޢުތަށް ނުހިންގާ ފަރަކުނުޖެހޭނެ ކަމަށެވެ. އެފަދަ ހުރިހާ މަޝްރޫޢުއެއް ސަރުކާރުން މިދަނީ ހިންގަމުން ކަމަށާއި، އެއްގަމާ ކަނޑާއި ވައިގެ ވިއުގަ އަކުން މުޅިރާއްޖެ ގަތާލެވިގެން މެނުވީ އުފާވެރި ހަމަޖެހޭ ދިރިއުޅުމެއް ނުހޯދޭނެ ކަމަށް އެމަނިކުފާނު ވިދާޅުވިއެވެ.

ވައިގެ މަގުން ރާއްޖެ ގުޅާލުމުގެ މަސައްކަތް މުޅި ރާއްޖޭގައި އެދަނީ ކުރިއަށް ކަމަށާއި، މިމަސައްކަތުގެ ތެރެއިން ރ. އަތޮޅު ދެކުނުބިތަށް އިތުރުކުރެވޭ އެއާޕޯޓު އަޅާނީ އެއަތޮޅު ބެރިޔަންފަރުގައި ކަމަށް ރައީސް ޞާލިޙުގެ ވާހަކައިގައި ވިދާޅުވިއެވެ.

ރ. އަތޮޅުގައި ތިންވަނަ އެއަރޕޯޓެއް އަޅާނެ ބަޔަކު ހޯދަން ޕްލޭނިން މިނިސްޓްރީން ވަނީ އިޢުލާންކޮށްފައެވެ. އެކަމަކު އެއަރޕޯޓް އަޅަން ނިންމި ވަކި ރަށެއް އޭރުގެ އިޢުލާނަކު ނެތެވެ.