ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި ދެކޮޅަށް ރައްޔިތުންނަށް ވިއްކޭނެ އެއްވެސް އެއްޗެއް ނެތުމުން އިދިކޮޅު ފަރާތްތަކުން މަސައްކަތް ކުރަމުންދަނީ އެމަނިކުފާނާއި ދޭތެރޭ ރައްޔިތުންގެ ހިތުގައި ނަފްރަތު އުފެއްދުމަށްކަމަށް ފޮރިން މިނިސްޓަރު އަބްދުالله ޝާހިދު ވިދާޅުވެއްޖެ އެވެ.
ޝާހިދު މިފަދައިން ވިދާޅުވެފައިވަނީ އައްޑޫ ގަން އެއާޕޯޓު ތަރައްގީކުރުމުގެ މަޝްރޫއު އިފްތިތާހުކުރުމަށް ބޭއްވި ޚާއްސަ ހަފްލާގައި ވާހަކަދައްކަވަމުން ނެވެ.
ޝާހިދުގެ ވާހަކަ ފެއްޓެވީ ރައީސުލްޖުމްހޫރިއްޔާ ކޯވިޑް މެނޭޖުކުރެއްވި ގޮތަށް ތައުރީފުކުރައްވަމުން ނެވެ.
އެގޮތުން ކޯވިޑް-19 އާއި ގުޅިގެން ރާއްޖެ ފުރަބަންދުކޮށް އިޤްތިޞާދީ ގިނަ ހަރަކާތްތަކެއް ހުއްޓާލަން ޖެހުމުން، އޭރު ރާއްޖޭގައި ކުރިއަށް ގެންދިޔަ މަޝްރޫއުތައް މެދުކަނޑާލުމަށް ރައީސަށް ބަޔަކު ލަފާދެމުން ދިޔަކަމަށާއި، އެފަދައިން އެކަން ނުކުރައްވައިފި ނަމަ ރާއްޖެ ބަނގުރޫޓޫވާނެ ކަމުގެ އިންޒާރު ދެމުން ދިޔަކަމަށް ޝާހިދު ވިދާޅުވި އެވެ.
އޭނާ ސިފަކުރެއްވީ އެ ވާހަކަތަކަކީ ރައްޔިތުންގެ މެދުގައި ބިރުވެރިކަން އުފައްދާ ސަރުކާރާއި މެދު ނަފްރަު އުފެއްދުމަށް ދެއްކެވި ވާހަކަތަކެއްގެ ގޮތުގައެވެ.
ދެން ޝާހިދު ވިދާޅުވީ އިންޑިއާގެ ސަރުކާރުގެ އެހީގައި އައްޑޫ ސިޓީގައި ގާއިމްކުރި ޕޮލިސް އެކަޑަމީގެ ވާހަކައެކެވެ. އެތަނަކީ ބޭރުގެ އަސްކަރީ މަރުކަޒެއްކަމަށް އިދިކޮޅު ފަރާތްތަކުން އޭރު ސިފަކުރަމުން ދިޔަ ކަމަށާއި، މިހާރު އެ ވާހަކަތައް ހުއްޓާލާފައިވާކަމަށް ޝާހިދު ވިދާޅުވި އެވެ.
އަދި އެ ވާހަކަތަކަކީ ވެސް އައްޑޫ ރައްޔިތުންގެ ހިތުގައި ބިރުވެރިކަން އުފައްދާ ރައީސް ޞާލިހާއި މެދު ނަފްރަތު އުފައްދަން ދައްކާފައިވާ ވާހަކަތަކެއްކަމަށް ޝާހިދު ވިދާޅުވި އެވެ. އަދި ވިދާޅުވީ އިދިކޮޅު ފަރާތްތަކުން ދައްކާ ވާހަކަތައް ރައްޔިތުން ޤަބޫލު ނުކުރާ ކަމަށެވެ.
އެމީހުންނަށް ރައީސް ޞާލިހާއި ދެކޮޅަށް ދެއްކޭނެ އެއްވެސް ވާހަކައެއް ނެތުމުން، މަސައްކަތް ކުރަމުންދަނީ އެމަނިކުފާނާއި ދެކޮޅަށް ރައްޔިތުންގެ ހިތްތަކުގައި ނަފްރަތު އުފެއްދުމަށް ކަމަށް ޝާހިދު ވިދާޅުވި އެވެ.
"ހެދިހާ ދޮގެއް ސާފުކޮށް ފެންނަން އޮތީމަ ދެނެއް އެ މަގަކަށް ނުގެންދެވޭނެ. ވިއްކާނެ އެއްޗެއް ނެތިގެން ބޮލަށް ދޮލަނގު ލައިގެން، ދޮލަނގަށް ނަފްރަތު ލައިގެން ވިއްކަން ނުކުމެ އެތިބީ. އެކަމަކު ރައްޔިތުންނެއް ދެނެއް އެ ދޮލަނގަކުން އެއްޗެއް ނުގަންނާނެ"
ފޮރިން މިނިސްޓަރު ޝާހިދު
ފޮރިން މިނިސްޓަރު ޝާހިދު ވިދާޅުވީ ސަރުކާރު ބަދަލުވެއްޖެ ނަމަ މިހާރު އައްޑޫ ސިޓީގައި ފަށާފައިވާ މަޝްރޫއުތަކަށް ދެން އަންނަ ސަރުކާރަކުން ހަދާނެ ގޮތެއް އެނގިވަޑައި ނުގަންނަވާ ކަމަށެވެ. ޔަގީނުންވެސް އެ މަޝްރޫއުތައް ކުރިއަށް ނުގެންދަވާނެކަމަށް އޭނާ ވިދާޅުވި އެވެ.
އެކަން ފާހަގަކުރައްވާ ޝާހިދު ވިދާޅުވީ މި މަޝްރޫއުތަކުގެ ފޮނި މީރުކަން ރައްޔިތުންނަށް ލިބޭނީ ރައީސް ޞާލިހަށް އިތުބާރު ކުރައްވާ އެމަނިކުފާނު ވެރިކަމުގައި ބަހައްޓައިގެން ކަމަށެވެ. އަދި އެމަނިކުފާނަށް ދެވަނަ ދައުރެއް ހޯއްދަވާދެއްވުމަށް ރައްޔިތުން ވެސް ބޭނުންފުޅުވާނެކަން ޤަބޫލުކުރައްވާކަމަށް ޝާހިދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
