އައްޑޫ ސިޓީގެ ތަރައްގީއާއި ގުޅުންހުރި މަޝްރޫއުތަކަށް އިންވެސްޓުކުރުމަށް މިހާތަނަށް އިންވެސްޓަރުން ފަހަތަށް ޖެހެނީ، އައްޑޫ ސިޓީގެ މައި އެއާޕޯޓު ތަރައްގީނުވެ އޮތުމުންކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ. 

ގަން އެއާޕޯޓު ތަރައްގީކުރުމުގެ މަސައްކަތް އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ފައްޔާޒު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެރިކަމާއި ހަވާލުވެވަޑައިގެންނެވިއިރު އެންމެ ބޮޑު ތަސައްވަރަށް އޮތީ އައްޑޫ ސިޓީ ތަރައްގީކުރުން ކަމަށެވެ. 

ދިވެހިރާއްޖޭގެ ތަރައްގީ އައްޑޫ ސިޓީއާއި ގުޅިފައިވާކަން އެމަނިކުފާނު ޤަބޫލުފުޅު ކުރައްވާ ކަމަށާއި، އައްޑޫ ސިޓީގެ ތަރައްގީއަށް ދިމާވެފައިވާ އެންމެ ބޮޑު ގޮންޖެހުމަކީ އެއާޕޯޓު ތަރައްގީ ނުވެ އޮތް އޮތުންކަން އެމަނިކުފާނަށް ވިސްނިވަޑައިގަންނަވާ ކަމަށް ފައްޔާޒު ވިދާޅުވި އެވެ. 

އެކަން ފާހަގަކުރައްވާ ފައްޔާޒު ވިދާޅުވީ އައްޑޫގައި ފަތުރުވެރިކަން ފުޅާވެ އިންވެސްޓަރުންގެ އިތުބާރު ލިބެން އޮތީވެސް އެއަރޕޯޓް ތަރައްޤީ ކުރެވިގެންނެވެ.

މިކަމަށްޓަކައި މިސަރުކާރުން އެއަރޕޯޓް ތަރައްޤީ ކުރާނެ ފައިސާ ހަމަޖައްސައި އެއަރޕޯޓްގެ މަސައްކަތް ފެށިގެން ދިއުމަކީ އައްޑޫއަށް އިންވެސްޓް ކުރާ ރައްޔިތުންނަށް ލިބިގެންދާނެ އިތުރު ޔަގީންކަމެއް ކަމަށް މިނިސްޓަރު ވިދާޅުވި އެވެ. 

މިނިސްޓަރު ފައްޔާޒު އިތުރަށް ވިދާޅުވީ އައްޑޫގައި އިންވެސްޓް ކުރާ މީހުންނަށް މިހާތަނަށް ދިމާވި އެންމެ ބޮޑު މާލީ ގޮންޖެހުމަށްވެސް ހައްލު ހޯއްދަވައި ދެއްވީ ރައީސް ޞާލިހު ކަމަށެވެ. 

އައްޑޫއަށް އެހާބޮޑު އަހައްމިއްޔަތެއް ދެނީ ރާއްޖޭގެ ތަރައްޤީގެ އެންމެ ބޮޑު ހިއްސާއެއް އައްޑޫ ސިޓީގައި އޮތުމުންކަން މިނިސްޓަރު ފާހަގަކުރެއްވި އެވެ. އަދި ވިދާޅުވީ އައްޑޫއަށް އަންނަ ކޮންމެ ތަރައްޤީއަކީ މުޅި ދެކުނަށާއި ރާއްޖެއަށް ލިބިގެންދާ ކުރިއެރުމެއް ކަމަށް ދެކިވަޑައިގަންނަވާ ކަމަށެވެ.