ފަސް އަހަރުގެ ތެރެއިން މަސައްކަތްކުރަން ލިބުނު ތިން އަހަރު ގިނަ މަސައްކަތްތަކެއް ކުރެވިއްޖެ ކަމަށާއި މީން ޒަމާނަކު ރާއްޖޭގައި ނުހިންގޭ ވަރުގެ ގިނަ ބޮޑެތި މަޝްރޫއުތައް ހިންގިއްޖެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިހެން ވިދާޅުވީ އައްޑޫ ސިޓީގެ ރައްޔިތުންނާއެކު ރޭ ބޭއްވެވި ރޭގަނޑުގެ ފަރިއްކޮޅުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރާއްޖޭގެ އުތުރުން ދެކުނަށް ކޮންމެ ރަށަކާއި ކޮންމެ އަތޮޅެއްގައި އުމްރާނީ ތަރައްގީގެ ގިނަ މަސައްކަތްތަކެއް ކުރެވެމުންދާ ކަމަށެވެ.
"މި ވޭތުވެދިޔަ ފަސް އަހަރު ނިމިގެންދާއިރުގަ އަޅުގަނޑުމެންނަށް މަސައްކަތް ކުރަން ލިބުނު ތިން އަހަރު ތެރޭގަ، އަޅުގަނޑު ދަންނަވާނީ އިރާދަކުރެއްވިއްޔާ ގިނަ މަސައްކަތްތަކެއް އައްޑޫ ސިޓީއާ މުޅި ރާއްޖޭގާ ކުރެވިއްޖޭ" ރައީސް ވިދާޅުވިއެވެ.
އެގޮތުން އަސާސީ ހިދުމަތްތައް ކަމުގައިވާ ފެނާ ނަރުދަމާއާއި ކަރަންޓާއި، ތައުލީމާއި، ސިއްހަތު ފަދަ ހުރިހާ ދާއިރާތަކުން، މީން ޒަމާނަކު ރާއްޖޭގައި ނުހިންގޭ ވަރުގެ ގިނަ ބޮޑެތި މަޝްރޫއުތައް ހިންގިއްޖެ ކަމަށާއި މިހާރުވެސް ހިންގަމުން ދާކަމަށް ރައީސް ވިދާޅުވިއެވެ.
މި މަޝްރޫއުތައް ނިމޭއިރު ރާއްޖޭގައި އުމްރާނީ ތަރައްގީއަށް ދެން ކުރަން ހުންނާނީ މަދު ކަމެކޭ ދެންނެވިދާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ފާއިތުވި ފަސްއަހަރެކޭ އެއްގޮތަށް ކުރިއަށް އޮތް ފަސް އަހަރުވެސް އެންމެ އިސްކަމެއް ދޭނީ ހަމަޖެހުމާއި ސުލްހައަށް ކަމަށެވެ. ސަބަބަކީ އެކަން ނެތި އެއްވެސް ތަނަކަށް ގެނެވޭނެ ތަރައްގީއެއް ނޯންނާނެތީ ކަމަށް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
