ސްޕެނިޝް ލަލީގާގައި ރޭ އަމިއްލަ ދަނޑުގައި ރެއާލް މެޑްރިޑާއި އެތްލެޓިކް ބިލްބާއޯ ވާދަކުރި މެޗު 1-1 ގެ ނަތީޖާއަކުން ދެޓީމް އެއްވަރުވެއްޖެ އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، ފުރަތަަމަ ހާފުގެ 10 ވަނަ މިނެޓުގައި މެޗުގެ ލީޑު ނެގުމަށް ބިލްބާއޯއަށް ވަނީ ރަނުގެ ފުރުސަތެއް ލިބިފައެވެ. ރެއާލްގެ ޕެނަލްޓީ އޭރިއާ ތެެރެއިން އެޓީމުގެ ޖަރުމަނު މިޑްފީލްޑަރު ޓޯނީ ކްރޫސް އަތުގައި ބޯޅަ ޖެހުމުން ރެފްރީ ވަނީ ބިލްބާއޯއަށް ޕެނަލްޓީއެއް ދީފައެވެ.

ނަމަވެސް ބިލްބާއޯގެ ސްޕެނިޝް މިޑްފީލްޑަރު މިކޭލް ވެސްގާ ފޮނުވާލި ޕެނަލްޓީ ރެއާލްގެ ގޯލްކީޕަރު ކޯޓުއާ ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ދެވަނަ ހާފު ފެށިގެން ހަތަރުވަނަ މިނެޓުގައި ބިލްބާއޯ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އޮއިހާން ސެންސެޓް އެވެ. މިއީ ރެއާލްގެ ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި އޭނާ ފުރަތަަމަ ފޮނުވާލި ބޯޅަ ކޯޓުއާގެ އަތުގައި ޖެހިފައި ބޭރަށް ނުކުތް ވަގުތު ވަރަށް ހަމަޖެހިލާފައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ރެއާލްގެ މެޑްރިޑުން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 72 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ކެޕްޓަން ކަރީމް ބެންޒީމާ އެވެ. މިއީ ބިލްބާއޯގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ރެއާލްގެ ބްރެޒިލް ޑިފެންޑަރު މިލިޓޯއަށް ކުރި ފައުލަކާއި ގުޅިގެން ރެފްރީ އެޓީމަށް ދިން ޕެނަލްޓީއެކެވެ.

މިި މެޗުން ލިބުނު އެއް ޕޮއިންޓާއެކު ރެއާލް މެޑްރިޑް ލީގު ނިންމާލީ ކުޅުނު 38 މެޗުން ލިބުނު 78 ޕޮއިންޓާއެކު ތާވަލްގެ ދެވަނައިގައެވެ. އަދި މި މެޗުން ލިބުނު އެއް ޕޮއިންޓާއެކު ބިލްބާއޯ އިން ވަނީ 38 މެޗުން 51 ޕޮއިންޓް ހަމަކޮށް ނަތީޖާ ފަހަތަށް ޖައްސާލުމަށްފަހު ތާވަލުގެ 08 ވަނައަށް ކުރިއަށް ޖެހިލާފައެވެ.

އަދި މިރޭގެ މެޗަކީ ރެއާލްގެ ކެޕްޓަން ކަރީމް ބެންޒީމާގެ އިތުރުން މާކޯ އަސެންސިއޯ ރެއާލްގެ ޖާޒީގައި ކުޅުނު ފަހު މެޗެވެ. އަދި މެޗަށްފަހު އެޑިން ހަޒާޑް އާއި މަރިއާނޯ ޑިއާޒް ވެސް ވަނީ ރެއާލްގެ ސަޕޯޓަރުންނާއި ވަދާއި ސަލާމްކޮއްފައެވެ.