ސްޕެނިޝް ލަލީގާގައި މިރޭ ރަށުން ބޭރުގައި ސެލްޓަ ވީގޯ އަތުން 2-1 ގެ ނަތީޖާއަކުން ޗެންޕިއަން ބާސެލޯނާ ބަލިވެއްޖެ އެވެ.

ފުރަތަަމަ ހާފުގައި ބާސެލޯނާ އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް މިހާފުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރީ ސެލްޓަ ވީގޯ އިންނެވެ. އެގޮތުން މި ހާފުގައި އެޓީމުން ބާސެލޯނާގެ ގޯލަށް އަމާޒުކޮށް 07 ހަމަލާއެއް ފޮނުވާލާފައި ވާއިރު މި ހާފުގައި ސެލްޓަ ވީގޯގެ ގޯލާއި އަމާޒުކޮށް ބާސެލޯނާއަށް ފޮނުވާލެވިފައި ވަނީ އެންމެ ހަމަލާއެކެވެ.

މި މެޗުގައި ސެލްޓާއިން ކާމިޔާބުކުރި ފުރަތަަމަ ލަނޑު މެޗުގެ 42 ވަނަ މިނެޓުގައި ކާމިޔާބުކޮށްދިނީ ގަބްރީ ވެއިގާ އެވެ. މިއީ އެޓީމުގެ ސުވިޒަލޭންޑު ފޯވާޑް ހާރިސް ސެފެރޯވިޗް ތަނަވަސްކޮށްދިން ފުރުސަތެއްގައި ބޯޅައާއެކު ބާސެލޯނާގެ ޕެނަލްޓީ އޭރިއާ ތެރެއަށް ވަދެ ކައިރީގައި ތިބި ދެ ޑިފެންޑަރުން ކައިރިން ނައްޓާލުމަށް ފަހު، ފޮނުވި ބޯޅަ ގޯލުގެ ދުރު ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސެލްޓާ ކުރީގައި އޮވެގެންނެވެ.

ދެވަނަ ހާފުގައި ވެސް ގިނަވަގުތު ބާސެލޯނާއިން ބޯޅަ ހިފަހައްޓައިގެން ކުޅުނު ނަމަވެސް މި ހާފުގައި ވެސް ސެކްޓާގެ އެޓޭކުތަށް ފެނިގެންދިޔައީ ވަރަށް ވަރުގަދަކޮށެވެ. ނަތީޖާއެއްގެ ގޮތުން ދެވަނަ ހާފުގެ 65 ވަނަ މިނެޓުގައި ސެލްޓާއިން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރި އެވެ. މި ލަނޑު ވެސް އެޓީމަށް ކާމިޔާބުކޮށްދިނީ އެޓީމުގެ ފުރަތަަމަ ލަނޑު ވެސް ކާމިޔާބުކޮށްދިން ގަބްރީ ވެއިގާއެވެ. މިއީ އެޓީމުގެ ސްޕެނިޝް ފޯވާޑް ކާލްސް ޕެރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ބާސެލޯނާ އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ 79 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ޒުވާން ފޯވާޑް އަންސޫ ފާޓީ އެވެ. މިއީ އެޓީމުގެ ފްރާންސް ފޯވާޑް އުސްމާން ޑެންބެލޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސެލްޓަ ވީގޯ ކުރީގައި އޮވެގެންނެވެ.

މި މެޗުން ބާސެލޯނާ ބަލިވިއިރު، މިއީ ލީގު ޗެމްޕިއަންކަން ކަށަވަރު ކުރިފަހުން އެޓީމު ކުޅުނު ހަތަރު މެޗުގެ ތެރެއިިން ބަލިވި ތިންވަނަ މެޗެވެ. އަދި ލީގުގައި ކުޅުނު 38 އަށް މެޗުން އެޓީމަށް ލިބިފައިވަނީ 88 ޕޮއިންޓެވެ. އަދި މި މެޗުން ލިބުނު ތިން ޕޮއިންޓާއެކު އެކު 38 މެޗު ކުޅެގެން ސެލްޓަ ވީގޯ ވަނީ 43 ޕޮއިންޓާއެކު ތާވަލްގެ 13 ވަނައަށް ކުރިއަށް ޖެހިލާފައެވެ.