ނުކުޅެދުންތެރިކަން ހުންނަ ފަރާތްތަކުގެ އެލަވަންސް އަށް ހެޔޮބަދަލެެއް ގެނެސް އެކަން ވަރަށް އަވަހަށް އިޢުލާނު ކުރައްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރޭ އައްޑޫސިޓީގެ ރައްޔިތުންނާއި އެކު ބޭއްވެވި ރޭގަނޑުގެ ފަރިއްކޮޅަށް ހާޒިރުވި ރައްޔިތުންނާއި ވާހަކަ ދައްކަވަމުންނެވެ.
ރައީސް ގެ ވާހަކަފުޅުގައި ވިދާޅުވީ ނުކުޅެދުންތެރިކަން ހުންނަ ފަރާތްތަކަށް ދޭ އެލަވަންސްއަށް ހެޔޮބަދަލެއް ގެނައުމަށް ކުރަންޖެހޭ ކަންކަންނިންމައި ވަރަށް އަވަހަށް ސަރުކާރުން އެބަދަލުތައް އިޢުލާނު ކުރައްވާނެ ކަމަށެވެ.
މިއަހަރަށް ރައްޔިތުންގެ މަޖިލިސް ހުޅުވި ޖަލްސާގައި ރައީސް ވިދާޅުވެފައި ވަނީ އެލަވަންސް ބޮޑުކުރުމުގެ ގޮތުން ކުރަންޖެހޭ މަސައްކަތުގެ ދަށުން ނުކުޅެދުންތެރިކަން ހުންނަ މީހުންގެ ރަޖިސްޓްރީ އެކުލަވާލާ ނިންމާފައިވާކަމަށެވެ. އަދި ރައީސް ޞާލިޙް ވަނީ ޖޫން މަހު، ނުކުޅެދުންތެރިކަން ހުންނަ މީހުންނަށް ދައުލަތުން ދޭ އެލަވަންސް ބޮޑު ކޮށްދެއްވާނެ ކަމަށް ވިދާޅުވެފައެވެ.
ރޭ ބޭއްވުނު ފަރިއްކޮޅުގައި ވާހަކަ ފުޅު ދައްކަވަމުން ރައީސް ވިދާޅުވީ ކުރިޔަށް އޮތްތަނުގައި ޕޭ ހާމަނައިޒޭޝަންގެ ދަށުން ހުރިހާ ދާއިރާއެއްގެ މުސާރަތަކަށް ގެންނަންޖެހޭ ހެޔޮބަދަލުތައް ގެންނަވާނެކަަމަށެވެ.
އަދި ކޮވިޑްގެ ބަލިމަޑުކަން ކުރިމަތި ނުވިނަމަ މިހާތަނަށް އައިއިރު އެމަސައްކަތް އޮންނާނީ ނިމިފައިކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ރައީސް ޞާލިޙް އައްޑޫ ސިޓީ އަށް މިކުރެއްވަވާ 3 ދުވަހުގެ ދަތުރުފުޅަކީ އައްޑޫގައި ހިންގުމަށް ހަމަޖެހުނު ތަރައްޤީގެ ބޮޑެތި މަޝްރޫޢުތަކެއް ފައްޓަވައިދެއްވުމަށް ކުރައްވަވާ ދަތުރުފުޅެކެވެ. އެގޮތުން އައްޑޫގެ ބިން ހިއްކުމުގެ މަޝްރޫޢާއި ގަން އިންޓަރނޭޝަލް އެއަރޕޯޓް ތަރައްޤީކުރުމުގެ މަޝްރޫޢު މިހާރުވަނީ ފައްޓަވައިދެއްވައިފައެވެ.
Advertisement
This content is created and paid for by advertisers and does not involve Voice Journalists
