ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ބިންގާ އަޅުއްވާ ރައީސަކަށް ނުވާނަމޭ މީގެ ކުރިން ވިދާޅުވަމުން ދިޔަ ނަމަވެސް، މިހާރު ފެންނަމުންދަނީ ބިންގާ ތަކެއް އަޅުއްވާ ތަން ކަމަށް ވިދާޅުވެ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ފާޑުވިދާޅުވެއްޖެ އެވެ.  

ރައީސް ޞާލިހު އާއި މިސަރުކާރުގެ އިސް ބޭފުންވެސް އެކި ޕޯޑިއަމް ތަކުގައި ވާހަކަ ދައްކަވަމުން، ޚާއްސަކޮށް މަޝްރޫއުތައް ނިންމަވާ، ހުޅުވުމަށް ވަޑައިގެން އެންމެ އަޑުގަދަކޮށް ދައްކާ ވާހަކަ އަކީ މިސަރުކާރުން ހާއްސަކޮށް ރައީސް ޞާލިހު، މަޝްރޫޢު ތަކުގެ ބިންގާ އަޅުއްވަން ނުދާނެ ވާހަކައެވެ. އެހެނެއް ކަމަކު، އެމަނިކުފާނު ވަޑައިގަންނަވާނީ، މަޝްރޫޢު ނިންމަވާ ހުޅުވުމުގެ ރަސްމިއްޔާތަށް ކަމަށްވެސް ވަނީ އެކި ފަހަރު މަތިން ވިދާޅުވެފައެވެ. 

އެގޮތުން ދާދިފަހުން، މެއި ފަހުކޮޅުގައި ރައީސް ޞާލިހު ފ އަތޮޅަށް ކުރެއްވި ދަތުރުފުޅުގެ ތެރެއިންވެސް މަގޫދޫގައި ވާހަކަދައްކަވަމުން އެ މޭރުމުން ޕްލޭނިންގ މިނިސްޓަރު މުހައްމަދު އަސްލަމް ވަނީ ވާހަކަ ދައްކަވާފައެވެ. 

Advertisement

އެދުވަހު ވާހަކަ ދައްކަވަމުން، އަސްލަމް ވިދާޅުވީ މި ސަރުކާރުގެ އެންމެ ބޮޑު ތަފާތަކީ މަސައްކަތެއް ފައްޓާ ރަސްމިއްޔާތެއްގައި އަދި ބިންގާ އަޅާ ރަސްމިއްޔާތެއްގައި ބައިވެރިވެ ވަޑައިގަންނަން ނުޖެހުން ކަމަށާއި ރައީސް ވެސް މިފަދަ ރަސްމިއްޔާތެއްގައި ބައިވެރި ވަޑައިނުގަންނަވާ ކަމަށެވެ.

"މަސައްކަތް ނިންމަވާފަ ރައްޔިތުންނަށް ޚިދުމަތް ދިނުމަށް ފަށާ ރަސްމިއްޔާތުގައި މުޅިންވެސް އަޅުގަނޑުމެން ބައިވެރިވަނީ. އަޅުގަނޑުމެން މިއީ ވައުދުވާ ބައެއް، ހުވަފެން ދައްކާ ބައެއް ނޫން، ވައުދު ވެފަ ވައުދު ފުއްދާފަ އެކަމުގެ އުފާ ފާޅޫ ކުރަން އަޅުގަނޑުމެން އަންނަނީ." އަސްލަމް ވިދާޅުވިއެވެ.

އެހެން ނަމަވެސް، މިދިޔަ 3 ދުވަހު އައްޑޫ ސިޓީއަށް ރައީސް ޞާލިހު ކުރެއްވި ދަތުރުފުޅު ގައި ވަނީ އައްޑޫ ބިން ހިއްކުމުގެ ބޮޑު މަޝްރޫޢު އާއި، ގަން އެއާޕޯޓް ތަރައްގީ ކުރުމުގެ މަޝްރޫޢުގެ ބިންގާ އަޅުއްވާފައެވެ. އަދި އެކަމާއި ގުޅިގެން އައްޑޫގައި ހަވާވެސް އަރުވާފައިވެއެވެ. 

މި ކަމަށް ފާޑުވިދާޅުވެ ވައްޑެ ކުރެއްވި ޓުވީޓެއްގައި ވިދާޅުވީ، އެމަނިކުފާނަކީ ބިންގާ އަޅުއްވާ ރައީސް އަކަށް ނުވާނަމޭ ވިދާޅުވި އަޑު އެއްސެވި ކަމަށެވެ.

"(ރައީސް ޞާލިހް) ވާނީ ޕްރޮޖެކްޓް ނިންމާފައި ހުޅުވަން ދާ ރައީސަކަށޭ. އެކަމު ދައުރު ނިމެނިކޮށް އައްޑޫއަށް ވަޑައިން މިފެންނަނީ ބިންގާތަކެއް އަޅާފައި ހަވާއަރުވަން އުޅުއްވި ތަން." ވައްޑެ ވިދާޅުވި އެވެ.