ރެއާލް މެޑްރިޑްގެ ފޯވާޑް ކަރީމް ބެންޒީމާ އެކުލަބު ދޫކޮށް ސައުދީ ޕްރޮފެޝަނަލް ލީގުގެ ޗެމްޕިއަން އަލް އިއްތިހާދަށް ބަދަލުވާން އެއްބަސްވެއްޖެ އެވެ.

މީޑިޔާ ރިޕޯޓުތައް ބުނާގޮތުން އަލް އިއްތިހާދާއި އެކު ހަދާ އެއްބަސްވުމުގެ މުހިންމު ބައިތަކުގައި މިހާރު ވަނީ ސޮއިކޮށްފައެވެ. ބެންޒެމާ އެކުލަބާއި އެކު ހަދާ އެއްބަސްވުން 2025 ވަނަ އަހަރާއި ހަމަވުމުން ދެ ފަރާތް އެއްބަސްވާ ނަމަ އިތުރު އެއް އަހަރަށް، އެއްބަސްވުން އިތުރު ކުރުމުގެ ފުރުސަތު އެކުލަބަށް އޮންނަ މާއްދާއެއް އެ އެއްބަސްވުމުގައި ހިމަނާފައިވެއެވެ.

ފާއިތުވެދިޔަ 14 އަހަރު ރެއާލް މެޑްރިޑާއި އެކު ކާމިޔާބު ދުވަސްތަކެއް ހޭދަކޮށްފައިވާ ބެންޒީމާ، ރެއާލް ދޫކޮށްލަން ނިންމާފައިވަނީ އެކުލަބާއިއެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވައެވެ. މީޑިއާ ރިޕޯޓްތައް ބުނާގޮތުގައި އަލް އިއްތިހާދުން ބެންޒީމާއަށް 200 މިލިއަންގެ ހުށަހަޅާފައިވާއިރު، މިއީ މިދިޔައަހަރުގެ ޑިސެމްބަރުމަހުގެ ފަހުކޮޅު އަލް ނަސްރު އިން ކްރިސްޓިއާނޯ ރޮނާލްޑޯ ގެންދިއުމަށް ހުށަހެޅި އަގާއި ދާދި އެއްވަރުވެ ހުށަހެޅުމެކެވެ.

މީޑިޔާ ރިޕޯޓުތައް ބުނާ ގޮތުން މާދަމާ ރިއަލް މެޑުރިޑަށް އަލްވަދާއު ކިޔުމުގެ ގޮތުން ބެންޒެމާ ނޫސްވެރިންނާއި ބައްދަލުކުރާނެއެވެ. އޭގެ ފަހުން ސައުދީގެ އަލް އިއްތިހާދާއި އެކު އެއްބަސްވުމުގައި ސޮއި ކުރުމަށް ސައުދީއަށް ދިޔުމަށް ވަނީ ހަމަޖެހިފައެވެ. ބެންޒެމާގެ އިތުރުން އާޖެންޓީނާގެ ލިއޮނަލް މެސީ ހޯދުމަށް ސައުދީގެ އަލް ހިލާލުން އަންނަނީ މަސައްކަތް ކުރަމުންނެވެ.

2022 ވަނަ އަހަރުން ފެށިގެން ރިއަލް މެޑުރިޑުގެ ކެޕްޓަންގެ ޒިންމާ އަދާކުރަމުން އަންނަ ކަރީމް ބެންޒީމާ ވަނީ އެކުލަބަށް ކުޅެދިން 648 މެޗުގައި 354 ލަނޑު ކާމިޔާބުކޮށްދީފައެވެ. މީގެ ތެރޭގައި ލަލީގާގައި ރެއާލް މެޑްރިޑަށް ކުޅެދިން 439 މެޗުގައި 238 ލަނޑު، އަދި ޗެމްޕިއަންސް ލީގުގައި އެޓީމަށް ކުޅެދިން 133 މެޗުގައި 78 ލަނޑާއި ސްޕެނިޝް ސުޕަކަޕް، ކޮޕާ ޑެލްރޭގައި ކުޅެދިން 49 މެޗުގައި 25 ލަނޑުގެ އިތުރުން  ޔުއެފާ ސުޕަކަޕް އަދި ކުލަބް ވޯލްޑް ކަޕްގައި ކުޅުނު 27 މެޗުގައި ވަނީ އެޓީމަށް 13 ލަނޑު ކާމިޔާބުކޮށްދިފައެވެ.

2022 ވަނަ އަހަރު ބެލްންޑޯ ކާމިޔާބު ކުރި ކަރީމް ބެންޒީމާ ވަނީ ރިއަލް މެޑްރިޑާއިއެކު ޖުމުލަ 25 ތަށި ވަނީ ކާމިޔާބުކޮށްފައެވެ. އޭގެތެރޭގައި ޔޫރަޕުގެ އެންމެ ޝަރަފުވެރި މުބާރާތްކަމުގައިވާ ޔުއެފާ ޗެމްޕިއަންސްލީގު ޗެންޕިއަން ފަސް ފަހަރު،  ކުލަބް ވޯލްޑް ކަޕް ފަސް ފަހަރު، ސްޕެނިޝް ލަލީގާގެ ހަތަރު ފަހަރު، ޔޫއެފާ ސުޕަ ކަޕް ހަތަރު ފަހަރު، ކޮޕާ ޑެލްރޭ ތިން ފަހަރު ހޯދުމުގެ އިތުރުން ސްޕެނިޝް ސުޕަ ކަޕް ހަތަރު ފަހަރު ކާމިޔާބުކޮށްފައިވެއެވެ.