ރައީސް އިބްރާހިމް މުހައްމަދު ޞާލިހުގެ ޅިޔަނު، އަދި އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) އާއި، އެމަނިކުފާނުގެ ކޮއްކޯފުޅު، އަދި ހުޅުމާލޭ ދާއިރާގެ މެންބަރު ޢަލީ ނިޔާޒު ލައްވާ މަޖިލިސް ކޮންޓްރޯލް ކުރުވަން އުޅޭ ކަމަށް މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު ތުހުމަތު ކުރައްވައިފިއެވެ. 

ރައްޔިތުންގެ މަޖިލީހުގެ ނާއިބު ރައީސް އީވާ އަބްދުالله ގެ އިތުބާރު ނެތް ކަމުގެ މައްސަލައެއް މިހާރުވެސް އެމްޑީޕީ ޕީޖީ ގުރޫޕުން މަޖިލީހަށް ވަނީ ހުށަހަޅާފައެވެ. އަދި އޭނާ ވަކިކުރަން ވޯޓު ދިނުމަށް ތްރީލައިން ވިޕެއްވެސް އެމްޑީޕީ ޕީޖީން ވަނީ ނެރެފައެވެ. 

މިއާއެކު، މިއަދު އެޕާޓީގެ ޕީޖީން ވަނީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅަން ނިންމާފައިވާކަން ހާމަކުރައްވާފައެވެ. އަދި އެ މައްސަލަ ހުށަހަޅަން ނިންމެވީ ވަރަށް ކެތް ކުރުމަށް ފަހުގައި ކަމަށާ، އެކަން ކުރައްވަން ޖެހުނީ، ގާނޫނު އަސާސީ އާއި މަޖިލީހުގެ ގަވާއިދަށްވެސް ރައީސް ނަޝީދު ހުރުމަތްތެރިކޮށް ނުހިއްތަވާތީ ކަމަށް އެމްޑީޕީ ޕީޖީ ލީޑަރު އަސްލަމް ވަނީ ވިދާޅުވެފަ އެވެ. 

މަޖިލީހުގެ ރައީސް އާއި ނާއިބު ރައީސްވެސް މަގާމުން ވަކިކުރަން އެމްޑީޕީ ޕީޖީން ނިންމާފައިވާއިރު، އެ މަގާމަށް ދެން ގެންނާނެ ބޭފުޅަކާއި މެދު ގިނަ ބަޔަކު އަންނަނީ ސުވާލު ކުރަމުންނެވެ. އެކަމާއި ގުޅިގެން މިއަދުގެ ޕާލަމެންޓްރީ ގްރޫޕްގެ ނޫސްވެރިންގެ ބައްދަލުވުމުގައިވެސް ސުވާލުކޮށްފައިވާއިރު, އޭގެ ޖަވާބެއް އަސްލަމް ހާމަ ކުރައްވާފައެއް ނުވެއެވެ. 

މިފަދަ ދަނޑިވަޅެއްގައި އެ ކަންކަމާއި ގުޅުވައި ވައްޑޭ މިއަދު ކުރެއްވި ޓްވީޓެއްގައި ވަނީ، ރައީސް ޞާލިހުގެ ޢާއިލާ ބޭފުޅުން ލައްވައި މަޖިލިސް ކޮންޓްރޯލް ކުރައްވަން އުޅޭ ކަމަށް ތުހުމަތު ކުރައްވާފައެވެ. 

އެގޮތުން ވަހީދު ވަނީ ރައްޔިތުންގެ މަޖިލީސް ރައީސް ޞާލިހުގެ ޅިޔަނާއި ކޮއްކޯފުޅު ލައްވައި އޮބަހައްޓައި، ކޮންޓްރޯލު ކުރުވުމަކީ އަލުން އަނބުރާ 90 ގެ ތެރެއަށް ދިޔުން ކަމަށް ސިފަ ކުރައްވާފައެވެ.