ރައްޔިތުން މަޖިލީހުގެ ރައީސް މުހައްމަދު ނަޝީދު ހުޅުމާލެ ދާއިރާގެ މެމްބަރު އަލީ ނިޔާޒަށް އިންޒާރުދީ ބިރުދައްކާ ކަމަށް ބުނެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވީޑިއޯއެއް އާންމުކޮށްފިއެވެ.
އެގޮތުން ރޮޒައިނާ ޓުވިޓާގައި އާންމުކުރި ވީޑިއޯގައި މަޖިލީހުގެ ހުސްވަގުތުގައި މެންބަރުން ތިއްބަވާ ސަރަހައްދަށް ތިނަދޫ އުތުރު ދާއިރާގެ މެންބަރު އަބްދުލްމުގުނީގެ ފަހަތުން ރައީސް ނަޝީދު ވަޑައިގަންނަވައެވެ. އަދި މެންބަރު ނިޔާޒު އިންނެވި މޭޒު ކޮޅާއި ހަމަކުރައްވާ، މުގުނީ އަށް އިޝާރާތްކޮށް އިއްޔެ ނަޝީދުގެ "ގަޔަށް އަރާފަ"ވާ ކަމަށް ވިދާޅުވެއެވެ.
މިއަށްފަހު ނިޔާޒްއަށް އިޝާރާތް ކޮށް "ވިސްނައިގެން ހުންނައްޗޭ" ވިދާޅުވެ އަނބުރާ ވަޑައިގަންނަތަން ވީޑިއޯއިން ފެނިގެން ދެއެވެ.
ވީޑިއޯއާއިއެކު ރޮޒައިނާ ކުރި ޓްވީޓުގައި ވިދާޅުވެފައިވަނީ މަޖިލިސް ތެރޭގައި މަޖިލިސްގެ ރައީސް މެންބަރުންނަށް އިންޒާރުދީ ބިރުދައްކަމުންދާ މައްސަލައަކީ ސީރިއަސް މައްސަލައެއް ކަމަށެވެ.
މިއާއިއެކު މެންބަރުންގެ ރައްކާތެރިކަން ކަށަވަރު ކޮށްދޭންޖެހޭ ފަރާތުން މިއަދު އެތައް މެންބަރުންނަކަށް ބިރުދައްކައި، މަޖިލިސްގެ ނައިބު ރައީސް އީވާ އަބްދުاللهގެ އިތުބާރު ނެތް ކަމުގެ މައްސަލަ އަނބުރާ ގެންދަން އަންގާ އިންޒާރުދީފައިވާ ކަމަށް ރޮޒައިނާ ވިދާޅުވިއެވެ.
މަޖިލީހުގެ ރައީސްކަމުގެ މަޤާމުން އެމްޑީޕީގެ ރައީސް މުޙައްމަދު ނަޝީދު ވަކިކުރުމަށް މަޖިލީހުގެ މެޖޯރިޓީ، އަދި ސަރުކާރު ހިންގާ މައި ޕާޓީ އެމްޑީޕީގެ ޕާލަމެންޓްރީ ގުރޫޕުން މިއަދު ވަނީ ނިންމާފައެވެ.
އެގޮތުން މިއަދު އޮތް ނޫސްވެރިންގެ ބައްދަލުވުމުގައި ބައިވެރިވި 42 މެމްބަރުންގެ ތެރެއިން 36 މެމްބަރުން ވަނީ ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް އެއްބަސްވެފައިކަން އަސްލަމް ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
