މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މަރުފަލިޖަހައިގެން މަޖިލިސް ހޮވުމުން އެމްޑީޕީން ނަޝީދު ކަރުގައި ވާޖަހައިގެން ގަންހިންގަނީ ކަމަށް ރައީސް ޔާމީންގެ އިސް ވަކީލް އަދި ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

ޖަމީލު މިހެން ވިދާޅުވީ މަޖިލީހުގެ ރައީސްކަމުގެ މަޤާމުން ނަޝީދު ވަކިކުރުމަށް މަޖިލީހުގެ މެޖޯރިޓީ، އަދި ސަރުކާރު ހިންގާ މައި ޕާޓީ އެމްޑީޕީގެ ޕާލަމެންޓްރީ ގުރޫޕުން ނިންމުމާ ގުޅިގެންނެވެ.

ޖަމީލު ވިދާޅުވީ ރަައީސް އިބްރާހިމް މުހައްމަދު ޞާލިހަށް ވެރިކަން ލިބުނީ ނަޝީދުގެ އެއްބާރުލުމާއި އެކުގައި ކަމަށާއި އެޖެންޑާ 19އިން މަޖިލިސް ހޮވީ ނަޝީދު މަރުފަލި ޖަހައިގެން ކަމަށެވެ.

Advertisement

އެހެން ނަމަވެސް ނަޝީދު ކަރުގައި ވާ ޖަހައިގެން ރައްޔިތުންގެ ކުރިމަތީގައި ގަންހިންގަނީ ކަމަށް ޖަމީލު ވިދާޅުވިއެވެ.

އެމްޑީޕީގެ ޕާލަމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ ޕީޖީ ލީޑަރު މުހައްމަދު އަސްލަމް ވަނީ ވިނަޝީދު ވަކިކުރުމަށް ޕީޖީ ގްރޫޕުން ނިންމަވާފައިވާ ކަމަށް ވިދާޅުވެފަ އެވެ. 

ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް މިއަދު ޕީޖީގެ ބައްދަލުވުމެއްގައި ވަނީ މަޝްވަރާކުރެވިފައެވެ. އެ ބައްދަލުވުމުގައި ބައިވެރިވި 42 މެމްބަރުންގެ ތެރެއިން 36 މެމްބަރުން ވަނީ ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް އެއްބަސްވެފައިކަން އަސްލަމް ފާހަގަކުރެއްވި އެވެ.