ރެއާލް މެޑްރިޑުގެ ކެޕްޓަން ކަރީމް ބެންޒެމާ ނެތްތަން އަންނަ ސީޒަންގައި ފޫބެއްދުމަށް އެކުލަބުން އެންމެ ބޮޑަށް ބޭނުންވާ ކުޅުންތެރިއަކީ ޓޮޓެންހަމް އަށް ކުޅެމުން އަންނަ އިނގިރޭސި ފޯވާޑް ހެރީ ކޭން ކަމުގައި މީޑީއާ ރިޕޯޓްތައް ބުނެފިއެވެ.

އުމުރުން 29 އަހަރުގެ ކޭން ޓޮޓެންހަމްއާއިއެކު ހަދާފައިވާ ކޮންޓްރެކްޓުގައި އަދި ބާކީ އެއް އަހަރު އެބައޮތެވެ. އެކި ފަހަރުމަތިން ޔޫރަޕްގެ ބޮޑެތި ޓީމްތަކުން ކޭން ހޯދުމަށް މަސައްކަތްކުރި ނަމަވެސް މިހާތަނަށް އެކަން އެއްވެސް ކުލަބަކަށް ކާމިޔާބު ކުރެވޭގޮތް ވަނީ ނުވެފައެވެ.

ރެއާލް މެޑްރިޑްގެ އިތުރުން އިގިރޭސި ވިލާތުގެ މެންޗެސްޓާ ޔުނައިޓެޑާއި ޖަރުމަނުގެ ބަޔާން މިއުނިކް އިން ކޭން ހޯދުމަށް ޝައުގުވެރިކަން ފާޅުކޮށްފައިވާއިރު، ކުރިން ބެލެވިފައި އޮތީ މެންޗެސްޓާ ޔުނައިޓެޑުން ކޭންގެ ޓްރާންސްފާ ކާމިޔާބުކުރާނެކަމަށެވެ.

Advertisement

ނަމަވެސް މިޑިއާ ރިޕޯޓްތައް ބުނާގޮތުގައި ޓޮޓެންހަމް އިން ވާދަވެރި ޓީމަކަށް ކޭން ވިއްކާލުމަށް ވުރެ ފުރުސަތު ބޮޑު ރެއާލް ނުވަތަ ބަޔާން މިއުނިކަށް ވިއްކާލުމެވެ.

ހެރީ ކޭން އަކީ ޓޮޓެންހަމްގެ ތާރީޚްގައި އެކުލަބަށް އެންމެ ގިނަ ލަނޑުޖެހި ކުޅުންތެރިޔާ އެވެ. ޓޮޓެންހަމްއަށް ކުޅެދިން 435 މެޗުގައި ކޭން ވަނީ 280 ލަނޑު އެކުލަބަށް ކާމިޔާބުކޮށްދީފައެވެ.

ނަމަވެސް އޭނާ ކުލަބު ބަދަލުކުރަން ބޭނުންވާ އެންމެ ބޮޑު ސަބަބަކީ ކެރިއަރުގައި ތަށިތަކެއް ހޯދުމެވެ. އަދި ފާއިތުވެދިޔަ ދުވަސްތަކުގައި ރެއާލް މެޑްރިޑާއި ޓޮޓެންހަމް އާއި ދެމެދުގައި ވަނީ ކާމިޔާބު ވިޔަފާރިތަކެއް ކޮށްފައެވެ. އޭގެތެރޭގައި ޓޮޓެންހަމް ދޫކޮށް ރެއާލް މެޑްރިޑަށް ބަދަލުވި ލޫކަ މޮޑްރިޗް އާއި ގެރެތު ބޭލް ވަނީ ރެއާލްގައި ބޮޑެތި ކާމިޔާބީތަކެއް ހޯދާފައެވެ.

މީގެއިތުރުން ވެސް މެންޗެސްޓާ ޔުނައިޓެޑުގެ މިހާރުގެ ހާލަތަށް ބަލާއިރު ހެރީ ކޭންގެ ހުވަފެންތައް ހަގީގަތަކަށް ވުމުގެ ފުރުސަތު ބޮޑީ ރެއާލް މެޑްރިޑް ގައެވެ.

މި ސީޒަނަށް ފަހު ރެއާލު ދޫކޮށްލާނެކަން މިހާތަނަށް ވަނީ ހަތަރު ކުޅުންތެރިއަކު އިޢުލާން ކޮށްފައެވެ. އެއީ ހަޒާޑްއާއި މަރިއާނޯއާއި އެސެންސިއޯގެ އިތުރުން ބެންޒެމާއެވެ. ވުމާއެކު ކޭން ގަތުމަށް ބޮޑު ހޭދައެއް ކުރަން ޖެހުނު ނަމަވެސް ރެއާލަށް ތައްޔާރަށް އޮތްކަމަށް މިޑިއާ ރިޕޯޓްތައް ބުނެއެެވެ.

ކުރިއަށް އޮތް ސީޒަނަށް ޓީމު ވަރުގަދަ ކުރުމުގެގޮތުން ރެއާލް މެޑްރިޑުން ފާރަލަމުން އަންނަ ފޯވާޑުންގެ ތެރޭގައި ކޭންގެ އިތުރުން މި ސީޒަންގައި ނަޕޯލީގައި މޮޅު ކުޅުމެއް ދެއްކި ވިކްޓަރ އޯސިމެން، އިންޓަ މިލާނަށް ކުޅެމުން އަންނަ އާޖެންޓީނާގެ ފޯވާޑް ލައުޓާރޯ މާޓިނޭޒް، ޗެލްސީއަށް ކުޅެމުން އަންނަ ޖަރުމަނުގެ ފޯވާޑް ކައި ހަވާޓްޒްގެ އިތުރުން ޔުވެންޓަސް އަށް ކުޅެމުން އަންނަ ޑޫސަން ވަލޮހޮވިޗް ހިމެނެއެވެ.

މީގެ އިތުރުން ބްރޫޝިއާ ޑޯޓްމަންޑަށް ކުޅެމުން އަންނަ އިނގިރޭސި އެޓޭކިން މިޑްފީލްޑަރު ޖޫޑް ބެލިންހަމް އަންނަ ސީޒަނުގައި ރެއާލް މެޑްރިޑަށް ބަދަލުވާން އެއްބަސްވެފައިވާކަމަށް ދުނިޔޭގެ ކުޅިވަރު ހަބަރު ފަތުރާ ބޮޑެތި މީޑިއާތަކުން ވަނީ ރިޕޯޓްކޮށްފައެވެ.