"ދަ ޑިމޮކްރެޓްސް"އިން އިލެކްޝަންސް ކޮމިޝަނަށް ހުށަހެޅި ފޯމުތަކުގެ މައުލޫމާތު ލީކްކޮށްފައި ނުވާނެ ކަމަށް އެ ކޮމިޝަނުން ބުނެފިއެވެ.

'ދަ ޑިމޮކްރެޓްސް' ޕާޓީއަށް ސޮއިކުރި މީހުންގެ ލިސްޓު އީސީގެ ތެރެއިން ލީކްވި ކަމަށް އެ ޕާޓީން ވަނީ ތުހުމަތު ކޮށްފައެވެ. 

އެކަމާ ގުޅިގެން އީސީން ނެރުނު ބަޔާނެއްގައި ބުނީ، އެފަދަ އެއްވެސް ކަމެއް އެ ކޮމިޝަންގެ ތެރޭގައި ހިނގާފައި ނުވާ ކަމަށާއި އެފަދަ އެއްވެސް އަމަލެއް އެ ކޮމިޝަންގެ އެއްވެސް މުވައްޒަފަކު ހިންގާފައި ނުވާނެ ކަމަށެވެ.

Advertisement

ރިޔާސީ އިންތިޚާބަށް އެ ކޮމިޝަނުން ތައްޔާރުވަމުންދާ މި ދަނޑިވަޅުގައި ކޮމިޝަނާއި ކޮމިޝަންގެ މެމްބަރުންނަށް ރައްޔިތުންގެ މެދުގައި އޮންނަ އިތުބާރު ގެއްލޭގޮތަށް އެއްވެސް ވާހަކައެއް ނުފެތުރުމަށް އެ ކޮމިޝަނުން ވަނީ އިލްތިމާސް ކޮށްފައެވެ.

ދަ ޑިމޮކްރެޓްސް އިން މިދިޔަ އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ކުރީގެ ނާއިބު ރައީސް މުހައްމަދު ޝިފާޒު ވަނީ ދަ ޑިމޮކްރެޓްސް އަށް ސޮއިކޮށްފައިވާ މެމްބަރުންގެ ލިސްޓެއް އިލެކްޝަންސް ކޮމިޝަންގެ ތެރެއިން ލީކުވެފައިވާ ކަމަށް ތުހުމަތު ކުރައްވާފައެވެ. 

އަދި އެއީ ދަ ޑިމޮކްރަޓްސް އުފެއްދުމާއި ދެކޮޅަށް މި ސަރުކާރުގައި ތިއްބެވި ބޭފުޅުން އިންތިޒާމްވެގެން ކުރަމުން އަންނަކަމެއްކަން ލިބިފައިވާ މައުލޫމާތުތަކުން ހާމަވާކަމަށާއި ސަރުކާރުގެ އިސް އޮފިޝަލުންއިން ފެށިގެން އާދައިގެ ގިންތީގައި ތިއްބެވި ސިޔާސީ މުވައްޒަފުންނާއި ހިސާބުގައި މި ލިސްޓުތައް ގެންގުޅޭކަމަށް ޝިފާޒް ތުހުމަތުކުރެއްވިއެވެ.

އަދި އެ ލިސްޓު އާންމުވުމާ އެކު، ލިސްޓުގައި ތިބި މީހުންނަށް ވަކިވަކިން ގުޅައި ސަރުކާރުގެ ބޭފުޅުން ބިރުދައްކަން ފަށާފައިވާ ކަމަށްވެސް ޝިފާޒު ވަނީ ތުހުމަތު ކުރައްވާފަ އެވެ. 

"ކޮމިޝަނުން ފޯމުތައް ވެރިފައި ކުރުމަށް މެސެޖް ކުރުމުން "ތިއީ ތިމަންނާއަށް ނޭނގި ލާފައިވާ ފޯމެއް" ކަމަށް ބުނަން ވެސް ސަރުކާރުގެ ބޭފުޅުން ބާރު އަޅަމުން އެބަދޭ." ޝިފާޒު ވިދާޅުވިއެވެ. 

މީގެ އިތުރުން ދަ ޑިމޮކްރަސްޓްއިން އީސީއަށް ފޯމްތައް ހުށައެޅިއިރު ހިމަނާފައިނުވާ މައުލޫމާތުވެސް އެ ލިސްޓުގައި އެކި ގޮތް ގޮތުން ހޯދައިގެން އެބަހުރިކަން ފާހަގަކުރައްވައި ޝިފާޒު ވަނީ އެއީ އީސީގެ ތެރެއިން ކޮށްފައިވާކަމެއްކަމަށްވެސް ތުހުމަތު ކުރައްވާފައެވެ. 

"ފޯމު ފުރާއިރަކު ހަމަ ގާމުވެސް އަޅުގަނޑުމެންނަކަށް ނޭނގޭނެ، ފޯމް ފުރާފައި އިން ބޭފުޅާ އެއީ މިހާރު ކޮން ޕާޓީއެއްގައި އުޅޭ ބޭފުޅެއްކަމެއް ނޭނގޭނެ. އެހެންނަމަވެސް އިލެކްޝަންސް ކޮމިޝަނަށް މުޅި ލިސްޓު ބެލީމަ، އިނގޭނެ މިހާރު ޕާޓީއެއްގަ އިނިއްޔާވެސް ނެތިއްޔާވެސް. މި ހުރިހާ މައުލޫމާތަކާއިއެކީގައި އެވަނީ އެ ލިސްޓު އާންމުވެފައި." ޝިފާޒް ވިދާޅުވިއެވެ.

މިއީ ކިހިނެއް ހިނގިކަމެއްތޯ ބެލުމަށްޓަކައި އީސީއަށް ހުށައަޅާފައިވާނެކަމަށާއި، އަދި އެކަން ތަހުގީގުކޮށްދިނުމަށް ފުލުހުގެ މުއައްސަސާއިވެސް އެދިފައިވާނެކަމަށް ޝިފާޒް ވިދާޅުވިއެވެ.