އިނގިރޭސި ޕްރިމިއާ ލީގުގެ ބްރައިޓަންއަށް ކުޅެމުން އަންނަ އާޖެންޓީނާގެ މިޑްފީލްޑަރ އެލެކްސިސް މެކް އެލިސްޓާ ލިވަޕޫލަށް ބަދަލުވާން ނިންމައިފިއެވެ.

އުމުރުން 24 އަހަރުގެ މިޑްފީލްޑަރު ލިވަޕޫލަށް ބަދަލުވަނީ 55 މިލިއަން ޕައުންޑްގެ ޓްރާންސްފާ ފީއަކަށެވެ. އެލިސްޓާ ވަނީ މިހާރު ބްރައިޓަންގެ ހުއްދަ އާއެކު ލިވަޕޫލްގެ މެޑިކަލް ވެސް ފުރިހަމަ ކޮށްފައެވެ.

އެލެކްސިސް މެކް އަލިސްޓާ ބްރައިޓަންއާއި އެކު ހަދާފައިވާ ކޮންޓްރެކްޓްގައި އަދި ބާކީ އެއް އަހަރު އެބައޮތެވެ. އަދި އޭނާ ލިވަޕޫލާއި ގުޅެނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. ލިވަޕޫލާއިއެކު އޭނާ ހަދާ އެއްބަސްވުން ހަމަވާނީ 2028 ވަނަ އަހަރުގެ ސީޒަންގެ ނިޔަލަށެވެ.

Advertisement

ބްރައިޓަންގެ ތާރީޚުގައި އެ ޓީމް ފުރަތަމަ ފަހަރަށް ޔޫރަޕްގެ ފުޓްބޯޅައަށް ކޮލިފައި ކޮށްދިނުމުގައި އެ ޓީމްގެ މިޑްފީލްޑުގައި މެކް އަލިސްޓާ ވަނީ މުހިންމު ދައުރެއް އަދާކޮށްފައެވެ. މީގެ އިތުރުން އެޓީމަށް ކުޅެދިން 112 މެޗުގައި އެލިސްޓާ ވަނީ 20 ލަނޑު އެކުލަބަށް ކާމިޔާބުކޮށްދިފައެވެ.

2022/23 ސީޒަން ބްރައިޓަން އިން ނިންމާލީ ޕްރެމިއާ ލީގު ތާވަލުގެ ހަ ވަނައިގައެވެ. މި އާއެކު އެޓީމަށް ވަނީ އަންނަ ސީޒަނުގެ ޔުއެފާ ޔޫރޮޕާ ލީގުގައި ކުޅުމުގެ ފުރުސަތު ލިބިފައެވެ.

2022 ވަނަ އަހަރު ގަތަރުގައި ބޭއްވި ވޯލްޑް ކަޕް ފުޓްބޯޅަ މުބާރާތް އާޖެންޓީނާއަށް ކާމިޔާބު ކޮށްދިނުމުގައި މުހިންމު ދައުރެއް އަދާކޮށްދިން އެލެކްސިސް މެކް އެލިސްޓާ ވަނީ މިހާތަނަށް ގައުމީ ޓީމަށް 16 މެޗު ކުޅެދީފައެވެ.

މި ސީޒަން ނިމުމާއިއެކު ލިވަޕޫލްގެ މެދުތެރެއަށް ކުޅެމުން ދިޔަ ބައެއް ކުޅުންތެރިން އެ ޓީމް ދޫކޮށްލަން ވަނީ ނިންމާފައެވެ. އެ ކުޅުންތެރިންގެ ތެރޭގައި ޖޭމްސް މިލްނާ، ނަބީ ކެއިޓާ ހިމެނެއެވެ. މިއާއެކު އަންނަ ސީޒަނަށް ލިވަޕޫލުގެ މެދުތެރެ ވަރުގަދަކުރުމަށް އެންމެ ފުރަތަަމަ އެޓީމުން ހޯދަން މަސައްކަތް ކުރީ ބްރޫޝިއާ ޑޯޓްމަންޑަށް ކުޅެމުން އަންނަ އިންގްލެންޑް ޒުވާން މިޑްފީލްޑް ކުޅުންތެރިޔާ ޖޫޑް ބެލިންހަމް އެވެ.

ނަމަވެސް އަންނަ ސީޒަނުގައި އެޓީމަށް ޗެންޕިްއަންސް ލީގުން ޖާގައެއް ނުލިބުމުގެ އިތުރުން ޑޯޓްމަންޑް އިން އެކުޅުންތެރިޔާ ވިއްކާލުމަށް ކިޔާ އަގު ބޮޑުވުމުގެ ސަބަބުން ލިވަޕޫލް އެޓީމުގެ ވިސްނުން ބަދަލުކޮށް އެލިސްޓާގެ ސޮއި ހޯދީއެވެ.