ވ. އާރަށު މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރު މަހުގެ 25 ގައި އެމަނިކުފާނުގެ މައްޗަށް ކޮށްފައިވާ ހުކުމާއި ގުޅޭ އިސްތިއުނާފު އަޑުއެހުންތައް ހައިކޯޓުގައި ފަށައިފި އެވެ.

މިއަދުގެ އަޑުއެހުމުގައި ކުރިއަށް ގެންގޮސްފައިވަނީ އެ މައްސަލައިގައި ހުކުމް ކޮށްފައިވާ ޔޫސުފް ނައީމުގެ ފަރާތްޕުޅުން ހުށައަޅާ އިސްތިއުނާފީ ނުކުތާތައް ހުށައެޅުމެވެ.

އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ޔޫސުފް ނައީމުގެ މައްޗަށް ކޮށްފައިވަނީ ރިޝްވަތު ދިނުމުގެ ކުށުގެ ދައުވާއެވެ. އެ ދައުވާ އޭނާގެ މައްޗަށް ސާބިތުވާކަމަށް ކަނޑައަޅާ ކްރިމިނަލް ކޯޓުން ވަނީ 3 އަހަރާއި ދެ މަހާއި 12 ދުވަހުގެ ޖަލު ހުކުމެއް ޔޫސުފް ނައީމުގެ މައްޗަށް ކޮށްފަ އެވެ.

އެ ހުކުމް ޔޫސުފް ނައީމުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާއިރު، ޖުމަލް 4 އިސްތިއުނާފީ ނުކުތާއެއް ޔޫސުފް ނައީމުގެ ފަރާތްޕުޅުން ވަނީ ހައިކޯތަށް ހުށައަޅާފަ އެވެ.

ޔޫސުފް ނައީމުގެ ފަރާތުން އެންމެ ފުރަތަމަ ހުށައެޅީ ޝަރީއަތް ފެށުމަށްފަހު ދައުލަތުން ހުށައަޅާފައިވާ ހެކިތައް ބަލައިގެންފައިވާތީ ހުށައެޅި ނުކުތާއެވެ.

ޔޫސުފް ނައީމުގެ ފަރާތްޕުޅުން ގާނޫނީ ވަކީލުން ވަނީ ރައީސް ޔާމިނަށް ފައިސާ ދިނީ އާރަށް ކުއްޔަށް ދޫކުރުމުގެ މުގާބިލުގައިކަމަށް ދައުލަތުން ތުހުމަތުކުރާއިރު، ރިސޯޓެއް ތަރައްގީކުރުމަށްޓަކައި ރަށެއް ތިންވަނަ ފަރާތަކަށް ދިނުމަކީ ރައީސްގެ ރަސްމީ ހައިސިއްޔަތުގައި ހިމެނޭ ކަމެއް ނޫންކަން ޔޫސުފް ނައީމަށް ގަބޫލުކުރެވެން ޖެހޭ ސަބަބެއް ގާނޫނުލްއުގޫބާތުގައި ގާނޫނުގައި ބުނެފައިވާ ގޮތުގެ މަތިން ދައުލަތަށް ބުނެ ނުދެވޭކަމަށް ވިދާޅުވެފަ އެވެ.

އޭގެ އިތުރުން ދަށުކޯޓުން ދައުވާ ސާބިތުކުތުމަށް ކަނޑައެޅުމަށްފަހު އަދަބާއި ގުޅޭގޮތުން ވާހަކަ ދެއްކުމަށް އެކީށެންވާ ވަގުތު ދީފައި ނުވާކަން ވެސް ވަކީލުން ފާހަގަކުރެއްވި އެވެ.

އަދި ޔޫސުފް ނައީމުގެ މައްޗަށް ޖަލު ހުކުމެއްކޮށް، އެ އަދަބު ނޫން އެހެން އަދަބެއް ކަނޑައަޅާފައި ނުވަނީ ރަނގަޅަށް ނޫންކަމަށް އޭނާގެ ވަކީލުން ފާހަގަކުރެއްވި އެވެ.

ޔޫސުފް ނައީމުގެ ފަރާތްޕުޅުން މި ނުކުތާތައް މިއަދު ކޯޓަށް ހުށައަޅާފައި ވާއިރު، އެ ކަންކަމާއި ގުޅޭގޮތުން ހައިކޯޓުން ގޮތެއް ނިންމާދިނުމަށް ވެސް ޔޫސުފް ނައީމުގެ ވަކީލުން ވަނީ އެދިވަޑައިގަންނަވާފަ އެވެ.

އެ މައްސަލައާއި ގުޅިގެން ދައުލަތުން ބުނެފައިވަނީ، ޔޫސުފް ނައީމުގެ މައްޗަށް ކޮށްފައިވާ ހުކުމަކީ ގާނޫނުގައި ބަޔާންކުރާ އަސްލު ހުކުމް ކަމަށެވެ. އަދި އެ ހުކުމާއި ގުޅޭގޮތުން ވާހަކަދައްކާ ތައްޔާރުވުމަށް އެކަށީގެންވާ ވަގުތު ވެސް ލިބިފައިވާ ކަމަށެވެ.

އެހެންކަމުން ހުކުމް ބަދަލުކުރަންޖެހޭ ހާލަތެއް ނެތްކަމަށް ދައުލަތުން ވަނީ ބުނެފައެވެ.

މިއަދުގެ އަޑުއެހުމުގައި ރައީސް ޔާމިނުގެ ފަރާތްޕުޅުން ހުށައަޅާ ނުކުތާތައް ހުށައެޅުމަށް އޮތީ ތާވަލުކުރެވިފަ އެވެ.

އެހެން ނަމަވެސް ޝަރީއަތަށް ކަނޑައެޅިފައިވާ ވަގުތު ހަމަވެ ޝަރީއަތް ދިގުލައިގެން ދާތީ، ހައިކޯޓުން ނިންމެވީ ރައީސް ޔާމިންގެ ފަރާތްޕުޅުން ހުށައަޅާ ކަންކަން އެ މައްސަލައާއި ގުޅިގެން ދެން އޮންނަ އަޑުއެހުމެއްގައި ހުށައެޅުމަށެވެ.

އެއާއެކު މިއަދުގެ އަޑުއެހުން ވަނީ ކުރުކޮށްލާފަ އެވެ.