ދިވެހި ބަހުން ލިޔެފައި ހުންނަ ލިޔުންތައް ކިޔައިދޭ ލޯފަން ފަރާތްތަކަށް ޚާއްސަ އެޕްލިކޭޝަނެއް އުފެއްދުމަށް ބްލައިންޑް އެންޑް ވިޝުއަލް އިމްޕެއަރޑް ސޮސައިޓީ އޮފް މޯލްޑިވްސް (ބީވީއައިއެސްއެމް) އާއި ޖަވާބު އެކަޑަމީއާއި ދެމެދު ސޮއިކޮށްފިއެެވެ.
މި ކަމާއި ގުޅޭ ގޮތުން "ވޮއިސް" އާއި ވާހަކަ ދައްކަވަމުން ބީވީއައިއެސްއެމް ގެ ނައިބް ރައީސް ހުސެއިން ޝަރީފް ވިދާޅުވީ މި ޕްރޮޖެކްޓަކީ ޔޫއެންޑީޕީ އިން ކުރިއަށް ގެންދާ މިޔަހެލި ސޯޝަލް އިނޮވެންޝަން ޗެލެންޖް ގެ ދަށުން ފަންޑު ލިބިގެން ކުރިއަށް ގެންދާ ޕްރޮޖެކްޓެެއް ކަމަށެވެ.
އެގޮތުން ޔޫއެންޑީޕީގެ ފަރާތުން 2022 ވަނަ އަހަރު ޖަމިއްޔާ ތަކަށް ހުޅުވާލައިގެން އެކަން ކުރިއަށް ގެންދިޔަ އިރު އެޖަމިއްޔާއިން އެކަމުގައި ބައިވެރިވެ ހުށައެޅުނު ޙިޔާލު ތަކުން އެންމެ ރަނގަޅު ތިން ކަންތަކުގެ ތެރޭގައި ހިމެނި އެޖަމިއްޔާ އަށް 3ލައްކަ ރުފިޔާގެ ބަޖެޓެއް ހަމަޖެހިގެން ދިޔަ ކަމަށެވެ.
މިޔަހެލި އިނޮވެންޝަން ޗެލެންޖްގައި ހުށައަޅަން ޖެހެނީ މުޖްތަމަޢުގައު ގައި ހުރި ދަތިކަންތައްތަކުގެ ތެރެއިން ކަމެއް ލުއި ކޮށްދިނުމަށް އެއްޗެއް އުފެއްދުން ނުވަތަ ކަމެއް ކުރުމުގެ ޙިޔާލެވެ. އެގޮތުން ބީވީއައިއެސްއެމްގެ ފަރާތުން ހުށައެޅީ ދިވެހި ބަހުން ލިޔެފައި ހުންނަ ތަކެތި ކިޔައިދޭނެ އެޕްލިކޭޝަން އެއް އުފެއްދުމެވެ.
"އަޅުގަނޑުމެން ފެނުމުގެ ނުކުޅެދުންތެރިކަން ހުންނަ ކުދިން ޚާއްސަކޮށް މި ޑިޖިޓަލް އެއްޗެހި ރީޑް ކުރަން ބޭނުން ކުރަނީ، ސޮފްޓް ޑޮކިޔުމަންޓް ވެބްސައިޓް އެއްޗެހިވެސް ރީޑް ކުރަން ފޯނު ކޮމްޕިޔުޓަރ ފަދަ އެއްޗެހިން އެއެްޗެހި ރީޑް ކުރަން މިބޭނުން ކުރަނީ ޓެކްސްޓް ޓު ސްޕީޗް ނުވަތަ ސްކްރީން ރީޑަރ" ވޮއިސް އާއި ވާހަކަ ދައްކަވަމުން ހުސެއިން ވިދާޅުވިއެވެ.
އެފަދަ އެޕްލިކޭޝަންތައް ބޭނުން ކުރާއިރު އޭގައި ދިވެހި ބަހުގެ އަޑުތައް ނުހުރުމަކީ ދިމާވާ ވަރަށް ބޮޑު ދަތި ކަމެއް ކަމަށް ހުސެއިން ފާހަގަ ކުރެއްވެވިއެވެ.އަދި އެފަދަ އެޕްލިކޭޝަން އެއް އުފެއްދުމަށް ބޭނުންވެފައި ވަނީ ވެސް މިސަބަބަށް ޓަކައި ކަމަށް ހުސެއިން ވިދާޅުވިއެވެ.
"އަޅުގަނޑުމެން ހުށައެޅީ ރިއަލްޓައިމް އެންޑްރޮއިޑް އެޕްލިކޭޝަން އެއް ހެދުމަށް، ތާނައިން ލިޔެފައި ހުންނަ އެެއްޗެހި ރީޑް ކުރެވޭގޮތައް، އަދި ޓައިޕް ކުރެވޭ ގޮތައް، މާނައަކީ ކިޔާ އެއްޗެހި ލިޔާ ގޮތައް، ލިޔެފައި ހުންނަ އެއްޗެހި ކިޔާދޭގޮތައް، ރިއަލްޓައިމް އޭ މިފާހަގަ ކުރަނީ ފޯނުން ވިޔަސް ލެޕްޓޮޕުން ވިޔަސް އެ ޓެކްސް އަކަށް ފޯކަސް ކޮށްލުމުން އެެއެއްޗެއް ކިޔައިދޭގޮތައް" ހުސެއިން ވިދާޅުވިއެވެ.
ހުސެއިން ވިދާޅުވީ ފަންޑު ލިބުމާއި އެކު މި އެޕްލިކޭޝަން އުފައްދައިދޭނެ ބަޔަކު ހޯދަން އިޢުލާނު ކުރުމުން ކުރިމަތި ލީ ޖަވާބުން އެކަނި ކަމަށެވެ.
"ޕްރޮޖެކްޓް ރާވައިފައި ވާގޮތައް ނިމިއްޖެ ނަމަ އަޅުގަނޑުމެން ފަދަ ކުދިންނަށް ވަރަށް ބޮޑު ފަސޭހައަކަށް ވެގެންދާނެ، ދިވެހި ރީޑް ކުރާ ޓެކްސްޓް ސްޕީޗް ރިއަލްޓައިމް އެޕްލިކޭޝަންއެއް މިހާތަނަކަށް ނެތް އަދިއެެއް ހެދިފައެެއް" ހުސެއިން ވިދާޅުވިއެވެ.
ހުސެއިން ވިދާޅުވީ ލޮލަށް ނުފެންނަ ފަރާތްތަކަށް ކިޔެވުމާއި ވަޒީފާތަ އަދާކުރުމަށް އޮތް އެންމެ ބޮޑު ހުރަހަކަށް ވެފައި ވަނީ ލިޔުމާއި ކިޔުމަށް އޮތް ހުރަސް ކަމަށެވެ. އަދި މި އެޕްލިކޭޝަން ކާމިޔާބު ކަމާއި އެކު ނިމިއްޖެނަމަ އެކަމަށް ހައްލެއް ލިބިގެންދާނެ ކަމަށް އޭނާ ވިދާޅުވިއެވެ.
ހުސެއިން އިތުރަށް ވިދާޅުވީ މިއުފައްދާ އެންޑްރޮއިޑް އެޕްލިކޭޝަން ކާމިޔާބު އެއްޗަކަށް ވެއްޖެނަމަ އޭގެ ވިންޑޯސް އެޕްލިކޭޝަން އެއް އުފެއްދުމަށް ވިސްނާފައިވާކަމަށެވެ.
މި ފަދަ އެޕްލިކޭޝަން އެއް އުފައްދައި ކާމިޔާބު ކަމާއި އެކު ބޭނުން ކުރެވޭ ގޮތް ވެއްޖެނަމަ ރާއްޖޭގައި ތިބި ފެނުމުގެ ނުކުޅެދުން ތެރިކަން ހުރި ފަރާތްތަކަށް ލިބިގެންދާ ވަރަށް ބޮޑު ފަސޭހަ އަކަށް އެކަން ވެގެން ދާނެއެވެ. ކިޔެވުމަށް ބޭނުން ވެފައި ތިބި އެފަދަ ކުދިންނަށް އެހީއަކަށް ވާނެއެެވެ.
ދާދި ފަހުން ރާއްޖެގެ އިސްލާމިކް ޔުނިވަރސިޓީ އިން ފެނުމުގެ ނުކުޅެދުންތެރިކަން ހުރި ދަރިވަރުންތަކެއް ވަނީ ޑިގްރީ ހާސިލް ކުރައްވައިފައެވެ.
Advertisement
This content is created and paid for by advertisers and does not involve Voice Journalists
