ޗާގޯސްގެ މައްޗަށް މޮރިޝަސްގެ ސިޔާދަތީ ބާރު ލިބިގެންވާ ކަމަށް ރާއްޖޭން ބަލައިގަންނަކަން ބަޔާންކޮށް ރައީސް އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވާފައިވާ ސިޓީފުޅަށް ރައްޔިތުން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިިޓީ (241 ކޮމިޓީ) އިން އެދިއްޖެ ނަމަ އެ ސިޓީފުޅު އެ ކޮމިޓީއާ ހިއްސާ ކުރައްވާނެ ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވެއްޖެއެވެ.

މިއުވާން މިހެން ވިދާޅުވީ މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ރައީސްގެ ސިޓީފުޅާއި ބެހޭގޮތުން ނޫސްވެރިިއެއް ކުރި ސުވާލަށް ޖަވާބު ދެއްވަމުންނެވެ.

އެގޮތުން މިއުވާން ވިދާޅުވީި މީގެ ކުރިންވެސް ނޫސްވެރިންގެ ބައްދަލުވުމުގައިވެސް، ރައްޔިތުން މަޖިލީހުގެ 241 ކޮމިޓީއިން އެދިއްޖެ ނަމަ އެ ކޮމިޓީއަށް އެސިޓީފުޅު ރައީސް ފޮނުވާނެ ކަން ފާހަގަކޮށްފައިވާނެ ކަމަށެވެ.

އެހެންނަމަވެސް އާންމު އުސޫލެއްގެ ގޮތުން ދުނިޔޭގެ ދެގައުމުގެ ވެރިންގެ ދެމެދުގައި ބަދަލުކުރެވޭ ލިޔެކިިޔުންތައް ނުވަތަ ސިޓީފުޅުތަކަކީ އެއްވެސް ތަނެއްގައި އާންމު ކުރާ އެއްޗެއް ނޫން ކަމަށް މިއުވާން ވިދާޅުވިއެވެ.

އަދި މީގެ ކުރިން ރާއްޖޭގައިވެސް އެހެން ގައުމެއްގައިވެސް މިއީ ކޮށްއުޅޭ ކަމެއް ނޫން ކަމަށް މިއުވާން ފާހަގަކުރެއްވިއެވެ.

"މި ވަގުތު އެ ސިޓީ ފުޅުގެ ވާހަކަ ދައްކަވާ ބައެއް ބެފުޅުން ސިޔާސީ ބޭނުމަކަށް އެއީ އާންމުކޮށް މީހުން ކުރާ ކަމެއް ކަމަށް ދައްކަން އުޅުނަސް އެއީކީ ހަމަ ބުއްދިއިން ގަބޫލު ކުރެވޭ ކަމެއް ނޫން އެކަހަލަ ކަންކަން ކުރުމަކީ." މިއުވާން ވިދާޅުވިއެވެ.

މިއާއިއެކު ދުނިޔޭގެ ދޭދޭ ލީޑަރުންގެ މެދުގައި މިި ބަދަލު ކުރެވޭ ކޮރެސްޕޮސްޑެންސްއަކީ ސިއްރު ހިފެއްޓެ އެއްޗެއް ކަމަށް މިއުވާން ފާހަގަކުރެއްވިއެވެ.

"އެހެންނަމަވެސް ރައްޔިތުން މަޖިލީހުގެ 241 ކޮމިޓީއިން އެކަމަށް އެދިއްޖެ ކަމަށް ވާނަމަ ސިޓީ ހިއްސާ ކުރައްވާނެ." މިއުވާން ވިދާޅުވިއެވެ.

މިއުވާން މިއަދު މިހެން ވިދާޅުވެފައިވާއިރު، އެމްޑީޕީގެ ޕާލިމެންޓަރީ ގުރޫޕުން އަންގާރަ ދުވަހު ބޭއްވި ނޫޫސްވެރިންގެ ބައްދަލުވުމުގައި، 241 ކޮމިޓީގެ މުގައްރިރުކަން އަލުން ލިބިއްޖެނަމަ، ރައީސްގެ ސިޓީފުޅު ހޯދަން ރައީސް އޮފީހަށް ހުށަހަޅާނެ ކަމަށް އެެ ކޮމިޓީގެ މުގައްރިރުކަން މިހާތަނަށްވެސް ކުރައްވަމުން އައި އެމްޑީޕީ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވަނީ ވިދާޅުވެފައެވެ.