Advertisement

ރިސޯޓް ލީގު 2023: ލީގު ބުރުގެ ދެވަނަ ޓީމުގެ ގޮތުގައި ޕްލޭއޮފް ފުރަތަމަ ޖާގަ ވިލަމެންދުއަށް!

08 Jun 2023 | 19:51
ވިލަމެންދޫ އާއި ރެޑިސަން ބްލޫ ވާދަކުރި މެޗުގެ ތެރެއިިން

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ އަރި ޒޯނުގައި މިއަދުގެ ހަވީރު ކުޅެވުނު، ފުރަތަމަ މެޗުގައި 8-1 ގެ ތަފާތުބޮޑު ނަތީޖާއަކުން ރެޑިސަން ބްލޫ ބަލިކޮށް ވިލަމެންދޫ އިން ލީގު ބުރުގެ ދެވަނަ ޓީމުގެ ގޮތުގައި ޕްލޭއޮފް ގެ ފުރަތަަމަ ޖާގަ ކަށަވަރުކޮށްފިއެވެ.

ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ވިލަމެންދޫ އިންނެވެ. މި ލަނޑު ފުރަތަމަ ހާފުގެ 07 ވަނަ މިނެޓުގައި ކާމިޔާބުކޮށްދިނީ އިހުސާން މަންސޫރު އެވެ. މިއީ ރެޑިސަން ބްލޫގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. 

ވިލަމެންދޫ ގެ ދެވަނަ ލަނޑު ފުރަތަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ ވެސް އިހުސާން އެވެ. މިއީ ވެސް ރެޑިސަން ބްލޫގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. 

ފުރަތަަމަ ހާފު ނިމެން ދެމިނެޓަށް ވެފައި ވަނިކޮށް ރެޑިސަން ބްލޫ އިން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ހަސަން ޝަޔާމްއެވެ. މިއީ ވިލަމެންދޫ ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ވިލަމެންދޫ ކުރީގައި އޮވެގެންނެވެ.

ދެވަނަ ހާފުގައި ވިލަމެންދޫ ފެނުނީ މާބޮޑަށްވެސް ވަރުގަދަކޮށެވެ. މިހާފުގައި އެޓީމުން އިތުރު ހަ ލަނޑު ކާމިޔާބުކުރިއެވެ. މި ގޮތުން އެޓީމުގެ ތިން ވަނަ ލަނޑު ދެވަނަ ހާފުގެ 28 ވަނަ މިނެޓުގައި އަލީ ނިޝާހު ކާމިޔާބުކޮށްދިން އިރު އޭގެ މިނެޓެއް ފަހުން ހަތަރުވަނަ ލަނޑު ކާމިޔާބުކޮށްދިނީ އިބުރާހިމް ރިފާއު އެވެ.

ވިލަމެންދޫގެ ފަސްވަނަ ލަނޑު ދެވަނަ ހާފުގެ 31 ވަނަ މިނެޓުގައި އިހުސާން ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކުރި އިރު، އޭގެ ދެމިނެޓު ފަހުން އެޓީމުގެ ހަވަނަ ލަނޑު ވެސް ކާމިޔާބުކޮށްދިން މި މެޗުގައި މޮޅު ކުޅުމެއް ދެއްކި އިހުސާން މަންސޫރު އެވެ.

މި މެޗުގައި ވިލަމެންދޫ އިން ކާމިޔާބުކުރި ހަތްވަނަ ލަނޑު 35 ވަނަ މިނެޓުގައި ކާމިޔާބުކޮށްދިނީ ކެޕްޓަން އަލީ މާޖިދު އެވެ. މިއީ އެޓީމުގެ އިހުސާން ތަނަވަސްކޮށްދިން ފުރުސަތެއްގައި ރެޑިސަން ބްލޫގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ވިލަމެންދޫގެ ފަހު ލަނޑު މެޗު ނިމެން ތިން މިނިޓަށްވެފައި ވަނިކޮށް މުހައްމަދު މިސްބާހް އެވެ. މި މެޗުގެ މޭން އޮފް ދަ މެޗަކަށް ހޮވުނީ މި މެޗުގައި ވިލަމެންދޫ ޓީމަށް ހަތަރު ލަނޑު ކާމިޔާބުކޮށްދިން އިހުސާން މަންސޫރު އެވެ.

މިއަހަރުގެ މުބާރާތުގައި އަރި ޒޯނުގައި ފަސް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ގިނަ ޕޮއިންޓް ހޯދާ ޓީމަކަށް ފައިނަލުން ޖާގަ ލީބޭގޮތަށެވެ. އަދި ލީގު ބުރުގެ ދެވަނަ އާއި ތިން ވަނައިގެ މެދުގައި ޕްލޭއޮފް މެޗެއް ކުޅެ އެ މެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބޭ ގޮތަށެވެ. މި ޒޯނުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ކޮންރެޑް މޯލްޑިވްސް ގައެވެ.

Advertisement

ކޮމެންޓް

Advertisement

Advertisement