ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ އަރި ޒޯނުގައި މިއަދުގެ ހަވީރު ކުޅެވުނު، ދެވަނަ މެޗުގައި 0-3 ގެ ނަތީޖާއަކުން ޑަބުލިޔު މޯލްޑިވްސް ބަލިކޮށް ލިލީ ބީޗުން ލީގު ބުރުގެ ތިންވަނަ ޓީމުގެ ގޮތުގައި ޕްލޭއޮފް ގެ ދެވަނަ ޖާގަ ކަށަވަރުކޮށްފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި ލަނޑު ޖަހާނެ ރަގަޅު ފުރުސަތުތަކެއް ދެޓީމުން ވެސް ވަނީ ތަނަވަސްކޮށްފައެވެ. ދެޓީމު ކީއްޕަރުންގެ ފަރާތުން ރަގަޅު ސޭވްތަކެއް ފެނިގެންދިޔަ މިހާފުގައި ލިލީ ބީޗުން ލީޑުނެގީ އެންމެ ފަހުން މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އާދަމް ސަލީމް އެވެ.

މިއީ އެޓީމުގެ މޫސާ ނައިސާން ޑަބުލިޔު މޯލްޑިވްސްގެ ޕެނަލްޓީ އޭރިއާ ބޭރުން ފޮނުވާލި ބޯޅައެއް އެއްފަހަރުން ޖަހައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ލިލީ ބީޗު ކުރީގައި އޮވެގެންނެވެ.

ދެވަނަ ހާފުގައި ލިލީ ބީޗުން އެޓީމުގެ އެޓޭކުތަށް އިތުރަށް ވަރުގަދަކުރި އިރު، އެޓީމުގެ ދެވަނަ ލަނޑު ފަހުހާފުގެ 28 ވަނަ މިނެޓުގައި ކާމިޔާބުކޮށްދިނީ މޫސާ ނައިސާން އެވެ. މިއީ ޑަބުލިޔު މޯލްޑިވްސްގެ ހާފުތެރެއިން ލިބުނު ފުރުސަތެއްގައި ކައިރީގައި ހުރި ކުޅުންތެރިއާ ކައިރިން ނައްޓާލުމަށް ތިރިތިރިން ގޯލުގެ ދުރު ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ލިލީ ބީޗުން މި މެޗުގައި ކާމިޔާބުކުރި 32 ވަނަ މިނެޓުގައި ކާމިޔާބުކޮށްދިނީ މުހައްމަދު ޝާހިލްއެވެ. މިއީ ބޯޅައާއެކު ޕެނަލްޓީ އޭރިއާ ތެރެއަށް ވަދެ ކީއްޕަރު ކައިރިން ނައްޓާލުމަށް ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ލިލީ ބީޗު ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ހަތަރު މެޗު ކުޅެގެން ލިލީ ބީޗަށް 07 ޕޮއިންޓް ލިބުނުއިރު، ލީގު ބުރުގައި އެޓީމަށް ލިބުނީ ތިންވަނަ އެވެ. މި މެޗުން ބަލިވި ޑަބުލިޔު މޯލްޑިވްސް ކުޅުން ހަތަރު މެޗުން އެޓީމަށް ދެ ޕޮއިންޓް ލިބިފައިވާއިރު ލީގު ބުރު އެޓީމު ނިންމާލީ ހަތަރު ވަނައިގައެވެ.

ފަސް ޓީމު ބައިވެރިވި މިޒޯނުގެ ލީގު ބުރުގެ މެޗުތައް ނިމުނުއިރު، އެއްވަނަ ލިބުނީ ކުޅުނު ހަތަރު މެޗުން 10 ޕޮއިންޓް ހޯދި ކޮންރެޑަށެވެ. ހަތަރު މެޗުން 07 ޕޮއިންޓާއެކު ލަނޑުގެ ތަފާތުން ދެވަނަ ލިބުނީ ވިލަމެންދުއަށެވެ. ތިންވަނަ ލިލީ ބީޗު ހޯދިއިރު، ހަތަރުވަނަ ލިބުނީ ޑަބުލިޔު މޯލްޑިވްސް އަށެވެ. އަދި ލީގުގެ ފުލަށް ދިޔައީ ކުޅުނު ހަތަރު މެޗުން ލިބުނު އެއް ޕޮއިންޓާއެކު ރެޑިސަން ބްލޫ އެވެ.

މުބާރާތުގެ ފައިނަލްގެ ފުރަތަަމަ ޖާގަ ލީގު ބުރުގެ އެއްވަނަ ކޮންރެޑް ހޯދިއިރު، ދެވަނަ ޖާގަ ލިބިގެންދާނީ އަންނަ ހޮނިހިރު ދުވަހު ކުޅެވޭ ޕްލޭއޮފް މެޗުގައި ލިލީ ބީޗާއި ވިލަމެންދޫ ވާދަކުރާ މެޗުން މޮޅުވާ ޓީމަކަށެވެ.