މިހާރު އާޖެންޓީނާގައި ކުރިއަށްދާ 20 އަހަރުންދަށުގެ ވޯލްޑްކަޕް ފުޓްބޯޅަ މުބާރާތުގެ ސެމީ ފައިނަލުގެ ފުރަތަަމަ މެޗުގައި 1-0 ގެ ނަތީޖާއަކުން އިޒްރޭލު ބަލިކޮށް މުބާރާތުގެ ފައިނަލުގެ ފުރަތަމަ ޖާގަ އުރުގުއާއީ އިން ހޯދައިފިއެވެ.

އިޒުރޭލުން ސެމީގެ ފުރުސަތު ހޯދީ ކުއާޓާ ފައިނަލުގައި އިތުރު ވަގުތުކުޅެ 3-2 ގެ ނަތީޖާއަކުން ބްރެޒިލް ބަލިކުރުމަށްފަހު އެވެ. އަދި އުރުގުއާއީ ސެމީ ފައިނަލުން ޖާގަ ހޯދީ ކުއާޓާ ފައިނަލުގައި 2-0 ގެ ނަތީޖާއަކުން އެމެރިކާ ބަލިކުރުމަށް ފަހު އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި އިޒްރޭލުން ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރި ނަމަވެސް އުރުގުއާއީ ގެ ގޯލާއި އަމާޒުކޮށް މާ ނުރައްކާތެރި ހަމަލާއެއް އެޓީމަށް ފޮނުވާލެވިފައެއް ނުވެއެވެ.

ފުރަތަަމަ ހާފުގައި އުރުގުއާއީ އިން ވަނީ ކައުންޓާ އެޓޭކުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމަށް ލިބުނު ހުސް ފުރުސަތުތަކުގެ ބޭނުން ނުކުރެވި، ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން ކުޅުނީ އިޒުރޭލުން ނެވެ. ނަމަވެސް މިހާފުގައި ވެސް އުރުގުއާއީގެ ގޯލާއި އަމާޒުކޮށް ނުރައްކާތެރި އެންމެ ހަމަލާއެއް ވެސް އެޓީމަށް ފޮނުވާލެވިފައެއް ނުވެއެވެ.

އުރުގުއާއީ އިން މި މެޗުގައި ކާމިޔާބުކުރި ހަމައެކަނި ލަނޑު ދެވަނަ ހާފުގެ 61 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު އެންޑަސަން ޑުއާޓޭ އެވެ. މިއީ އެޓީމުގެ ޑިފެންޑަރު އެލަން މަޓޫރޯ ރޮމޭރޯ ފޮނުވާލި ބާރު ހަމަލާއެއް ގޯލުގެ ދަނޑިގައި ޖެހިފައި ނުކުތް ވަގުތު މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

އުރުގުއޭ ވަނީ މީގެ ކުރިން ދެ ފަހަރެއްގެ މަތިން މި މުބާރާތުގެ ފައިނަލުގައި ކުޅެފައެވެ. 1997 ވަނަ އަހަރު ފައިނަލުގައި އާޖެންޓީނާ އަތުން 3-0 ގެ ނަތީޖާއަކުން އެޓީމު ބަލިވިއިރު، 2013 ވަނަ އަހަރުގެ ފައިނަލުގައި އެޓީމު ފުރާންސް އަތުން ބަލިވީ ޕެނަލްޓީ ޖަހައިގެން 4-1 ގެ ނަތީޖާއަކުންނެވެ. ނަމަވެސް މިއީ އިޒްރޭލު މި މުބާރާތުގައި ކުޅުނު ފުރަތަަމަ ފަހަރެވެ.

މުބާރާތުގެ ފައިނަލްގައި އަންނަ އާދީއްތަ ދުވަހު އުރުގުއާއީ ނުކުންނާނީ ސެމީ ފައިނަލްގެ ދެވަނަ މެޗުގައި އިޓަލީ އާއި ސައުތު ކޮރެއާ ވާދަކުރާ މެޗުން މޮޅުވާން ޓީމަކާއި ދެކޮޅަށެވެ.

މުބާރާތުގެ ތިންވަނަ ހޮވާ މެޗުގައި އާދީއްތަ ދުވަހުގެ އިޒްރޭލުން ނުކުންނާނީ އިޓަލީ އާއި ސައުތު ކޮރެއާ ވާދަކުރާ ސެމީ ފައިނަލުގެ ދެވަނަ މެޗުން ބަލިވާ ޓީމަކާއި ދެކޮޅަށެވެ.