މަދަނީ ޖަމްޢިއްޔާތަކަކީ މުޖްތަމަޢެއް ޙަރަކާތްތެރިކުރުވާ މައި އިންޖީނު ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެެވެ.

ރައީސް ޞާލިޙް މިހެން ވިދާޅުވީ "ސިވިލް ސޮސައިޓީ އެވޯޑްސް"ގެ ނަމުގައި ތަޢާރަފްކުރި އެވޯޑްދިނުމަށް ރޭ ސޯސަލް ސެންޓަރ އިންޑޯ ހޯލްގައި ބޭއްވި ޙަފުލާގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ މުޖްތަމަޢުގައި ވަރަށް މުހިންމު މަސައްކަތްތަކެއް ކުރާ އަދި އެހާމެ އަގުހުރި ޚިދުމަތްތަކެއް ދޭ ޖަމްޢިއްޔާތައް އެބަހުރި ކަމަށެވެ. އަދި މެދުކެނޑުމެއް ނެތި ހިންގަމުން އަންނަތާ ވަރަށް ގިނަ އަހަރުތަކެއްވީ ޖަމްޢިއްޔާތައް ވެސް މީގެތެރޭގައި ހިމެނޭ ކަމަށް ރައީސް ވިދާޅުވިއެވެ.

އޭގެ ތެރޭގައި، މީގެ 43 އަހަރު، 39 އަހަރު، 27 އަހަރު އަދި 25 އަހަރު ކުރިން ފެށިގެން ހިންގަމުން އަންނަ ޖަމްޢިއްޔާތައް އެބަހުރި ކަމަށާއި، އަދި ވަރަށް އަގުހުރި ޚިދުމަތްތަކެއް ދެމުން އަންނަ، ވަރަށް ހަގު ޖަމްޢިއްޔާތައް ވެސް އެބަހުރި ކަމަށް ރައީސް ޞާލިޙް ވިދާޅުވިއެވެ.

ބަދަލަކަށް އެދިގެން މީގެ އަހަރުތަކެއް ކުރިން  އެންމެން އުފުލި އަޑުތައް، ރާއްޖޭގެ ދުސްތޫރީ ފޮޅުވަތްތަކުގައި ލިޔެވިގެން ދިޔައީ، މަދަނީ ޖަމްޢިއްޔާތަކުންވެސް ވަރަށް މުހިންމު ދައުރެއް އަދާކޮށްގެން ކަން ރައީސް ޞާލިޙް ފާހަގަ ކުރެއްވެވިއެވެ.

ރޭގެ ޖަލްސާ ގައި ރާއްޖޭގައި ފުރަތަމަ ފަހަރަށް "ސިވިލް ސޮސައިޓީ އެވޯޑްސް"ގެ ނަމުގައި އެވޯޑް ތަޢާރަފްކޮށް އެ އެވޯޑް 10 ޖަމްޢިއްޔާއަކަށް ދީފައިވެއެވެ.