ބަންގްލަދޭޝްއަށް ހިޖުރަކޮށް އެޤައުމުގައި ދިރިއުޅެމުންދާ ރޮހިންޔާ ރައްޔިތުން އަނބުރާ ޤައުމަށް ފޮނުވައިދިނުން އެދި ހަޅުތާލު ކުރަމުންދާ ކަމަށް މީޑިއާ ރިޕޯޓްތައް ބުނެފިއެވެ.

ބަންގްލަދޭޝްގެ އިރުދެކުނުގައި ހުންނަ ރެފިޔުޖީކޭމްޕު ތަކުގައި ރޮހިންޔާގެ އެތައްހާސް ރެފިޔުޖީންނެއް ހަޅުތާލު ކުރަން ފަށައިފައިމިވަނީ ޔޫއެން އިން އެބައިމީހުންނަށް ދެމުންދިޔަ އެހީގެ މިންވަރު ކުޑަކުރުމާއި ގުޅިގެނެވެ.

މީގެ ހަ އަހަރުކުރިން ރޮހިންޔާގެ ގިނަ ބަޔަކު މިޔަންމާ ދޫކޮށް އެކި ޤައުމުތަކަށް ބެހިފައިވާއިރު އޭގެ ގިނަ ޢަދަދެއްގެ ބަޔަކު ބަންގްލަދޭޝްގައި ދިރިއުޅެމުންދެއެވެ.

ބަންގްލަދޭޝްއަށް އެބައިމީހުން ހިޖުރަކުރުމުން ޔޫއެންގެ ވޯލްޑް ފުޑް ޕްރޮގްރާމްގެ ދަށުން ހިޖުރަކުރުމުން، އެމީހުންގެ ކޮންމެ ބޮލަކަށް 12 ޑޮލަރުގެ އެހީ ކޮންމެ މަހަކު ދިޔައީ ދެމުންނެވެ. ފަހުން އެ ރޭޓު 10 ޑޮލަރަށް މަދުކުރިއެވެ. އަދި މި ޖޫން މަހުގެ ފުރަތަމަ ދުވަހުން ފެށިގެން އެރޭޓު ވަނީ ކޮންމެ ބޮލަކަށް 8 ޑޮލަރަށް މަދުކޮށްފައެވެ.

ބަންގްލަދޭޝްގެ ރެފިޔުޖީ ކޭމްޕްތަކުގައި ދިރިއުޅެމުންދާ ރޮހިންޔާގެ މުސްކުޅިންނާއި ޒުވާނުން  ނުކުމެ ހަޅުތާލު ކުރަމުން ދާއިރު އެމީހުން ގޮވައިލަމުން ދަނީ އެމީހުންނަށް އަނބުރާ އެމީހުންގެ ވަޒަނަށް ދެވޭނެ ގޮތް ހަދައިދިނުމަށެވެ.

ހަޅުތާލުކުރަމުން ދިޔަ މީހެއްކަމުގައިވާ މުޙައްމަދު ރިޒުވާން ޚާން ބުނެފައިވަނީ މިގޮތަށް އެހީގެ މިންވަރު މަދުވަމުންދާނަމަ ބަނޑުހައި ހޫނުކަން ފިލުވަން ކާބޯތަކެތިން ވައްކަންކުރުން ނޫން ގޮތެއް ނޯންނާނެ ކަމަށެވެ.

"ރޮހިންޔާ ރައްޔިތުންގެ ދިރިއުޅުން ވަނީ ޗަކަަވަޅުގަނޑެއްގައި ތާށިވެފަ، ބައެއްފަހަރު އަހަންނަށް ހީވަނީ އަހަރެމެން މޮޔަވެދާނެހެން" އޭނާ އިތުރަށް ބުނެފައިވެއެވެ.

"އަހަރެމެންނަކީ ވެސް މިޔަންމާގެ ރައްޔިތުން، އަހަރެމެން ގޮވާލަން ބައިނަލް އަޤްވާމީ ފަރާތްތަކަށް، އަހަރެމެންނަށް އަނބުރާ އަހަަރެމެންގެ ޤައުމަށް ދެވޭނެ ގޮތް ހަދައިދިނުމަށް، އަދި އަނބުރާ ޤައުމަށް ދިޔުމަށްފަހު ޤައުމުގައި އަމާންކަން ލިބިގެން އުޅެވޭނެ މަގު ފަހިކޮށް ދިނުމަށް" ހަޅުތާޅާލު ކުރަމުންދިޔަ މީހުންގެ ތެރެއިން 35 އަހަރުގެ މުޙައްމަދު އަޔާޒު ބުނެފައިވެއެވެ.

އޭނާ ބުނެފައިވަނީ ޔޫއެން އިން ދޭ ކާބޯތަކެތީގެ އެހީ މަދު ކުރުމަކީ އެބައިމީހުން ބަނޑުހައިހޫނު ކަން މައްޗަށް ދޫކޮށްލުން ކަމަށެވެ. އަދި މިކަމުގެ އެންމެ ބޮޑު ޝިކާރައަކަށް ވާނީ އަންހެނުންނާއި ކުޑަ ކުދިން ކަމަށް އޭނާ ބުނެފައިވެއެވެ.

ޔޫއެން ހިމެނޭހެން ބައިނަލް އަޤްވާމީ މުއައްސަސާތަކަށް އޭނާ ގޮވައިލައިފައިވަނީ ކާބޯތަކެއްޗާއި ދެންވެސް އެމީހުންނަށް ބޭނުންވާ ޒަރޫރީ ތަކެތި ވީއެންމެ އަވަހަކަށް ފޯރު ކޮށްދިނުމަށެވެ. އަދި އެބައިމީހުނަށް ދިރިތިބެވޭނެ އެހެން ގޮތެއް ނެތް ކަމަށް އޭނާ ބުނެފައިވެއެވެ.

ރޮހިންޔާގެ ކޮމިޔުނިޓީ ލީޑަރ މުޙައްމަދު ޖައިޝަމް ބުނެފައިވަނީ އެބައިމީހުންގެ ޤައުމަށް އެނބުރިދިއުމަށް ކެތްމަދުވެފައި ވާކަމަށެވެ. އެހެންނަމަވެސް އެކަން އެހެން ވާން އޮތީ މިޔަންމާގެ ރައްޔިތެއްގެ ހައްޤު ޔަޤީން ވުމުންކަމަށެވެ.

"އަހަރެމެންނަކީ މިޔަންމާއަށް އުފަން މިޔަންމާގެ ރައްޔިތުން، އަހަރެމެން ބޭނުން އެނބުރި އަހަރެމެންގެ ޤައުމަށް ދާން، ފުރިހަމަ ހައްޤުތަކާއި އެކު، މިޔަންމާގެ ރައްޔިތެއްގެ ހައްޤު، މިނިވަންކަމާއި އެކު އެއްތަނުން އަނެއް ތަނަށް ގޮސް އުޅުމުގެ ހައްޤު، ރަނގަޅު ދިރިއުޅުމެއް، ރައްކާތެރިކަމާއި އަމާންކަން" ޖައިޝަމް ބުނެފައިވެއެވެ.

އޭނަ ބުނެފައިވަނީ ރޮހިންޔާގެ ރައްޔިތުން ޔޫއެންގެ ކިބައިން މިކަންކަމަށް އެދޭ ކަމަށެވެ. އަދި އެމީހުންގެ އުއްމީދު ގުޅިފައިވަނީ ޔޫއެންއާއި ކަމަށެެ.

މިޔަންމާގައި ދިރިއުޅެމުންދިޔަ ރޮހިންޔާގ ރައްޔިތުން ބަންގްލަދޭޝްއަށް ހިޖުރަކޮށްފައިވަނީ 2017ވަނަ އަހަރު، މިޔަންމާގެ ސަރުކާރުގެ ސިފައިން އެމީހުންނަށް ދެމުންދިޔަ އަނިޔާތަކުން ސަލާމަތްވުމަށެވެ. މިހާރު އެމީހުން ދިރިއުޅެމުންދަނީ ދުނިޔޭގެ އެންމެ ބޮޑު ރެފިޔުޖީ ކޭމްޕުގައެެވެ.