އޭޕްރީލް މަހު 55 ގައިދީއަކު ޖަލުން މިނިވަން ކޮށްފައިވާ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފިއެވެ.

ކަރެކްޝަންސް އިން ހާމަކޮށްފައިވާ ތަފާސް ހިސާބުތަކުން ދައްކާ ގޮތުގައި މިނިވަންކުރި ގައިދީންގެ ތެރެއިން 16 މީހުންނަކީ އެމީހުންގެ ޖަލުޙުކުމް ހަމަވެގެން ދޫކޮށްލި މީހުންނެވެ. އަދި 3 މީހަކު ޕެރޯލްގެ ދަށުން ދޫކޮށްލައިފައިވާއިރު 12 މީހަކަށް މަޢާފްދީ ދޫކޮށްލައިފައިވެއެވެ.

ކަރެކްޝަންސްގެ އޭޕްރީލް މަހުގެ ތަފާސްހިސާބުތަކުން ދައްކާގޮތުގައި އޭޕްރީލް މަހު ޖަލަށްލެވުނީ 36 މީހެކެވެ. އޭގެ ތެރެއިން 3 މީހަކީ ކޯޓު އަމުރުގެ ދަށުން ޝަރީޢަތް ނިމެންދެން ޖަލަށްގެންދެވުނު 3 މީހުންނެވެ. އަނެއް 33 މީހުންނަކީ ޙުކުމް ކުރެވި ޖަލު ޙުކުމް ތަންފީޒު ކުރުމަށް ގެންދެވުނު މީހުންނެވެ.

އޭޕްރީލް މަހު އެންމެ ގިނައިން ޖަލަށް ލެވިފައިވަނީ މަސްތުވާތަކެތީގެ މައްސަލަ ތަކުގައި ބަންދުކުރެވުނު މީހުންނެވެ. އޭގެ އިތުރުން ކުޑަކުދިންނަށް ޖިންސީ ގޯނާ ކުރުމުގެ މައްސަލަތަކާއި، ވައްކަމާއި ފޭރުން، މާރާމާރީ، ދަރަނީގެ މައްސަލަތައް އަދި އެހެނިހެން ކަންކަންވެސް ހިމެނެއެވެ.

ޖަލުން ދޫކޮށްލާ ގައިދީން މުޖްތަމަޢަށް އަނބުރާ ނުކުންނައިރު އެބައިމީހުންނަކީ މުޖްމަތަމަޢަށް ފައިދާހުރި ބަޔަކަށް ހެދުމަށް ކަރެކްޝަންސްެ އިން ދަނީ ގިނަ މަސައްކަތް ތަކެއް ކުރަމުންނެވެ. އެގޮތުން ދާދި ފަހުންވެސް އިންމޭޓްސް ކްރިއޭޓިވިޓީ ފެއަރ ގެ ނަމުގައި ގައިދީންނަށް ޚާއްސަކޮށްގެން އަތްތެރި މަސައްކަތްތަކާއި އެހެނިހެން މަސައްކަތްތަކާއި ހުނަރު ދައްކާލުމުގެ ފުރުސަތާއި އެކު މާފުށީ ސްކޫލްގައި ފެއަރ އެއް ވަނީ ކުރިއަށް ގެންގޮސްފައެވެ.