6 ވަނަ މައިލޯ ހޭންޑްބޯލް މޯލްޑިވްސް ޗެމްޕިއަންޝިޕް 2023 ގެ ފިރިހެން ޑިވިޝަނުގެ ފައިނަލުގައި މިރޭ ދިވެހި ސިފައިންގެ ކުލަބް ބަލިކޮށް ޒެފްރޯލް ޗެމްޕިއަންކަން ހޯދައިފި އެވެ.

ފައިނަލުގެ ފުރަތަަމަ ޖާގަ ޒެފްރޯލް އިން ހޯދީ ސެމީ ފައިނަލް ފުރަތަމަ މެޗުގައި ވެލިދޫ ޔުނައިޓެޑްގެ ބަލިކުރުމަށްފަހު އެވެ. ގްރޫޕް އޭގެ އެއް ވަނަ ޓީމުގެ ގޮތުގައި ސެމީ ފައިނަލުން ޖާގަހޯދި ޒެފްރޯލް އިން ވަނީ މި މެޗުގައި ވެސް ތަފާތު މޮޅު ކުޅުމެއް ދައްކައި 45-24 ގެ ތަފާތުބޮޑު ނަތީޖާއަކުން މެޗު ކާމިޔާބުކޮށްފަ އެވެ.

ޒެފްރޯލް އަކީ މި އަހަރުގެ މުބާރާތަަށް ބޮޑު ހޭދައެއްކޮށް އެންމެ ރަގަޅަށް ތައްޔާރުވި އެއް ޓީމެވެ. އެ ކުލަބުން ވަނީ ގައުމީ ޓީމުގެ މުހިންމު ތިން ކުޅުންތެރިން ކަމަށްވާ މުހައްމަދު ފިރުނާޝް އަބްދުﷲ، އަބްދުﷲ ޒިޔާއު އަދި އާދިލް ޝަހީދު އެ ޓީމަށް ގެނެސްފަ އެވެ.

Advertisement

ދިވެހި ސިފައިންގެ ކުލަބު ފައިނަލްގެ ޖާގައެއް ހޯދީ ސެމީ ފައިނަލް ދެވަނަ މެޗުގައި ފިއުޗާ ސްޕޯޓްސް ކުލަބު އެކަޑެމީ އާއި ވާދަކޮށް 25-23 ގެ ނަތީޖާއަކުން މެޗު ކާމިޔާބުކޮށްގެންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިރޭ ފައިނަލް މެޗު ޒެފްރޯލް އިން ކާމިޔާބުކުރީ 28-33 ގެ ނަތީޖާއަކުންނެވެ. މި މެޗުގެ ފެށުނީއްސުރެ ނިމެންދެން ޒެފްރޯލް އިން މެޗު ލީޑުކުރަމުންދިޔައިރު، ފުރަތަަމަ ހާފުގެ ކުޅުން ނިމިގެންދިޔައީ 12-16 އިން ޒެފްރޯލް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޒެފްރޯލް އިން އިތުރު 18 ލަނޑު ކާމިޔާބުކުރިއިރު، މި ހާފުގައި ދިވެހި ސިފައިންގެ ކުލަބަށް ކާމިޔާބު ކުރެވުނީ 14 ލަނޑެވެ. މިއާއެކު މެޗުގެ ކުޅުން ނިމިގެންދިޔައީ 33-28 ގެ ނަތީޖާއަކުން ޒެފްރޯލް ކުރީގައި އޮވެގެންނެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ ޒެފްރޯލް ގެ އަބްދުﷲ ޒިޔާއު އެވެ