ދީނީ އެއްވެސް ދަރުހެއްގައި، ރިޔާސީ އިންތިހާބުގައި ވާދަކުރާ ކެންޑިޑޭޓުންނާއި ގުޅިގެން ވާހަކަދެއްކުން މަނާ ކޮށްފިއެވެ. 

އިލެކްޝަންސް ކޮމިޝަނުން އިއްޔެ އާންމު ކޮށްފައިވާ ރިޔާސީ އިންތިހާބުގެ ގަވައިދުގައި ބުނެފައިވާ ގޮތުން، ދީނީ އެކިއެކި މުނާސަބަތުގައްޔާއި، ދީނީ ދަރުސްތަކުގައްޔާއި، ޚުޠުބާތަކުގައި ވަކި ކެންޑިޑޭޓަކަށް ނުވަތަ ވަކި ޕާޓީއަކަށް ތާއީދު ހޯދުމަށް ނުވަތަ ތާއީދު ކުޑަކުރުމަށް އެއްވެސް ވާހަކައެއް ދައްކައިގެން ނުވާނެއެވެ. 

މީގެ އިތުރުން، ވަކި ޖިންސެއްގެ މީހަކަށް ވާތ،ީ ނުވަތަ އިސްލާމްދީނުގައި ވަކި މަޒުހަބަކަށް އުޅެންމުންދާކަމަށް ޓަކައ،ި ނުވަތަ ވަކި ބަހުރުވައަކުން ވާހަކަދައްކާ ކަމަށް ޓަކައ،ި އެއީ ވަކި ކެންޑިޑޭޓަކަށް ވޯޓު ދިނުމަށް ނުވަތަ ވޯޓު ނުދިނުމަށް އޮތް ސަބަބެއް ކަމުގައި އެއްވެސް ބަޔަކަށް ހުށަހަޅައިގެން ނުވާނެ ކަމަށްވެސް އެ ގަވާއިދުގައި ވެއެވެ. 

ހަމައެހެންމެ، ކެންޑިޑޭޓަކަށް ތާއީދު ހޯދުމަށް މަސައްކަތްކުރުމުގައ،ި އިސްލާމްދީނުގެ އަސްލުތަކާ ޚިލާފު އެއްވެސް ވާހަކައެއް ދައްކައ،ި އިސްލާމްދީނުގެ ޙުރުމަތްކެނޑޭ ފަދަ އެއްވެސް ކަމެއް ކޮށްގެން ނުވާނެ ކަމަށްވެސް ގަވައިދުގައިވެއެވެ. 

އިލެކްޝަންސް ކޮމިޝަނުގެ މި ގަވާއިދާއި އެކު ދީނީ ދަރުސްތަކުގައި ދެން ދިވެހިރާއްޖޭގެ މިހާރުގެ މަޝްރަހުގައި ކަންކަން ހިނގަމުން އަންނަ ގޮތާއި، ސަރުކާރުގެ ނުވަތަ އިދިކޮޅު ފަރާތްތަކުގެ ސިޔާސަތު ތަކުގައި ދީނާއި ބީރަށްޓެހި ކަންކަން ހުރި ނަމަ، އެކަމާއި ގުޅޭގޮތުންވެސް ވާހަކައެއް ނުދެއްކޭނެއެވެ. އެހެންކަމުން، މިއީ ދީނާއި ސިޔާސަތު ވަކިކުރުން ކަމުގައި ގިނަ ބަޔަކު އަންނަނީ ބުނަމުންނެވެ. ނަމަވެސް އެފަދައިން ކަން ކޮށްގެން ނުވާނެ ކަމަށްވެސް އެފަރާތްތަކުން އަންނަނީ ބުނަމުންނެވެ. 

މީގެ އިތުރުންވެސް، އަދުގެ ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު ވެރިކަމަށް ގެނައުމަށްވެސް ދީނީ ޢިލްމުވެރިޔާ އައްޝެއިޚު އިލްޔާސް ހުސައިން އާއި، ސްޓޭޓް މިނިސްޓަރު އިލްޔާސް ޖަމާލް ވަނީ، ގިނަ ދީނީ ދަރުސްތައް ދެއްވާފައި ކަން ފާހަގަކޮށްލަންޖެހެއެވެ. އެގޮތުން ރަށްރަށަށް ދަތުރުކޮށް އެ ރަށްރަށުގެ ރައްޔިތުންނާއި ވަކިވަކިން ބައްދަލުކޮށްވެސް ރައީސް ޞާލިހަށް ވޯޓު ދިނުމަށް އެ ދެ ބޭފުޅުންނާއި އެ ނޫންވެސް އިލްމުވެރިން ވަނީ ނަސޭހަތް ދީ ދަރުސް ދެއްވާފައެވެ.  

އިލެކްޝަންސް ކޮމިޝަނުގެ ގަވާއިދުގައި ދީނީ ދަރުސްތަކުގައި ކެންޑިޑޭޓަކަށް ނުވަތަ ވަކި ޕާޓީއަކަށް ތާއީދު ހޯދުމަށް ނުވަތަ ތާއީދު ކުޑަކުރުމަށް އެއްވެސް ވާހަކައެއް ދެއްކުން މަނާ ކޮށްފައި މިވަނީ، "މިނިވަންކަން" ނަމުގައި، ޖަމިއްޔަތުއް ސަލަފުން ބޮޑު ދަރުހެއް ބޭއްްވި ފަހުންކަންވެސް ފާހަގަކޮށްލަންޖެހެއެވެ. އެ ދަރުސްތެރެއިން ޝެއިޚް ވަނީ ސިއްރު ސިޓީ ތަކުން ރާއްޖޭގެ މިނިވަންކަމަށް ކޮށްފައިވާ އަސަރުތައް ހާމަ ކުރައްވާފައެވެ. އަދި ދިވެހިރާއްޖެއަކީ މުސްލިމް ގައުމެއްގެ ގޮތުގައި އޮތުމަށް މިނިވަންކަން ނުހަނު މުހިންމު އިރު، މިހާރު އެ މިނިވަންކަމާއި މެދު ވިސްނާލަންޖެހިފައިވާ ކަމަށްވެސް ޝެއިޚު ވިދާޅުވި އެވެ.