ގާނޫނެއް ނެތް ކަމަށް ބުނެ، ދިވެހި ސަރުކާރު ތަކުން މަރުގެ ހުކުމް ތަންފީޒް ނުކުރަކީ، އެކަން ކުރަން ބޭނުން ނުވާތީ ކަމަށާ، ވެރިން ބޭނުން ނަމަ، ބޭނުންވާ ކަންކަން އަންނަނީ ކުރަމުން ކަމަށް ކެންދޫ ދާއިރާގެ މެންބަރު އަދި ގާނޫނީ ވަކީލު ޢަލީ ހުސައިން ވިދާޅުވެއްޖެއެވެ.
ސަންގު ޓީވީން ރޭ ގެނެސްދިން، އިލްމީ ބަހުސް ޕްރޮގްރާމް ގައި މަރުގެ އަދަބު ތަންފީޒުކުރުމާއި ގުޅިގެން ވާހަކަދައްކަވަމުން ޢަލީ ވިދާޅުވީ، ރާއްޖޭގައި މަރުގެ ހުކުމް ތަންފީޒް ނުކުރެވިފައިވަނީ އެކަމަށް ގާނޫނީ ހުރަހެއް އޮވެހެން ނޫން ކަމަށެވެ. އެގޮތުން ރާއްޖޭގެ މިހާތަނަށްވެސް ކަންކަން ހިނގާފައިވާ ގޮތަށް އަލިއަޅުވާލައްވައި މިސާލުދައްކަވަމުން ޢަލީ ވިދާޅުވީ، ރާއްޖޭގެ ވެރިން ނުވަތަ ސިޔާސީ ލީޑަރުންނަކީ، ކަމެއް ކުރަން ބޭނުންވެއްޖެ ހިނދެއްގައި ގާނޫނު ހަދައިގެންވެސް އެކަން ކުރެއްވި ބައެއް ކަމަށެވެ.
"އަޅުގަނޑުމެންނަކީ، ސިޔާސީ މަޝްރަހުގައިވެސް، އަދި ގާނޫނީ ދާއިރާގައިވެސް، އުޅޭ ހުރިހާ ބޭފުޅުންނަށްވެސް އެނގިވަޑައިގަންނަވާނެ، އަޅުގަނޑުމެން ބޭނުންވީމާ، ވަކި މީހަކު ވެރިކަމަށް ގެންނަންވީމާ، ނުވަތަ ދުރުކުރަން ވީމާ، 24 ގަޑިއިރުން ގާނޫނު އަސާސީ އިސްލާހު ކޮށްލި ބައެއް. އަޅުގަނޑުމެންނަކީ ރާއްޖެއިން ބައެއް ވިއްކާލަން ވީމާ، ހަފްތާއެއްގެ ތެރޭ، ގާނޫނު އަސާސީ ބަދަލު ކޮށްލި ބައެއް. އެއީ މަޖިލީހުގެ މެޖޯރިޓީވެސް އޮތީމާ. އަދި ނެތް މެޖޯރިޓީވެސް ހޯދައިގެން. އަޅުގަނޑުމެންނަކީ އަޅުގަނޑުމެންގެ ރާއްޖެއިން ބައެއް ދޫކޮށްލަންވީމާ، ރައްޔިތުންގެ މަޖިލީހުގައި އަހާވެސް ނުލައި، ސިޓީއެއް ފޮނުވާލައިގެން އެކަން ކޮށްލައިގެން ތިބި ބައެއް."
ކެންދޫ ދާއިރާގެ މެންބަރު ޢަލީ ހުސައިން
ކަން މިހެން ހުރުމުން، މަރުގެ ހުކުމް ތަންފީޒް ނުކުރަނީ އެކަމަށް ގާނޫނު ހުރަސް އަޅާތީ ކަމަށް ބުނެ ދައްކަނީ ހުސް ބަހަނާ ކަމަށް އަލީ ވިދާޅުވި އެވެ. އަދި އެއީ އެކަން ނުކުރަންވެގެން ދައްކާ ބަހަނާ ކަމަށްވެސް ޢަލީ ވިދާޅުވިއެވެ.
"ސިޔާސީ މީހުން، ނުވަތަ ވެރިންނަށް މި ތިބޭ މީހުން، ކުރަން ބޭނުން ވީމާ، ބޭނުންވާ ކަންކަން ބޭނުން މިންވަރަކަށް ކުރެއޭ. އެހެންވީމާ ގާނޫނެއް ނެތިގެންނޭ، ގާނޫނު ހުރަސް އަޅަނީއޭ، ގަވާއިދެއް ނެތޭ، މިއީ، ހުސް ބަހަނާ. އެކަން ނުކުރާންވެގެން ދައްކާ ހުސް ބަހަނާ."
ކެންދޫ ދާއިރާގެ މެންބަރު ޢަލީ ހުސައިން
އަލީ ހުސައިން އިތުރަށް ވިދާޅުވީ، ރާއްޖޭގެ ގާނޫނުލް އުގޫބާތު ލިޔަންޖެހެނީ ގާނޫނު އަސާސީއަށް ބަލައިގެން ކަމަށެވެ. އަދި ގާނޫނު އަސާސީ ހެދިފައި ހުންނަށްޖެހޭނީ އިސްލާމީ ޝަރީއަތާއި އެއްގޮތަށް ކަމަށެވެ. ކަންމިހެން ހުރިއިރު، މަރުގެ ހުކުމަކީ ކީރިތި ގުރުއާނުގައި އަންގަވައި އަމުރުކުރައްވާފައިވާ ކަމެއް ކަމަށާ، އެކަމަށް ނޫނެކޭ ބުނުމުގެ ޖާގަ އެއްވެސް މީހަކަށް ލިބިގެން ނުވާނެ ކަމަށެވެ.
Advertisement
This content is created and paid for by advertisers and does not involve Voice Journalists
