ރިޔާސީ އިންޠިޚާބަށް ރީ-ރެޖިސްޓަރ ކުރަން އޮންލައިން ކޮށް ހުށައެޅޭނެ ގޮތަށް އިލެކްޝަންސް ކޮމިޝަނުން ހަދައިފިއެވެ.

އީސީ އިން އަލަށް އެކުލަވައިލި ޤަވާއިދުގައި ބުނެފައިވަނީ ރީ-ރަޖިސްޓްރޭޝަނަށް ހާއްސަކޮށްފައިވާ ފޯމު، އިލެކްޝަންސް ކޮމިޝަނުން ކަނޑައަޅާ މުއްދަތެއްގައި، ކަނޑައަޅާ ތަނަކަށް ހުށަހެޅޭނެ ކަމަށެވެ.

މީގެ އިތުރުން "ކޮމިޝަނުން ކަނޑައަޅާ ނިޒާމު" ގެ ތެރެއިންވެސް ރީ-ރަޖިސްޓްރޭޝަނަށް ހުށަހެޅޭނެކަމަށް އެޤަވާއިދުގައި ވަނީ ބުނެފަ އެވެ.

Advertisement

ކޮމިޝަނުން ކަނޑައަޅާފައިވާ ނިޒާމަކީ އޮންލައިން ޕޯޓަލްއެއް މެދުވެރިކޮށް ރީ-ރަޖިސްޓްރޭޝަނަށް ހުށަހެޅުމެވެ. އެހެންނަމަވެސް އޭގެ ތެރޭގައި އީމެއިލް މެދުވެރިކޮށް ހުށަހަޅާ ފޯމުތައް ނުހިމެނޭނެކަމަށް ކޮމިޝަނުން ބުނެފައިވެއެވެ.

އެގޮތަށް ނިންމީ އީމެއިލް މެދުވެރިކޮށް ލިބޭ ފޯމުތަކުގެ ސައްހަކަން ކަށަވަރުކުރަން އުނދަގޫވާނެތީ ކަމަށްވެސް އެކޮމިޝަނުން ބުނެއެވެ.

އިންޠިޚާބުގައި ވޯޓު ލާން ރީ-ރަޖިސްޓްރީ ކުރަން ޖެހެނީ އެމީހަކު ރަޖިސްޓްރީ ވެފައި އޮންނަ ރަށް ނޫން އެހެން ރަށެއްގައި ދިރިއުޅޭނަމަ ނުވަތަ ވޯޓު ލާ ދުވަހު ހުންނާނެނަމަ އެވެ. ވޯޓު ލެވޭނީ އިލެކްޝަނުން އެކުލަވައިލާ ރަޖިސްޓްރޭޝަން ފޯމުގައި އޮންނަ ތަނަކަށެވެ.

ފަހަކަށްއައިސް ބާއްވަމުން އަންނަ ބައި-އިލެކްޝަންތަކުގައި މިގޮތަށް ހެދިނަމަވެސް މިއީ ރިޔާސީ އިންޠިޚާބެއްގައި ވޯޓު ލުމަށް އޮންލައިންކޮށް ރަޖިސްޓްރީ ކުރެވޭގޮތް ހެދި ފުރަތަމަ ފަހަރެވެ.