އިންޓަ ރިސޯޓް ވޮލީބޯލް މުބާރާތުގެ ޒޯން އެކެއްގެ ފުރަތަަމަ މެޗުގައި ޖުމެއިރާ މޯލްޑިވްސް އާއި ވާދަކުރި މެޗު ސީދާ ތިން ސެޓުން ކާމިޔާބުކޮށް ވަން އެންޑް އޮންލީ ރީތިރަށުން މުބާރާތުގެ ފެށުން ރަނގަޅުކޮށްފި އެވެ.

ކ. އަތޮޅު ހިމެނޭ މި ޒޯނުގައި ވަން އެންޑް އޮންލީ އާއި ޖުމެއިރާގެ އިތުރުން ދެން ހިމެނެނީ މީރު އައިލެންޑް ރިސޯޓް އެންޑް ސްޕާ އާއި ފޯ ސީޒަންސް ރިޒޯޓް އަދި އެންމެ ފަހު ތިން ފަަރުވެސް މި ޒޯންގެ ޗެމްޕިއަންކަން ހޯދި ބަނޑޮސް މޯލްޑިވްސް އެވެ. 

ޖޫން 10-22 އާ ހަމައަށް ކުރިއަށްދާ މި ޒޯނުގެ މެޗުތައް ކުޅުމަށް ހަމަޖެހިފައިވަނީ ބައިވެރިވި ފަސް ޓީމުގެ މެދުގައި ލީގު އުސޫލުން އެއް ބުރު ކުޅެ، އެންމެ ރަނގަޅު ހަތަރު ޓީމު ސެމީ ފައިނަލަށް ހޮވޭގޮތަށެވެ. ސެމީ ފައިނަލުގެ ފުރަތަމަ މެޗުގައި ލީގު ބުރުގެ އެއްވަނަ އަދި ދެވަނަ ޓީމު ވާދަކުރާ މެޗުން މޮޅުވާ ޓީމަކަށް ފައިނަލްގެ ސީދާ ޖާގައެއް ލިބޭއިރު، ބަލިވާ ޓީމު ޖެހޭނީ ސެމީ ފައިނަލުގެ ދެވަނަ މެޗުގައި ލީގު ބުރުގެ ތިންވަނަ އަދި ހަތަރުވަނަ ޓީމު ބައްދަލުކުރާ މެޗުން މޮޅުވާ ޓީމަކާއެކު ސެމީގެ ތިންވަނަ މެޗެއް ކުޅޭށެވެ. އަދި އެމެޗުން މޮޅުވާ ޓީމަކަށް ފައިނަލްގެ ދެވަނަ ޖާގަ ލިބިގެންދާނެއެވެ.

Advertisement

އިއްޔެ ފެށި މިއަހަރުގެ މުބާރާތުގައި ވެސް ފުރަތަމަ ކުޅޭނީ ޒޯން ބުރެވެ. އެއަށް ފަހު ޒޯންތަކުގެ ޗެމްޕިއަންކަން ހޯދާ ޓީމުތަކުގެ މެޗުގައި ލީގެއް ކުރިއަށް ދާނެ އެވެ.

ޒޯން 1 ގެ ވަން އެންޑް އޮންލީ އާއި ޖުމެއިރާ މޯލްޑިވްސް ބައްދަލުކުރި މުބާރާތުގެ ފުރަތަމަ މެޗުން ވަން އެންޑް އޮންލީ މޮޅުވީ، 25-15، 25-23، 25-20 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ވަން އެންޑް އޮންލީ ރީތިރަށުގެ އަލީ ހުޒާމް (ހުޒާންޓޭ) އެވެ.

އިއްޔެގެ މެޗު ވަން އެންޑް އޮންލީ ރިސޯޓުގައި ކުޅުނުއިރު، މި ޒޯނުގެ ފައިނަލް މެޗުގެ އިތުރުން ލީގު ބުރުގެ ބައެއް މެޗުތައް ވެސް ބަނޑޮހުގައި ކުޅުމަށް ވަނީ ހަމަޖެހިފައެވެ.

މުބާރާތުގައި ދެން އެންމެ އަވަހަށް ފެށުމަށް ހަމަޖެހިފައި ވަނީ ރ. އަދި ބ. އަތޮޅުގެ ރިސޯޓްތައް ހިމެނޭ ޒޯން 5 އަދި 6 ގެ މެޗުތަކެވެ. ސޮނެވާފުށި ރިސޯޓުގައި ކުރިއަށް ގެންދާ މި ޒޯންގެ މެޗުތައް ތާވަލް ކުރެވިފައި ވަނީ މިމަހުގެ 13-21 އަށެވެ.