އިންޓަ ރިސޯޓް ވޮލީބޯލް ޗެމްޕިއަންޝިޕް 2023 ގެ ޒޯން އެކެއްގައި މިއަދު ހަވީރު ފޯސީޒަންސް އާއި ބަނޑޮސް ވާދަކުރި މެޗު 3-1 ގެ ނަތީޖާއަކުން އެންމެ ފަހުގެ ޗެމްޕިއަން ބަނޑޮހުން ކާމިޔާބުކޮއްފިއެވެ.

ބަނޑޮސް އައިލެންޑް ރިސޯޓްގައި ކުޅެވުނު މި މެޗުގެ ފުރަތަަމަ ސެޓުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ އިރު، 26-28 އިން މި ސެޓު ކާމިޔާބު ކުރީ ފޯސީޒަންސް އިންނެވެ.

ނަމަވެސް ޖެހިގެންއައި ދެ ސެޓުގައި ޗެންޕިއަން ބަނޑޮހުން ވަނީ އެޓީމުގެ ކުޅުން ރަނގަޅުކޮށް ފަސޭހަކަމާއި އެކު މި ދެ ސެޓު ވެސް ކާމިޔާބުކޮށްފައެވެ. އެގޮތުން މެޗުގެ ދެވަަނަ ސެޓް 12-25 އިން ކާމިޔާބުކުރިއިރު، މެޗުގެ ތިން ވަނަ ސެޓް އެޓީމުން ގެންދިޔައީ 14-25 އިންނެވެ.

Advertisement

މެޗުގެ ހަތަރުވަނަ ސެޓުގައި ފޯސީޒަންސް އިން އެޓީމުގެ ކުޅުން ރަނގަޅުކޮށް ބަނޑޮހަށް ރަގަޅު ފައިޓެއް ދިން ނަމަވެސް ބަނޑޮހުން ވަނީ 23-25 އިން ސެޓް ކާމިޔާބުކޮށް ފަހަތުން އަރައި ތިން ސެޓް އެއް ސެޓުން މެޗު ކާމިޔާބުކޮށް މުބާރާތުގައި އެޓީމުގެ ފެށުން ރަނގަޅުކޮށްފި އެވެ. މި މެޗުގެ މޭން އޮފް ދަ މެޗަކަށް ހޮވުނީ ބަނޑޮހުގެ އިޝާން މުހައްމަދު އެވެ.

މިއަހަރުގެ އިންޓަ ރިސޯޓް ވޮލީބޯލް ޗެމްޕިއަންޝިޕްގެ ޒޯން އެކެއްގައި ފަސް ޓީމު ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅެ އެންމެ ރަނގަޅަށް ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ.

ސެމީފައިނަލްގެ ފުރަތަަމަ މެޗުގައި ލީގު ބުރުގެ އެއްވަނަ އަދި ދެވަނަ ޓީމު ވާދަކޮށް މޮޅުވާ ޓީމަކަށް ފައިނަލްގެ ޖާގައެއް ލިބޭއިރު، އެމެޗުން ބަލިވާ ޓީމެއް ކުޅެންޖެހޭނީ ސެމީފައިނަލުގެ ދެވަނަ މެޗުގައި ލީގު ބުރުގެ ތިންވަނަ އާއި ހަތަރުވަނަ ވާދަކޮށް މޮޅުވާ ޓީމަކާއި ދެކޮޅަށެވެ.

ފައިނަލުގެ ދެވަނަ ޖާގަ ލިބިގެންދާނީ ސެމީގެ ފުރަތަަމަ މެޗުން ބަލިވި ޓީމާއި ސެމީގެ ދެވަނަ މެޗުން މޮޅުވި ޓީމުގެ މެދުގައި ކުޅޭ ސެމީ ފައިނަލުގެ ތިންވަނަ މެޗުން މޮޅުވާ ޓީމަކަށެވެ.